«BUN RANY - THE WIFE OF CAMBODIA’S STRONG MAN» មានន័យជាភាសាខ្មែរថា «ប៊ុន រ៉ានី - ភរិយាបុរសខ្លាំងនៃកម្ពុជា»។ សៀវភៅនេះបានបកប្រែពីសៀវភៅជាភាសាខ្មែរដែលបានចេញផ្សាយតាំងពីខែថ្ងៃទី១០ ខែធ្នូ ឆ្នាំ២០១៩ មកម្ល៉េះ។
សៀវភៅជាភាសាអង់គ្លេសស្តីពីប្រវត្តិសង្ខេបកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន។ (រូបថត៖ thmey thmey.com)
លោក ឆាយ សុផល អ្នកសារព័ត៌មានជើងចាស់ បានចេញផ្សាយសៀវភៅជាភាសាអង់គ្លេសស្តីពីប្រវត្តិសង្ខេបកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជានៅសៅរ៍ទី១៦ ឧសភានេះ។
បើតាមការរៀបរាប់របស់លោក ឆាយ សុផល សៀវភៅនេះមានចំណងជើងថា «BUN RANY - THE WIFE OF CAMBODIA’S STRONG MAN» មានន័យជាភាសាខ្មែរថា «ប៊ុន រ៉ានី - ភរិយាបុរសខ្លាំងនៃកម្ពុជា»។
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានប្រសូតចេញពីត្រកូលកសិករក្នុងភូមិទី២ ឃុំរកាខ្នុរ ស្រុកក្រូចឆ្មារ ខេត្តកំពង់ចាម នាថ្ងៃទី១៥ ខែធ្នូ ឆ្នាំ១៩៥៤។ មានលោកឪពុកឈ្មោះ លីន គ្រី (ទទួលមរណភាព) និងអ្នកម្តាយឈ្មោះ ប៊ុន ស៊ាងលី មានបងប្អូន៦នាក់ ស្រី២នាក់។ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ឧត្តមភរិយាសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ត្រូវបានប្រជាពលរដ្ឋខ្មែរ និងមេដឹកនាំពិភពលោក ផងដែរ ធ្វើការវាយតម្លៃខ្ពស់ថា ជាកុលធីតាកម្ពុជាមួយរូប ដែលបានធ្វើសកម្មភាពយ៉ាងក្លៀវក្លាក្នុងបុព្វហេតុមនុស្សធម៌ និងជានិមិត្តរូបដ៏ឧត្តុងឧត្តម នៃការ ជួយសង្រ្គោះជនរងគ្រោះនៅកម្ពុជាគ្រប់រូប ដោយមិនប្រកាន់និន្នាការ រើសអើងពូជសាសន៍ ឬពណ៌សម្បុរនោះឡើយ។
លោកបញ្ជាក់ថា៖«ដោយសារខ្ញុំបានទទួលសារតាមអ៊ីម៉េលផង និងតាមហ្វេសប៊ុកផង ព្រមទាំងមានសំណើពីបណ្ណាគារខ្លះនៅរាជធានីភ្នំពេញថា ពួកគេចង់បានសៀវភៅពីប្រវត្តិរបស់ស្ត្រីទី១នៃកម្ពុជា ទើបខ្ញុំប្រឹងប្រែងធ្វើសៀវភៅនេះជាភាសាអង់គ្លេស។ ការធ្វើសៀវភៅមួយច្បាប់ៗគឺពិតជាមិនងាយស្រួលពេកទេ តែធ្វើដូចម្តេច បើខ្ញុំធ្លាក់ខ្លួនក្នុងអាជីពនេះទៅហើយ”។«
បើតាមការរៀបរាប់របស់អ្នកនិពន្ធរូបនេះបានឲ្យដឹងថា សៀវភៅដែលចំណងជើងជាភាសាអង់គ្លេសសរសេរថា «BUN RANY - THE WIFE OF CAMBODIA’S STRONG MAN» ត្រូវបានបកប្រែដោយក្រុមជំនាញ និងមានការកែសម្រួលពីជនជាតិអាម៉េរិក។
បន្ទាប់ពីសៀវភៅនេះទៅ លោក ឆាយ សុផល បានបញ្ជាក់ថា សៀវភៅ «បងប្អូនប្រុសទាំងបី» ដែលរៀបរាប់ពីសាវតារកូនប្រុសរបស់សម្តេចតេជោ និងសម្តេចកិត្តិព្រឹទ្ធបណ្ឌិត ក៏នឹងត្រូវចេញផ្សាយជាភាសាអង់គ្លេស និងភាសាចិនដែរនៅខែក្រោយនេះ ខណៈដែលសៀវភៅសម្តេចតេជោ ដែលមានចំណងជើងថា «ហ៊ុន សែន - នយោបាយ និងអំណាចក្នុងប្រវត្តិសាស្ត្រខ្មែរជាង៤០ឆ្នាំ« នឹងត្រូវចេញផ្សាយជាភាសាអង់គ្លេសនៅក្នុងអំឡុងខែសីហាខាងមុខនេះ៕
(បូកសរុបដោយឌីណា)
មតិពីមិត្តអ្នកអាន