ផ្សារដោះដូរទំនិញវៀតណាម-កម្ពុជានឹងបានសម្ពោធដាក់អោយប្រើប្រាស់នាថ្ងៃទី ២៤ ខែធ្នូ

ផ្សារគំរូព្រំដែនកម្ពុជា (ផ្សារដារ) (រូបថតៈ Khmer Times)

ពិធីសម្ពោធផ្សារដែលមានឈ្មោះថា «ផ្សារគំរូព្រំដែនកម្ពុជា (ផ្សារដារ)» នេះ នឹងធ្វើឡើងក្រោមអធិបតីភាពដ៏ខ្ពង់ខ្ពស់របស់ឧបនាយករដ្ឋមន្ត្រីវៀតណាម លោក Trinh Dinh Dung និងសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

«ផ្សារគំរូព្រំដែនកម្ពុជា (ផ្សារដារ)» មានទីតាំងស្ថិតនៅក្នុងតំបន់សេដ្ឋកិច្ចពិសេស ថារីត្បូងឃ្មុំ ភូមិដារកណ្តោល ឃុំដារ ស្រុកមេមត់ ខេត្តត្បូងឃ្មុំ លើផ្ទៃដីទំហំជិត២ហិកតា ចម្ងាយប្រមាណជា ៣០០ម៉ែត្រពីព្រំដែនកម្ពុជា-វៀតណាម។ ទីតាំងផ្សារគំរូនេះ ជាដែនដីអតីតសមរភូមិដែលសម្តេចតេជោ ហ៊ុន សែន បានប្រយុទ្ធគ្នាចំនួន២០លើក ក្នុងអំឡុងឆ្នាំ១៩៧១។

ផ្សារគំរូព្រំដែនកម្ពុជា ជាហិរញ្ញប្បទានឥតសំណងរបស់រដ្ឋាភិបាលវៀតណាម (រូបថតៈ rasmeinews.com)

«ផ្សារគំរូព្រំដែនកម្ពុជា» ត្រូវបានបើកការដ្ឋានសាងសង់នៅឆ្នាំ២០១៨ ដោយចំណាយថវិកាជិត ២លានដុល្លារអាមេរិក ដែលជាថវិការបស់រដ្ឋាភិបាលវៀតណាម។ ផ្សារនេះមានចំនួន ៦៨ស្តង់ ចែកចេញជា៦ប្រភេទ។ ផ្សារគំរូព្រំដែនកម្ពុជា ត្រូវបានអនុញ្ញាតឱ្យដាក់លក់តែផលិតផលរបស់វៀតណាម និងកម្ពុជា ដោយមិនអនុញ្ញាតឱ្យលក់ផលិតប្រទេសដទៃនោះឡើយ។

វត្តមានផ្សារគំរូព្រំដែនកម្ពុជា គឺជាសមិទ្ធផលប្រវត្តិសាស្ត្រថ្មីមួយទៀតលើទឹកដីតំបន់ព្រំដែនរវាងវៀតណាម និងកម្ពុជា៕

（សរុបដោយ ស្រីព្រេជ）

（សរុបដោយ ស្រីព្រេជ）