ព្រះករុណា ព្រះមហាក្សត្រកម្ពុជា សម្តេចព្រះបរមនាថ នរោត្តម សីហមុនី កាលពីល្ងាចថ្ងៃទី៨ ខែឧសភា ឆ្នាំ២០២០ ស្តេចសព្វព្រះរាជហឫទ័យទទួលព្រះរាជសវនការជាមួយលោក វ៉ាង យី (Wang Yi) ទីប្រឹក្សារដ្ឋ និងជារដ្ឋមន្ត្រីក្រសួងការបរទេសចិន ខណៈពេលដែល ព្រះអង្គ និងសម្តេចព្រះវររាជមាតា កំពុងគង់ប្រថាប់ពិនិត្យព្រះរាជសុខភាព នៅរដ្ឋធានីប៉េកាំង។ នេះបើតាមការផ្សាយរបស់ក្រសួងការបរទេសចិន។
ទិដ្ឋភាពនៃជំនួនរវាងព្រះករុណា ព្រះមហាក្សត្រកម្ពុជា សម្តេចព្រះបរមនាថ នរោត្តម សីហមុនី លោក វ៉ាង យី (Wang Yi) ទីប្រឹក្សារដ្ឋ និងជារដ្ឋមន្ត្រីក្រសួងការបរទេសចិន។
«មិត្តភាពចិន - កម្ពុជា គឺជាមិត្តភាពដែលមិនអាចបំបែកបាន និងបានទប់ទល់ទៅនឹងការសាកល្បង នៃការផ្លាស់ប្តូរអន្តរជាតិ ហើយវាអាចត្រូវបានគេហៅថាជាគំរូនៃការផ្លាស់ប្តូររវាងប្រទេសនិងរដ្ឋ»។ លោក វ៉ាង យី បានលើកឡើងយ៉ាងដូច្នេះ។
ទាក់ទងនឹងការផ្ទុះឡើងនៃ COVID-19 រដ្ឋមន្ត្រីការបរទេសចិន បានទូលថ្វាយព្រះមហាក្សត្រខ្មែរ ពីការជឿជាក់របស់ខ្លួនថា កម្ពុជានឹងជៀសផុតពីការរាលដាល ប៉ុន្តែទាំងចិន និងកម្ពុជា នៅតែប្រឈមនឹងហានិភ័យចំពោះការងើបឡើងវិញនៃជំងឺនេះ ចំពោះប្រជាជនក្នុងស្រុក និងការនាំចូលពីខាងក្រៅ។
ជាមួយគ្នានេះ លោក វ៉ាង យី បានថ្លែងអំណរគុណកម្ពុជា ដែលបានផ្តល់ការគាំទ្រយ៉ាងរឹងមាំជូនដល់ប្រទេសចិន។ ក្រៅពីការសម្តែងសមានទុក្ខចំពោះលោកប្រធានាធិបតី ស៊ី ជិនភីង ព្រះមហាក្សត្រ និងសម្តេចព្រះវររាជមាតា ក៏បានសព្វព្រះរាជហឫទ័យបង្ហូតទង់ព្រះមហាក្សត្រត្រឹមពាក់កណ្តាលដង នៅមុខព្រះរាជដំណាក់ក្រុងប៉េកាំង ដើម្បីកាន់ទុក្ខដល់អ្នកស្លាប់ដោយសារ COVID-19 ផងដែរ។
ជាមួយគ្នានេះ សម្តេចព្រះវររាជមាតា ព្រះអង្គបានប្រារព្ធពិធីតាមបែបព្រះពុទ្ធសាសនានៅព្រះបរមរាជវាំងនៃប្រទេសកម្ពុជា ដើម្បីបួងសួងដល់ប្រជាជនចិន។ លោក វ៉ាង យី ក៏បានអះអាងផងដែរថា ចិនចងចាំជាមួយចំពោះដំណើរទស្សនកិច្ចរបស់ សម្តេចនាយករដ្ឋមន្ត្រី ហ៊ុនសែន ទៅកាន់ប្រទេសចិនក្នុងកាលៈទេសៈដ៏លំបាក។
នាព្រះរាជសវនាការនោះផងដែរ ព្រះករុណា ព្រះមហាក្សត្រកម្ពុជា ស្តេចមានព្រះរាជឱង្ការថា៖ «ខ្ញុំនឹងបន្តទៅមុខតាមផ្លូវចំណងមិត្តភាពកម្ពុជា-ចិន ដែលបានកសាងដោយ សម្តេចព្រះ នរោត្តម សីហនុ និងថ្នាក់ដឹកនាំគ្រប់ជំនាន់នៃប្រទេសចិន បន្តមរតក និងអភិវឌ្ឍមិត្តភាពរវាងប្រទេសទាំងពីរ ដើម្បីផ្តល់ផលប្រយោជន៍កាន់តែប្រសើរថែមទៀតដល់ប្រជាជននៃប្រទេសទាំងពីរ»។
ព្រះករុណា ព្រះមហាក្សត្រ បានអបអរសាទរប្រទេសចិន ចំពោះសមិទ្ធិផលសំខាន់ៗដែលសម្រេចបាន ក្នុងការប្រយុទ្ធប្រឆាំងនឹងការរាតត្បាតនៃជំងឺ COVID-19 ។ ភាគីកម្ពុជា មានឆន្ទៈក្នុងការពង្រឹងការផ្លាស់ប្តូរបទពិសោធន៍នៃការការពារការឆ្លងរាលដាលជាមួយប្រទេសចិន និងការពារសុវត្ថិភាពដល់ជីវិតប្រជាជន៕
(ប្រភពព័ត៌មាន: thmey thmey.com)