យុគសម័យ- មានទីតាំងស្ថិតនៅកណ្តាលនៃរដ្ឋធានី Warsaw នៃប្រទេសប៉ូឡូញ ភោជនីយដ្ឋាន Pho Lovers ទាក់ទាញចំណាប់អារម្មណ៍ពីប្រជាជនប៉ូឡូញដែលកំពុងស្វែងយល់នូវម្ហូបវៀតណាមនិងអាស៊ី។
ដោយមានរូបមន្តធ្វើម្ហូបដ៏គួរឱ្យចាប់អារម្មណ៍ ភោជនីយដ្ឋាននេះទទួលបានការកោតសរសើរយ៉ាងខ្លាំងពីអតិថិជន ហើយជាកន្លែងជិតស្និទ្ធសម្រាប់សហគមន៍ជនជាតិប៉ូឡូញនិងជនជាតិ វៀតណាម ។
លោក Son ជូនអាហារដោយឥតគិតថ្លៃដល់វេជ្ជបណ្ឌិតនិងក្រុមគ្រូពេទ្យនៅទីក្រុង Warsaw។
ម្ចាស់ភោជនីយដ្ឋានគឺលោក Nguyen Xuan Son ។ លោក Son បានទៅប្រទេសប៉ូឡូញពីឆ្នាំ ២០០៧ ដោយចង់ស្វែងរកការងារល្អសម្រាប់ជួយគ្រួសាររបស់គាត់នៅឯស្រុកកំណើត។ ការងារដំបូងរបស់គាត់នៅប៉ូឡូញគឺជាអ្នកជំនួយការក្នុងផ្ទះបាយ។ នៅឆ្នាំ ២០១១ គាត់បានក្លាយជាចុងភៅនៅភោជនីយដ្ឋានមួយចំនួនក្នុងប្រទេសប៉ូឡូញ។ បន្ទាប់ពីសន្សំប្រាក់បានពីរបីឆ្នាំនោះ គាត់បានឈប់ពីការងារហើយបើកភោជនីយដ្ឋានដំបូងរបស់គាត់។ ប៉ន្តែការធ្វើអាជីវកម្មមិនបានល្អនោះទេ គាត់បានក្ស័យធន។ ការបរាជ័យនេះបានជួយឱ្យគាត់ដឹងថាការគ្រប់គ្រងភោជនីយដ្ឋានគឺមិនងាយស្រួលនោះទេ។
ត្រលប់មកចំណុចចាប់ផ្តើមវិញលោកសុនបានធ្វើការឲ្យគេវិញ ហើយបន្តសន្សំប្រាក់ រក្សាបំណងរបស់គាត់។ នៅខែវិច្ឆិកាឆ្នាំ២០១៨ លោក Son បានបើកភោជនីយដ្ឋាន Pho Lovers ក្នុងគោល បំណង ណែនាំមុខម្ហូបនិងវប្បធម៌អាស៊ីដល់អតិថិជន។ ដោយបានដកបទពិសោធ ន៍ពីលើកមុននោះ លោក Son បានចូលរួមវគ្គសិក្សាពីទីផ្សារនិងការគ្រប់គ្រងអាជីវកម្មតាមអ៊ិនធរណេតដើម្បីគ្រប់គ្រងភោជនីយដ្ឋានឲ្យបានល្អ។ ដោយត្រូវធ្វើការផង ហើយសិក្សាផងនោះ បានធ្វើឱ្យគាតរវល់ខ្លាំងណាស់។ ប៉ុន្តែចំណង់ចំណូលចិត្តរបស់គាត់ចំពោះម្ហូបវៀតណាមនិងម្ហូបថៃបានជំរុញឱ្យគាត់ជំនះការលំបាក។ លោក Son បានចែករំលែកថា“ខ្ញុំពិតជាមានមោទនភាពណាស់ ពីព្រោះPho Lovers ជាភោជនីយដ្ឋានវៀតណាមមួយដែលមានហ្វើឆ្ងាញ់បំផុតនៅប្រទេសប៉ូឡូញ” ។
ម្ចាស់ភោជនីយដ្ឋាន Pho Lovers មានគោលបំណងនាំមកជូនអតិថិជននូវម្ហូបដែលមានគុណភាពល្អក្នុងតម្លៃសមរម្យ។ “ក្រៅពីការត្រួតពិនិត្យអនាម័យចំណីអាហារអោយបានម៉ឺងម៉ាត់នោះ ការស្តាប់មតិយោបល់របស់អតិថិជនក៏ជាលក្ខណៈវិនិច្ឆ័យមួយដែលជួយយើងរក្សាប្រតិបត្តិការអាជីវកម្មប្រកបដោយនិរន្តរភាពផងដែរ” ។ ដោយសារតែមានម្ហូបឆ្ងាញ់ប្លែកៗ និងការបំរើល្អៗនោះបានជាភោជនីយដ្ឋានរបស់ម្ចាស់ហាងជាជនជាតិវៀតណាមនេះទទួលបានការគាំទ្រពីអតិថិជនជានិច្ច។
ជំងឺរាតត្បាត Covid-19 កំពុងផ្ទុះឡើងធ្វើឱ្យពិភពលោកជួបការលំបាកជាច្រើន ហើយប្រទេសប៉ូឡូញក៏មិនមែនជាករណីលើកលែងដែរ។ ជំងឺរាតត្បាតមិនត្រឹមតែធ្វើឱ្យសេដ្ឋកិច្ចរបស់ប្រទេសអឺរ៉ុបមួយនេះមានការលំបាកប៉ុណ្ណោះទេ ថែមទាំងគំរាមកំហែងដល់សុខភាពនិងជីវិតរបស់ប្រជាជននៅទីនេះទៀតផង។ ដោយយល់ដឹងពីការទទួលខុសត្រូវចំពោះប្រទេសដែលចិញ្ចឹមបីបាច់ខ្លួននោះ លោក Son បានរួមដៃគ្នាជាមួយសហគមន៍ ដើម្បីប្រយុទ្ធប្រឆាំងនឹងជំងឺរាតត្បាតនេះ។ ដោយមានឡានដឹកទំនិញ គាត់បាននាំយកអាហារឥតគិតថ្លៃជូនក្រុមគ្រូពេទ្យដែលធ្វើការនៅមន្ទីរពេទ្យគ្លីនិកនៃក្រសួងមហាផ្ទៃប៉ូឡូញនិងរដ្ឋបាលនៅទីក្រុង Warsaw ក៏ដូចជាក្រុមគ្រូពេទ្យដែលមើលថែអ្នកជំងឺ Covid-19 ។
លោក Son បានមានប្រសាសន៍ថា គាត់នឹងមិនភ្លេចពេលវេលាដែលគាត់ចូលរួមជាមួយរដ្ឋាភិបាលប៉ូឡូញប្រឆាំងនឹងការរីករាលដាលនៃជំងឺនេះឡើយ។ ស្ថានភាពជំងឺនៅប្រទេសប៉ូឡូញពេលនេះស្ថិតក្រោមការគ្រប់គ្រងហើយ ប៉ុន្តែប្រសិនបើមានការកើតឡើងម្តងទៀត នាពេលអនាគត គាត់នឹងស្ម័គ្រចិត្តចូលរួមនិងជួយគាំទ្រដល់ក្រុមគ្រូពេទ្យ។ ដោយចែករំលែកអំពីផែន ការផ្សេងៗទៀត នាពេលអនាគតលោកសឺនមានបំណងចង់បើកភោជនីយដ្ឋានពីរបីបន្ថែមទៀតនៅទីក្រុង Warsaw ដើម្បីឱ្យអតិថិជនច្រើនបន្ថែមទៀតអាចបានពិសាម្ហូបវៀតណាមនិងអាស៊ី./.（បកប្រែដោយឌីណា）
（ប្រភពព័ត៌មាន: thoidai.com.vn）
មតិពីមិត្តអ្នកអាន