លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជាបានសាទរចំពោះប្រទេសកូរ៉េខាងត្បូងដែលបានប្តេជ្ញាជួយអភិវឌ្ឍក្នុងតំបន់មេគង្គ។
ទិដ្ឋភាពនៃកិច្ចប្រជុំនេះ
ការលើកឡើងបែបនេះត្រូវបានធ្វើឡើងកាលពីម្សិលមិញបន្ទាប់ពីកិច្ចប្រជុំរដ្ឋមន្ត្រីការបរទេសមេគង្គ-សាធារណរដ្ឋកូរ៉េ លើកទី១០ ដែលបានធ្វើឡើងតាមប្រព័ន្ធវីដេអូកាលពីថ្ងៃច័ន្ទ ដឹកនាំដោយសហប្រធានពីររូបគឺ លោក ផាម ប៊ិញមិញ ឧបនាយករដ្ឋមន្ត្រី រដ្ឋមន្ត្រីការបរទេសវៀតណាម និងលោកស្រី កាង ក្យុងវ៉ា រដ្ឋមន្ត្រីការបរទេសនៃសាធារណរដ្ឋកូរ៉េខាងត្បូង ។
លោក ប្រាក់ សុខុន ថ្លែងថា៖ «ផ្អែកលើលក្ខណៈសម្បត្តិយ៉ាជាក់ស្ដែង យើងសូមកោតសរសើរចំពោះការប្ដេជ្ញាចិត្តរបស់សាធារណរដ្ឋកូរ៉េ ក្នុងការរួមចំណែក និងការយកចិត្តទុកដាក់ជាចម្បងលើការអភិវឌ្ឍនៅក្នុងតំបន់មេគង្គ និងការសម្រេចឲ្យបាននូវសហគមន៍អាស៊ាន ដែលជាវិសាលភាពដ៏ធំធេងនៅក្នុងក្របខ័ណ្ឌនេះ»។ លោកបន្តថា៖ «ដោយផ្ដោតលើនិរន្តរភាពដ៏យូរអង្វែងនៃកិច្ចសហប្រតិបត្តិការរបស់យើង ខ្ញុំមានទស្សនៈថាជំនួយអភិវឌ្ឍន៍គ្រាន់តែជាផ្នែកមួយនៃរឿងប៉ុណ្ណោះ»។
លោកថា៖ «ភាពធន់នៃប្រជាជាតិរបស់យើង ជាពិសេសនៅក្នុងរយៈពេលនៃការងើបឡើងវិញនៃសេដ្ឋកិច្ចក្រោយវីរុសកូវីដ១៩ នឹងអាស្រ័យលើសមត្ថភាពរបស់រដ្ឋាភិបាលនីមួយៗក្នុងការជំរុញសេដ្ឋកិច្ចតាមរយៈពាណិជ្ជកម្ម វិនិយោគ និងទេសចរណ៍»។ លោកបន្ថែមថា៖ «នេះជាអ្វីដែលខ្ញុំរំពឹងថាការចូលរួមចំណែកយ៉ាងសកម្មរបស់វិស័យឯកជនដើម្បីជំរុញឱកាសអាជីវកម្ម និងវិនិយោគថ្មីៗក្នុងការបង្កើតការបង្កើតការងារថ្មីៗគឺសមស្របសម្រាប់បទដ្ឋានថ្មីក្រោយករណីឆ្លងរីករាលដាលនៃវីរុសនេះបញ្ចប់ទៅ»។
ជាមួយគ្នានេះផងដែរ លោក ប្រាក់ សុខុន ក៏បានថ្លែងអំណរគុណដល់ប្រទេសកូរ៉េខាងត្បូងដែលបានផ្តល់កញ្ចប់ថវិកាចំនួន ៣០០ ០០០ ដុល្លារសម្រាប់ប្រទេសកម្ពុជាក្នុងការប្រយុទ្ធប្រឆាំងនឹងវីរុសកូវីដ១៩។ លោកក៏បានកោតសរសើរចំពោះការបញ្ចប់ប្រកបដោយជោគជ័យនៃ «ការគ្រប់គ្រងនិងអភិវឌ្ឍន៍ធនធានទឹកនៅលើដងទន្លេមេគង្គ» ដែលភ្ជាប់ទៅនឹងអាងស្តុកទឹកនៃបឹងទន្លេសាប។ សេចក្តីប្រកាសព័ត៌មានដែលចេញផ្សាយដោយក្រសួងការបរទេសកាលពីម្សិលមិញក៏បានបង្ហាញការគាំទ្រយ៉ាងខ្លាំងចំពោះ គោលនយោបាយភាគខាងត្បូងថ្មី របស់កូរ៉េខាងត្បូងដោយផ្អែកលើសសរស្តម្ភបី គឺប្រជាជន វិបុលភាព និងសន្តិភាព ដូចដែលបានគូសបញ្ជាក់នៅក្នុងសេចក្តីថ្លែងការណ៍ទន្លេមេគង្គ-ទន្លេហាន។
ក្រសួងក៏បានសង្កត់ធ្ងន់ពីសារសំខាន់នៃកិច្ចសហប្រតិបត្តិការកាន់តែរឹងមាំរវាងវិស័យឯកជនសាធារណៈដើម្បីការអភិវឌ្ឍន៍ប្រកបដោយបរិយាប័ន្ននិងចីរភាពក្នុងតំបន់ និងបានចែករំលែកនូវទស្សនៈថា វេទិកាធុកិច្ចមេគង្គ-សាធារណរដ្ឋកូរ៉េ និងក្រុមប្រឹក្សាធុរកិច្ចមេគង្គ-សាធារណរដ្ឋកូរ៉េ បានពង្រឹងនូវចំណងទំនាក់ទំនងសេដ្ឋកិច្ច រវាងសាធារណរដ្ឋកូរ៉េ និងបណ្ដាប្រទេសមេគង្គ។ ជាមួយគ្នានេះផងដែរ លោកប្រាក់ សុខុន ក៏បានបង្ហាញពីការស្វាគមន៍និងការគាំទ្ររបស់ប្រទេសកម្ពុជាចំពោះសំណើរបស់កូរ៉េខាងត្បូងក្នុងការតម្លើងកម្រិតនៃកិច្ចសហប្រតិបត្តិការមេគង្គ- សាធារណរដ្ឋកូរ៉េទៅជាភាពជាដៃគូយុទ្ធសាស្ត្រស្របតាមគំនិតផ្តួចផ្តើមរបស់លោកនាយករដ្ឋមន្ត្រីហ៊ុន សែន កាលពីឆ្នាំមុនក្នុងការតម្លើងកម្រិតយន្តការនៃកិច្ចប្រជុំនេះទៅដល់កម្រិតកិច្ចប្រជុំកំពូល។
កិច្ចប្រជុំនេះបានអនុម័តលើឯកសារគោលចំនួន២ គឺ (១) សេចក្ដីប្រកាសសហប្រធាននៃកិច្ចប្រជុំរដ្ឋមន្ត្រីការបរទេសមេគង្គ-សាធារណរដ្ឋកូរ៉េលើកទី១០ និង (២) ផែនការសកម្មភាពឆ្នាំ២០២១-២០២៥ ស្ដីពីកិច្ចសហប្រតិបត្តិការមេគង្គ-សាធារណរដ្ឋកូរ៉េ សម្រាប់អនុវត្តនូវសេចក្ដីថ្លែងការណ៍ទន្លេមេគង្គ-ទន្លេហាន។
លោក គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជានៃរាជបណ្ឌិត្យសភាកម្ពុជាបានប្រាប់សារព័ត៌មានខ្មែរថាមស៍កាលពីម្សិលមិញថាកិច្ចសហប្រតិបត្តិការទន្លេមេគង្គ-សាធារណរដ្ឋកូរ៉េគឺជាឱកាសមួយសម្រាប់ប្រទេសកម្ពុជាក្នុងការពង្រឹងទំនាក់ទំនងជាមួយកូរ៉េខាងត្បូង ជាពិសេសតាមរយៈការវិនិយោគនិងការដោះដូរពាណិជ្ជកម្មរវាងប្រទេសទាំងពីរ។ ប្រទេសទាំងពីរស្ថិតក្នុងដំណាក់កាលវិជ្ជមានជាមួយគ្នាទៅវិញទៅមក ដែលមានសក្តានុពលក្នុងការគិតអំពីការចរចាកិច្ចព្រមព្រៀងពាណិជ្ជកម្មសេរី។ វាអាចមានអត្ថប្រយោជន៍ខ្លាំងណាស់សម្រាប់ប្រទេសកម្ពុជា” ។ លោកបានបន្តថា៖ «ជាពិសេស ប្រទេសកូរ៉េខាងត្បូងបានជួយប្រទេសកម្ពុជាក្នុងអំឡុងពេលមានការរីករាលដាលនៃជំងឺរាតត្បាត ក៏ដូចជាការប្តេជ្ញាចិត្តក្នុងការស្តារឡើងវិញរបស់ប្រទេសក្រោយវិបត្តិកូវីដ១៩»។
គួរបញ្ជាក់ឲ្យដឹងផងដែរថា ឧបនាយករដ្ឋមន្ត្រី ប្រាក់ សុខុន នឹងចូលរួមកិច្ចប្រជុំ រដ្ឋមន្ត្រីការបរទេសអាស៊ាន-ចក្រភពអង់គ្លេស ស្ដីពីជំងឺកូវីដ១៩ តាមរយៈប្រព័ន្ធវីដេអូនៅថ្ងៃនេះ៕
(សរុបដោយ ហេង វុធ្ធី)
(ប្រភពព័ត៌មាន: Postkhmer/ Freshnews)
មតិពីមិត្តអ្នកអាន