យុគសម័យ- រដ្ឋាភិបាលជប៉ុនបានប្រកាសថា មេដឹកនាំនិងមន្រ្តីជាន់ខ្ពស់នៃបណ្តាប្រទេសអាស៊ីចំនួន ៧ ក្នុងនោះមានវៀតណាមនឹងអញ្ជើញមកកាន់ប្រទេសជប៉ុនក្នុងសប្តាហ៍នេះ ដើម្បីចូលរួមវេទិកាអនាគតអាស៊ី។
ឧបនាយករដ្ឋមន្រ្តី រដ្ឋមន្រ្តីការបរទេសវៀតណាម Pham Binh Minh (រូបភាពៈ Minh Hoang/ TTXVN)
ព្រឹត្តិការណ៍នេះ ដោយសម្ព័ន្ធក្រុមហ៊ុន Nikkei Inc ទទួលរៀបចំ ដែលនឹងប្រព្រឹត្តទៅក្នុងរយៈពេលពីរថ្ងៃ ពោលគឺចាប់ពីថ្ងៃទី៣០ ខែឧសភាតែម្តង។ ឧបនាយករដ្ឋមន្ត្រីនិងជារដ្ឋមន្ត្រីការបរទេសវៀតណាម លោក Pham Binh Minh អញ្ជើញចូលរួមនៅក្នុងព្រឹត្តិការណ៍នេះ។
នាយខុទ្ទកាល័យប្រទេសជប៉ុន លោក Yoshihide Suga បានប្រកាសនូវសន្និសីទសារព័ត៌មាននៅរដ្ឋធានី តូក្យូ ។ បណ្តាថ្នាក់ដឹកនាំនឹងមកដល់ប្រទេសជប៉ុនចូលរួមវេទិការអនាគតនៃអាស៊ី រួមមានប្រធានាធិបតីហ្វិលីហ្វិន លោក Rodrigo Duterte នាយករដ្ឋមន្រ្តីម៉ាឡេស៊ី លោក Mahathir Mohamad នាយករដ្ឋមន្រ្តី បង់ក្លាដែស លោក Sheikh Hasina នាយករដ្ឋមន្រ្តីកម្ពុជា សម្តេចតេជោ ហ៊ុនសែន នាយករដ្ឋមន្រ្តីឡាវ លោក Thongloun Sisoulith និងឧបនាយករដ្ឋមន្រ្តីសង្ហបុរី លោក Heng Swee Keat ក៏ចូលរួមផងដែរ។
យោងតាមផែនការ បណ្តាថ្នាក់ដឹកនាំខាងលើ នឹងថ្លែងសុន្ទកថានៅវេទិកាអនាគតអាស៊ី។ នាយករដ្ឋមន្រ្តីជប៉ុន នឹងមានកិច្ចពិភាក្សាដាច់ដោយឡែកជាមួយបណ្តាថ្នាក់ដឹកនាំមួយចំនួនអំពីទំនាក់ទំនងទ្វេភាគី និងបណ្តាក្នុងតំបន់។
ស្ថានទូតវៀតណាម ប្រចាំនៅប្រទេសជប៉ុនបានឲ្យដឹងថា ក្នុងក្របខ័ណ្ឌនៃដំណើរចូលរួមវេទិការអនាគតអាស៊ី ឧបនាយករដ្ឋមន្រ្តី រដ្ឋមន្រ្តីការបរទេសវៀតណាម លោក Pham Binh Minh នឹងធ្វើជាសហប្រធានកិច្ចប្រជុំគណៈកម្មាធិការនៃកិច្ចសហប្រតិបត្តិការវៀតណាម-ជប៉ុន និងមានកិច្ចពិភាក្សាការងារជាមួយរដ្ឋមន្រ្តីការបរទេសជប៉ុន លោក Taro Kono ផងដែរ។
ឧបនាយករដ្ឋមន្រ្តី រដ្ឋមន្រ្តីការបរទេសវៀតណាម លោក Pham Binh Minh គ្រោងនឹងជួបសម្តែងការគួរសមជាមួយនាយករដ្ឋមន្រ្តីជប៉ុន លោក ស៊ីនហ្សូ អាបេ និងប្រធានព្រឹទ្ធសភា រដ្ឋសភាជប៉ុន ជួបជាមួយនាយករដ្ឋមន្រ្តីឡាវ និងទទួលជួបជាមួយប្រធាននៃអង្គការសហប្រតិបត្តិការអន្តរជាតិជប៉ុន JICA ផងដែរ៕
（ប្រភព៖ vietnamplus.vn បកប្រែដោយសំណាង）
មតិពីមិត្តអ្នកអាន