«សុខសន្តិភាពដែលកម្ពុជាទទួលបាននាពេលនេះ មិនមែនកើតមកដោយងាយៗនោះឡើយ គឺបានដោយឥស្សរជនស្នេហាជាតិ យកអាយុជីវីតទៅប្តូរ»។ នេះជាការលើកឡើងរបស់សម្តេចអគ្គមហាពញាចក្រី ហេង សំរិន ប្រធានរដ្ឋសភានិងជាឥស្សរជនជាន់ខ្ពស់ជាតិមួយរូប ដែលបានចូលរួមរំដោះប្រទេសជាតិចេញពីរបបខ្មែរក្រហម។
សម្តេចអគ្គមហាពញាចក្រី ហេង សំរិន ប្រធានរដ្ឋសភានិងជាឥស្សរជនជាន់ខ្ពស់ជាតិមួយរូប ដែលបានចូលរួមរំដោះប្រទេសជាតិចេញពីរបបខ្មែរក្រហម។
នៅក្នុងឱកាសទិវាជាតិនៃការចងចាំរបបប្រល័យពូជសាសន៍ប៉ុលពត ថ្ងៃ២០ ខែឧសភានេះ សម្តេចប្រធានរដ្ឋសភាបានធ្វើការអំពាវនាវដល់ពលរដ្ឋទំាងអស់រួបរួមគ្នាការពារថែរក្សាឲ្យបាននូវសុខសន្តិភាពនេះឲ្យគង់វង្សរហូតទៅដើម្បីទទួលបានការអភិវឌ្ឍតទៅមុខទៀត។
សម្តេចបានគូសបញ្ជាក់ថា៖ «មានតែសុខសន្តិភាពទេ ដែលផ្តល់ឱកាសឲ្យយើងមានលទ្ធភាពកសាងអភិវឌ្ឍន៍ប្រទេសជាតិ ឲ្យមានការរីកចម្រើនឆាប់រហ័សនោះ»។
សូមរម្លឹកថា៖ ថ្ងៃទី២០ ខែឧសភា ឆ្នាំ១៩៧៤ របបខ្មែរក្រហមដាក់ចេញនូវគោលនយោបាយដ៏ឆ្កួតលីលា ដូចជា ផែនការការជម្លៀសប្រជាជនចេញពីទីក្រុង លុបបំបាត់ចោលទាំងស្រុងនូវសេដ្ឋកិច្ចទីផ្សាររូបិយប័ណ្ណ សាសនា ជាដើមមុនរបបនេះឡើងគ្របគ្រងប្រទេសពីថ្ងៃទី១៧ ខែមេសា ឆ្នាំ១៩៧៥ ដល់ថ្ងៃ៧មករា ឆ្នាំ១៩៧៩។
ក្នុងរយៈពេលជាង៣ឆ្នាំពួកខ្មែរក្រហមបានកាប់សម្លាប់ធ្វើទារុណកម្មនិងបំផ្លិចផ្លាញប្រទេសជាតិឲ្យខ្ទេចខ្ទីស្ទើរគ្មានសល់ទំាងធនធានមនុស្សនិងហេដ្ឋារចនាសម្ព័ន្ធ។ពលរដ្ឋកម្ពុជាបានរស់នៅក្នុងសមុទ្រទឹកភ្នែកនិងឈាមរបបអាវខ្មៅបានកាប់សម្លាប់ពលរដ្ឋជាង៣លាននាក់។
សម្តេចអគ្គមហាពញាចក្រីហេង សំរិន បានមានប្រសាសន៍លើកឡើងទៀថា៖ដោយមើលឃើញពីគ្រោះមហន្តរាយ និង ទុក្ខវេទនារបស់ប្រជាពលរដ្ឋ និង ប្រទេសជាតិបែបនេះទើបមានកម្លំាងស្នេហាជាតិមួយ បានកើតឡើងដើម្បីវាយរំលំរបបប្រល័យពួជសាសន៍ប៉ុលពត នៅថ្ងៃទី៧ ខែមករា ឆ្នាំ១៩៧៩។ ជ័យជំនះ៧មករា ឆ្នាំ១៩៧៩ជាថ្ងៃផ្តល់កំណើតទី២ ដល់ប្រជាពលរដ្ឋខ្មែរ ជាថ្ងៃស្រោចស្រង់និងកសាងប្រទេសជាតិចេញពីគំនរផេះផង់ឈានមកទទួលបានសុខសន្តិភាព និងការអភិវឌ្ឍដូចសព្វថ្ងៃ./.
ប្រជាជនបង្ខំធ្វើការ ក្រោមរបបប្រល័យពូជសាសន៍។
ជ័យជំនះ៧មករា ឆ្នាំ១៩៧៩ជាថ្ងៃផ្តល់កំណើតទី២ ដល់ប្រជាពលរដ្ឋខ្មែរ ជាថ្ងៃស្រោចស្រង់និងកសាងប្រទេសជាតិចេញពីគំនរផេះផង់ឈានមកទទួលបានសុខសន្តិភាព និងការអភិវឌ្ឍដូចសព្វថ្ងៃ៕
（ប្រភពព័ត៌មាន: rasmeinews）
មតិពីមិត្តអ្នកអាន