នាំទំនាក់ទំនង វៀតណាម - ចិន ឈានចូលដំណាក់កាលអភិវឌ្ឍន៍ក្នុងកម្រិតកម្ពស់ថ្មី

តបតាមការអញ្ជើញរបស់អគ្គលេខាបក្សនៃគណៈកម្មាធិការមជ្ឈិមបក្សកុម្មុយនីស្តចិន និងជាប្រធាននៃសាធារណរដ្ឋប្រជាមានិតចិន លោក Xi Jinping និងភរិយា, អគ្គលេខាបក្សនៃគណៈកម្មាធិការមជ្ឈិមបក្សកុម្មុយនីស្តវៀតណាម និងជាប្រធាននៃសាធារណរដ្ឋសង្គមនិយមវៀតណាម លោក To Lam ព្រមទាំងភរិយា និងគណៈប្រតិភូជាន់ខ្ពស់វៀតណាម នឹងអញ្ជើញទៅបំពេញទស្សនកិច្ចផ្លូវរដ្ឋនៅប្រទេសចិន ចាប់ពីថ្ងៃទី ១៤ ដល់ថ្ងៃទី ១៧ ខែមេសា ឆ្នាំ ២០២៦។

ក្នុងឱកាសនេះ អនុរដ្ឋមន្ត្រីប្រចាំការនៃក្រសួងការបរទេស លោក Nguyen Minh Vu បានចែករំលែកជាមួយបណ្តាសារព័ត៌មានអំពីអត្ថន័យដ៏មានសារៈសំខាន់ពិសេសនៃដំណើរទស្សនកិច្ចនេះ ដោយបញ្ជាក់ថា នេះគឺជាសកម្មភាពកិច្ចការបរទេសទ្វេភាគីជាន់ខ្ពស់ដ៏លេចធ្លោរវាងបក្សទាំងពីរ និងរដ្ឋទាំងពីរ វៀតណាម-ចិន ក្នុងឆ្នាំ ២០២៦។

អ្នកយកព័ត៌មាន៖ សូមលោកអនុរដ្ឋមន្ត្រី មេត្តាជម្រាបជូនអំពីអត្ថន័យនៃដំណើរទស្សនកិច្ចផ្លូវរដ្ឋនៅប្រទេសចិន របស់អគ្គលេខាបក្ស និងជាប្រធានរដ្ឋ លោក To Lam ដែលប្រព្រឹត្តទៅចាប់ពីថ្ងៃទី ១៤ ដល់ថ្ងៃទី ១៧ ខែមេសា ឆ្នាំ ២០២៦ នេះ?

អនុរដ្ឋមន្ត្រីប្រចាំការ លោក Nguyen Minh Vu៖ តបតាមការអញ្ជើញរបស់អគ្គលេខាបក្សនៃគណៈកម្មាធិការមជ្ឈិមបក្សកុម្មុយនីស្តចិន និងជាប្រធាននៃសាធារណរដ្ឋប្រជាមានិតចិន លោក Xi Jinping និងភរិយា, អគ្គលេខាបក្សនៃគណៈកម្មាធិការមជ្ឈិមបក្សកុម្មុយនីស្តវៀតណាម និងជាប្រធាននៃសាធារណរដ្ឋសង្គមនិយមវៀតណាម លោក To Lam ព្រមទាំងភរិយា និងគណៈប្រតិភូជាន់ខ្ពស់វៀតណាម នឹងអញ្ជើញទៅបំពេញទស្សនកិច្ចផ្លូវរដ្ឋនៅសាធារណរដ្ឋប្រជាមានិតចិន ចាប់ពីថ្ងៃទី ១៤ ដល់ថ្ងៃទី ១៧ ខែមេសា ឆ្នាំ ២០២៦។

នេះគឺជាទស្សនកិច្ចផ្លូវរដ្ឋលើកដំបូងរបស់អគ្គលេខាបក្ស និងជាប្រធានរដ្ឋ លោក To Lam ក្នុងឋានៈជាអ្នកដឹកនាំខ្ពស់បំផុតរបស់បក្ស និងរដ្ឋ ដែលប្រព្រឹត្តទៅចំពេលមួយឆ្នាំគត់ បន្ទាប់ពីទស្សនកិច្ចផ្លូវរដ្ឋនៅវៀតណាម របស់សមមិត្តអគ្គលេខាបក្ស និងជាប្រធានរដ្ឋ លោក Xi Jinping (ចាប់ពីថ្ងៃទី ១៤ ដល់ថ្ងៃទី ១៥ ខែមេសា ឆ្នាំ ២០២៥) ហើយក៏ជាលើកទី ៣ ក្នុងរយៈពេលដ៏ខ្លីមិនដល់ ២ ឆ្នាំផងដែលសមមិត្តអ្នកដឹកនាំខ្ពស់បំផុតទាំងពីរនៃបក្សទាំងពីរ និងរដ្ឋទាំងពីរ បានបន្តធ្វើទស្សនកិច្ចទ្វេភាគី។

នារសៀលថ្ងៃទី ១៤ ខែមេសា ឆ្នាំ ២០២៥ នៅទីស្នាក់ការមជ្ឈិមបក្ស អគ្គលេខាបក្ស លោក To Lam បានអញ្ជើញធ្វើកិច្ចពិភាក្សាជាមួយអគ្គលេខាបក្ស និងជាប្រធានរដ្ឋចិន លោក Xi Jinping ក្នុងឱកាសអញ្ជើញមកបំពេញទស្សនកិច្ចផ្លូវរដ្ឋនៅវៀតណាម។

ដំណើរទស្សនកិច្ចលើកនេះ មានអត្ថន័យពិសេសបំផុតចំនួន ៣។

ជាបឋម ដំណើរទស្សនកិច្ចនេះបានកំណត់នូវការចាប់ផ្ដើមថ្មីមួយក្នុងទំនាក់ទំនងទ្វេភាគី នៅពេលដែលប្រទេសទាំងពីរបានឈានចូលដំណាក់កាលអភិវឌ្ឍន៍ថ្មី៖ វៀតណាមឈានចូលយុគសម័យអភិវឌ្ឍន៍ថ្មី បន្ទាប់ពីភាពជោគជ័យយ៉ាងត្រចះត្រចង់នៃមហាសន្និបាតបក្សទូទាំងប្រទេសលើកទី ១៤ ចំណែកឯប្រទេសចិនវិញ បានចាប់ផ្ដើមអនុវត្តផែនការអភិវឌ្ឍន៍សេដ្ឋកិច្ច-សង្គម ៥ ឆ្នាំ លើកទី ១៥។ ការដែលភាគីទាំងពីររៀបចំដំណើរទស្សនកិច្ចនេះឡើងក្នុងពេលឆាប់ៗ បានបង្ហាញពីការផ្ដល់អាទិភាពខ្ពស់បំផុត និងការប្តេជ្ញាចិត្តយ៉ាងមុតមាំរបស់ភាគីទាំងពីរ ចំពោះការអភិវឌ្ឍទំនាក់ទំនង "ផងជាសមមិត្ត ផងជាបងប្អូន" ឱ្យកាន់តែរឹងមាំ ស្ថិរភាព និងជាក់ស្តែងជាងមុន នាពេលខាងមុខ។

ទីពីរ ដំណើរទស្សនកិច្ចនេះគឺជាឱកាសដ៏សំខាន់បំផុត ដើម្បីលើកកម្ពស់ការផ្សារភ្ជាប់យុទ្ធសាស្ត្រ និងកំណត់នូវកម្រិតកម្ពស់ថ្មីសម្រាប់ទំនាក់ទំនងរវាងបក្សទាំងពីរ និងរដ្ឋទាំងពីរ។ អ្នកដឹកនាំខ្ពស់បំផុតនៃបក្សទាំងពីរ និងរដ្ឋទាំងពីរ នឹងរួមគ្នាឆ្ពោះទៅរកការកំណត់ទិសដៅថ្មីៗ និងការទម្លុះទម្លាយថ្មីៗ ក្នុងកិច្ចសហប្រតិបត្តិការសេដ្ឋកិច្ច-ពាណិជ្ជកម្ម វិនិយោគ និងទេសចរណ៍ កិច្ចសហប្រតិបត្តិការខ្សែច្រវាក់ផ្គត់ផ្គង់ ខ្សែច្រវាក់ផលិតកម្ម អប់រំបណ្តុះបណ្តាល វិទ្យាសាស្ត្របច្ចេកវិទ្យា និងខិតខំរួមគ្នាដើម្បីសម្រេចបាននូវគោលដៅ និងសេចក្តីប្រាថ្នានៃការអភិវឌ្ឍរបស់ប្រទេសនីមួយៗ។

ទីបី ដំណើរទស្សនកិច្ចនេះនឹងរួមចំណែកពង្រឹងទំនុកចិត្តនយោបាយ ជំរុញបណ្តាដំណោះស្រាយដើម្បីដោះស្រាយបញ្ហាមួយចំនួនដែលនៅមានភាពខុសគ្នា និងការជាប់ជំពាក់ រួមទាំងបង្កើនការផ្លាស់ប្តូររវាងប្រជាជន និងប្រជាជន និងកិច្ចសហប្រតិបត្តិការរវាងមូលដ្ឋាន និងមូលដ្ឋាន ដែលតាមរយៈនោះ រួមចំណែកធ្វើឱ្យទំនាក់ទំនងរវាងប្រទេសទាំងពីរកាន់តែមានស្ថិរភាព រឹងមាំ និងរួមចំណែកយ៉ាងសកម្មដល់សន្តិភាព ស្ថិរភាព និងកិច្ចសហប្រតិបត្តិការក្នុងតំបន់ និងលើសកលលោក។

គេអាចមើលឃើញថា ទំនាក់ទំនងកាន់តែមានស្ថិរភាព ប្រសិទ្ធភាព និងជាក់ស្តែងរវាងប្រទេសទាំងពីរ នឹងរួមចំណែកយ៉ាងសំខាន់ដល់ការសម្រេចបាននូវគោលដៅនៃកំណើន និងការអភិវឌ្ឍរបស់ទាំងវៀតណាម និងចិនក្នុងយុគសម័យថ្មី រួមចំណែករក្សាស្ថិរភាព សន្តិសុខ កិច្ចសហប្រតិបត្តិការ និងការអភិវឌ្ឍ ក្នុងបរិបទដែលស្ថានភាពពិភពលោក និងតំបន់កំពុងមានអស្ថិរភាព និងភាពមិនច្បាស់លាស់នាពេលបច្ចុប្បន្ន។ ហេតុដូច្នេះហើយ ដំណើរទស្សនកិច្ចលើកនេះ ត្រូវបានរំពឹងទុកថានឹងក្លាយជាដំណើរទស្សនកិច្ចដែលមានអត្ថន័យពិសេស បង្កើតនូវនិមិត្តរូប និងបង្កើតកម្លាំងរុញច្រានថ្មីសម្រាប់ទំនាក់ទំនងទ្វេភាគី។

អ្នកយកព័ត៌មាន៖ សូមលោកអនុរដ្ឋមន្ត្រី មេត្តាផ្តល់ការវាយតម្លៃយ៉ាងដូចម្តេច ចំពោះសមិទ្ធផលលេចធ្លោនានាក្នុងទំនាក់ទំនង វៀតណាម-ចិន ក្នុងរយៈពេលកន្លងមកនេះ?

អនុរដ្ឋមន្ត្រីប្រចាំការ លោក Nguyen Minh Vu៖ ទំនាក់ទំនង វៀតណាម-ចិន ក្នុងរយៈពេលកន្លងមក បានរក្សានូវសន្ទុះនៃការអភិវឌ្ឍប្រកបដោយវិជ្ជមាន មានជំហានរីកចម្រើនយ៉ាងច្បាស់លាស់ និងគ្រប់ជ្រុងជ្រោយតាមទិសដៅ "៦ ជាង" (៦ កាន់តែប្រសើរ)។ ចំណុចលេចធ្លោមួយចំនួនរួមមាន៖

ទីមួយ ទំនុកចិត្តនយោបាយរវាងភាគីទាំងពីរត្រូវបានពង្រឹង និងបង្កើន បន្តពង្រីកតួនាទីតម្រង់ទិសយុទ្ធសាស្ត្រ និងដឹកនាំទំនាក់ទំនងទ្វេភាគីឱ្យរីកចម្រើនលើគ្រប់វិស័យ។ ថ្នាក់ដឹកនាំជាន់ខ្ពស់នៃបក្សទាំងពីរ និងរដ្ឋទាំងពីរ បានរក្សានូវការផ្លាស់ប្តូរ និងការជួបប្រាស្រ័យគ្នាជាប្រចាំ តាមរយៈរូបភាពបត់បែនជាច្រើន។ ជាគំរូគឺដំណើរទស្សនកិច្ចផ្លូវរដ្ឋចំនួនពីររបស់អគ្គលេខាបក្ស និងជាប្រធានរដ្ឋ លោក To Lam (ខែសីហា ឆ្នាំ ២០២៤) និងអគ្គលេខាបក្ស និងជាប្រធានរដ្ឋ លោក Xi Jinping (ខែមេសា ឆ្នាំ ២០២៥) ដែលបានប្រព្រឹត្តទៅក្នុងរយៈពេលមិនដល់មួយឆ្នាំផង។

ថ្មីៗបំផុតនេះ ភ្លាមៗបន្ទាប់ពីវៀតណាមបានរៀបចំយ៉ាងជោគជ័យនូវមហាសន្និបាតបក្សទូទាំងប្រទេសលើកទី ១៤ គណៈកម្មាធិការមជ្ឈិមបក្សកុម្មុយនីស្តចិន និងអគ្គលេខាបក្ស លោក Xi Jinping បានមានវិធានការអបអរសាទរជាច្រើនចំពោះមហាសន្និបាត។ អគ្គលេខាបក្ស លោក Xi Jinping ក៏បានធ្វើកិច្ចសន្ទនាតាមទូរស័ព្ទយ៉ាងឆាប់រហ័សជាមួយអគ្គលេខាបក្ស លោក To Lam (ថ្ងៃទី ២៦ ខែមករា) ភ្លាមៗបន្ទាប់ពីមហាសន្និបាតត្រូវបានបញ្ចប់។ សមមិត្តអគ្គលេខាបក្សទាំងពីរ ក៏បានចាត់បញ្ជូនប្រេសិតពិសេសទៅសួរសុខទុក្ខគ្នាទៅវិញទៅមក ដើម្បីអបអរសាទរ និងជម្រាបជូនអំពីលទ្ធផលនៃមហាសន្និបាតបក្សលើកទី ១៤។

លោក Nguyen Minh Vu អនុរដ្ឋមន្ត្រីប្រចាំការនៃក្រសួងការបរទេស

ការផ្លាស់ប្តូរ និងការបញ្ជូនគណៈប្រតិភូជាន់ខ្ពស់ និងគ្រប់ជាន់ថ្នាក់ បានប្រព្រឹត្តទៅយ៉ាងសកម្ម។ បណ្តាយន្តការផ្លាស់ប្តូរ និងកិច្ចសហប្រតិបត្តិការកាន់តែមានលក្ខណៈគ្រប់ជ្រុងជ្រោយ និងសម្បូរបែប ដែលបង្ហាញពីទំនុកចិត្តខ្ពស់ ក៏ដូចជាស្មារតីម្ចាស់ការ និងវិជ្ជមានក្នុងការជំរុញកិច្ចសហប្រតិបត្តិការនយោបាយរវាងប្រទេសទាំងពីរ។ ក្នុងនោះ ចំណុចគំរូគឺភាគីទាំងពីរបានរៀបចំយ៉ាងជោគជ័យនូវកិច្ចប្រជុំលើកទី ១ នៃគណៈកម្មាធិការសហប្រតិបត្តិការរវាងរដ្ឋសភាវៀតណាម និងសភាតំណាងប្រជាជនទូទាំងប្រទេសចិន។ បណ្តាយន្តការសហប្រតិបត្តិការរវាងបក្សទាំងពីរ រដ្ឋសភា រណសិរ្សមាតុភូមិ បណ្តាក្រសួង ស្ថាប័ន និងមូលដ្ឋាននានា ត្រូវបានពង្រឹង និងរក្សាជាប្រចាំ។

ទីពីរ កិច្ចសហប្រតិបត្តិការលើវិស័យការបរទេស ការពារជាតិ និងសន្តិសុខ មាននិមិត្តរូប និងការផ្លាស់ប្តូរជាវិជ្ជមានយ៉ាងជាក់ស្តែង។ អ្វីដែលលេចធ្លោនោះគឺ កាលពីពេលថ្មីៗនេះ ភាគីទាំងពីរបានរៀបចំយ៉ាងជោគជ័យជាលើកដំបូងនូវសម័យប្រជុំលើកទី ១ នៃកិច្ចសន្ទនាយុទ្ធសាស្ត្រ ៣+៣ កម្រិតរដ្ឋមន្ត្រីការបរទេស ការពារជាតិ និងនគរបាល ក្នុងក្របខ័ណ្ឌនៃសម័យប្រជុំលើកទី ១៧ នៃគណៈកម្មាធិការដឹកនាំកិច្ចសហប្រតិបត្តិការទ្វេភាគី វៀតណាម-ចិន។ ក្នុងឱកាសដដែលនេះ ស្ថាប័ននីមួយៗនៃភាគីទាំងពីរបានមានសកម្មភាពសហប្រតិបត្តិការរៀងៗខ្លួន ដូចជាការផ្លាស់ប្តូរយុទ្ធសាស្ត្ររវាងរដ្ឋមន្ត្រីការបរទេសទាំងពីរ ការផ្លាស់ប្តូរមិត្តភាពការពារជាតិព្រំដែនលើកទី ១០ និងសន្និសីទកម្រិតរដ្ឋមន្ត្រីស្តីពីកិច្ចសហប្រតិបត្តិការបង្ក្រាបបទល្មើសលើកទី ៩។

សកម្មភាពសហប្រតិបត្តិការជាប្រចាំរវាងភាគីទាំងពីរត្រូវបានបង្កើន ដូចជាការរៀបចំការល្បាតរួមគ្នារវាងកងទ័ពជើងទឹកលើកទី ៤០ នៅតំបន់សមុទ្រឈូងសមុទ្រតុងកឹង (ខែមីនា ឆ្នាំ ២០២៦) ការរៀបចំការហ្វឹកហ្វឺនរួមគ្នានៃកងទ័ពជើងគោកនៅប្រទេសចិន (ខែកក្កដា ឆ្នាំ ២០២៥)។ កិច្ចសហប្រតិបត្តិការអនុវត្តច្បាប់ និងយុត្តិធម៌ បន្តត្រូវបានពង្រឹង ជាពិសេសក្នុងការប្រយុទ្ធប្រឆាំងនឹងបទល្មើសឆ្លងដែន ការរត់ពន្ធ ការបន្លំមុខរបរពាណិជ្ជកម្ម និងការគ្រប់គ្រងព្រំដែន ដែលតាមរយៈនោះ បង្កើតបាននូវមូលដ្ឋានគ្រឹះដ៏រឹងមាំ ដើម្បីឱ្យកិច្ចសហប្រតិបត្តិការការពារជាតិ និងសន្តិសុខ កាន់តែមានលក្ខណៈជាក់ស្តែង ស្ថិរភាព និងចីរភាពជាងមុន។

ទីបី កិច្ចសហប្រតិបត្តិការជាក់ស្តែងលើគ្រប់វិស័យ ជាពិសេសគឺសេដ្ឋកិច្ច-ពាណិជ្ជកម្ម និងវិនិយោគ បានរក្សានូវសន្ទុះនៃការអភិវឌ្ឍយ៉ាងខ្លាំងក្លា និងក្លាយជាចំណុចភ្លឺស្វាងក្នុងទំនាក់ទំនងរវាងប្រទេសទាំងពីរ។ ក្នុងរយៈពេល ១០ ឆ្នាំជាប់ៗគ្នា វៀតណាមបានរក្សាតំណែងជាដៃគូពាណិជ្ជកម្មធំបំផុតរបស់ចិនក្នុងអាស៊ាន និង ២ ឆ្នាំជាប់គ្នា (២០២៤, ២០២៥) ជាដៃគូពាណិជ្ជកម្មធំទី ៤ របស់ចិននៅលើសកលលោក។ ចំណែកឯប្រទេសចិនវិញ ក៏ជាដៃគូពាណិជ្ជកម្មធំបំផុតរបស់វៀតណាមក្នុងរយៈពេលច្រើនឆ្នាំជាប់ៗគ្នាផងដែរ។ ក្នុងនោះ ក្នុងឆ្នាំ ២០២៥ ទំហំពាណិជ្ជកម្មរវាងវៀតណាម និងចិន សម្រេចបាន ២៥៦,៤ ពាន់លានដុល្លារអាមេរិក កើនឡើង ២៤,៨% បើធៀបនឹងឆ្នាំមុន។

រចនាសម្ព័ន្ធពាណិជ្ជកម្មបន្តត្រូវបានកែលម្អ ដោយមុខទំនិញកសិផល និងជលផលជាច្រើនរបស់វៀតណាមកាន់តែពង្រីកចំណែកទីផ្សារនៅប្រទេសចិន។ កិច្ចសហប្រតិបត្តិការវិនិយោគមានជំហានផ្លាស់ប្តូរពីការពង្រីកបរិមាណ ទៅជាការលើកកម្ពស់គុណភាព ដោយបច្ចុប្បន្នចិនឈរនៅចំណាត់ថ្នាក់ទី ២ លើទុនចុះបញ្ជីសរុបចំនួន ៥,៩៦ ពាន់លានដុល្លារអាមេរិក (បន្ទាប់ពីប្រទេសសិង្ហបុរី) កើនឡើង ៣៣,៤% បើធៀបនឹងឆ្នាំមុន ជាមួយនឹងការលេចឡើងកាន់តែច្រើននូវគម្រោងបច្ចេកវិទ្យាខ្ពស់លើផ្នែកអេឡិចត្រូនិក និងរថយន្តថាមពលថ្មី។ ការតភ្ជាប់យុទ្ធសាស្ត្រ ជាពិសេសគឺហេដ្ឋារចនាសម្ព័ន្ធដឹកជញ្ជូន និងឡូជីស្ទីក (Logistics) សម្រេចបាននូវវឌ្ឍនភាពវិជ្ជមានជាច្រើន។ ភាគីទាំងពីរបានជំរុញការតភ្ជាប់ផ្លូវដែកខ្នាតស្តង់ដារ ការលើកកម្ពស់បណ្តាខ្សែច្រវាក់របៀងសេដ្ឋកិច្ច ព្រមទាំងដាក់ឱ្យអនុវត្តសាកល្បងនូវគំរូច្រកទ្វារព្រំដែនវៃឆ្លាត ដែលរួមចំណែកលើកកម្ពស់ប្រសិទ្ធភាពនៃការធ្វើបញ្ជិកាគយ បន្ថយថ្លៃដើមឡូជីស្ទីក និងពង្រឹងការផ្សារភ្ជាប់ខ្សែច្រវាក់ផ្គត់ផ្គង់ក្នុងតំបន់។

ទីបួន ការផ្លាស់ប្តូររវាងប្រជាជន និងប្រជាជន កិច្ចសហប្រតិបត្តិការលើវិស័យអប់រំ វប្បធម៌ ទេសចរណ៍ និងកិច្ចសហប្រតិបត្តិការរវាងមូលដ្ឋាន និងមូលដ្ឋាន បានប្រព្រឹត្តទៅយ៉ាងសកម្ម។ ក្នុងឆ្នាំ ២០២៥ វៀតណាមបានទទួលស្វាគមន៍ភ្ញៀវទេសចរចិនចំនួន ៥,២៨ លាននាក់ កើនឡើង ៤១,៣% បើធៀបនឹងឆ្នាំមុន និងឈរនៅលំដាប់ថ្នាក់លេខ ១ នៃចំនួនភ្ញៀវទេសចរអន្តរជាតិសរុបដែលមកកាន់វៀតណាម។ ចំនួននិស្សិតវៀតណាមដែលកំពុងសិក្សានៅប្រទេសចិនបានឈានដល់កម្រិតកំណត់ត្រា គឺជិត ២៤.០០០ នាក់ (កើនឡើងទ្វេដងបើធៀបនឹងឆ្នាំ ២០១៩)។

បណ្តាអង្គការមិត្តភាពប្រជាជន និងអង្គការមហាជននៃភាគីទាំងពីរ បាននិងកំពុងអនុវត្តយ៉ាងសកម្មនូវសកម្មភាពផ្លាស់ប្តូរ និងការជួបជុំគ្នា។ សកម្មភាពសហប្រតិបត្តិការ និងការផ្លាស់ប្តូររវាងមូលដ្ឋាននៃប្រទេសទាំងពីរបានប្រព្រឹត្តទៅយ៉ាងរស់រវើក ដែលរួមចំណែកពង្រឹងមូលដ្ឋានគ្រឹះសង្គមរវាងភាគីទាំងពីរឱ្យកាន់តែរឹងមាំ ព្រមទាំងបង្កើនការយល់ដឹង និងលើកកម្ពស់មនោសញ្ចេតនាមិត្តភាពអ្នកជិតខាងរវាងប្រជាជននៃមូលដ្ឋាននៃប្រទេសទាំងពីរ ជាពិសេសគឺជំនាន់វ័យក្មេង។

ទីប្រាំ ភាគីទាំងពីរក៏បានរក្សានូវការសម្របសម្រួល និងកិច្ចសហប្រតិបត្តិការយ៉ាងល្អក្នុងយន្តការពហុភាគីនានា ចែករំលែកទស្សនៈស្តីពីការគាំទ្រពហុភាគីនិយម ដោយមានអង្គការសហប្រជាជាតិជាមជ្ឈមណ្ឌល និងច្បាប់អន្តរជាតិជាមូលដ្ឋានគ្រឹះ គាំទ្រគ្នាទៅវិញទៅមកលើបណ្តាគំនិតផ្ដួចផ្ដើមអភិវឌ្ឍន៍ដ៏សំខាន់ៗ និងគាំទ្រគ្នាទៅវិញទៅមកក្នុងការលើកកម្ពស់តួនាទីវិជ្ជមាននៅតាមវេទិកាពហុភាគីនានា ជាពិសេសគឺនៅអង្គការសហប្រជាជាតិ អាស៊ាន និងមេគង្គ-ឡានឆាង ដើម្បីរួមចំណែករក្សាសន្តិភាព ស្ថិរភាពក្នុងតំបន់ និងលើសកលលោក។

ទីប្រាំមួយ ចំពោះបញ្ហាព្រំដែន និងទឹកដី ស្ថានភាពព្រំដែនគោកជារួមត្រូវបានរក្សាឱ្យមានស្ថិរភាព បណ្តាយន្តការផ្លាស់ប្តូរ ការចរចា និងកិច្ចសហប្រតិបត្តិការរវាងភាគីទាំងពីរលើបញ្ហាសមុទ្រត្រូវបានរក្សាជាប្រចាំ ដោយរួមគ្នាបញ្ជាក់ពីសារៈសំខាន់នៃការគ្រប់គ្រង និងដោះស្រាយការខុសគ្នាឱ្យបានសមស្រប ដែលរួមចំណែករក្សាបរិយាកាសសន្តិភាព ស្ថិរភាព និងការអភិវឌ្ឍក្នុងតំបន់។

ដើម្បីឱ្យទំនាក់ទំនង វៀតណាម - ចិន សម្រេចបាននូវសមិទ្ធផលគ្រប់ជ្រុងជ្រោយ និងជាក់ស្តែងដូចខាងលើ កត្តាសំខាន់បំផុតជាចម្បងនោះគឺ ទំនុកចិត្ត និងការយល់ដឹងពីគ្នាទៅវិញទៅមក រវាងថ្នាក់ដឹកនាំជាន់ខ្ពស់នៃបក្សទាំងពីរ និងរដ្ឋទាំងពីរ រួមជាមួយការរួមដៃគ្នា និងការចូលរួមយ៉ាងសកម្ម ការគាំទ្រយ៉ាងខ្លាំងក្លា និងការខិតខំប្រឹងប្រែងមិនខ្លាចនឿយហត់របស់បណ្តាគណៈ កម្មាធិការ ក្រសួង ស្ថាប័ន មូលដ្ឋាន សហគមន៍អាជីវកម្ម និងប្រជាជននៃប្រទេសទាំងពីរ។

រាល់សមិទ្ធផលដែលសម្រេចបានក្នុងរយៈពេលកន្លងមក មិនត្រឹមតែរួមចំណែកធ្វើឱ្យទំនាក់ទំនងរវាងបក្សទាំងពីរ និងរដ្ឋទាំងពីរកាន់តែស៊ីជម្រៅប៉ុណ្ណោះទេ ប៉ុន្តែថែមទាំងដើរតួនាទីយ៉ាងសំខាន់សម្រាប់ស្ថិរភាព និងការអភិវឌ្ឍក្នុងតំបន់ផងដែរ។ នេះគឺជាមូលដ្ឋានគ្រឹះដ៏រឹងមាំ ដើម្បីឱ្យភាគីទាំងពីរបន្តជំរុញទំនាក់ទំនងទ្វេភាគីឱ្យរីកចម្រើនតាមទិសដៅស្ថិរភាព សុខដុមរមនា ចីរភាព និងយូរអង្វែងនាពេលខាងមុខ ហើយក៏ជាបុព្វបទដ៏សំខាន់ដើម្បីបើកចេញនូវការទម្លុះទម្លាយនានា នាំទំនាក់ទំនងនៃប្រទេសទាំងពីរឈានចូលដំណាក់កាលអភិវឌ្ឍន៍ក្នុងកម្រិតកម្ពស់ថ្មី ជាមួយនឹងកម្លាំងរុញច្រាន និងលំហសហប្រតិបត្តិការថ្មី ក្នុងឱកាសនៃដំណើរទស្សនកិច្ចផ្លូវរដ្ឋនៅប្រទេសចិន របស់អគ្គលេខាបក្ស និងជាប្រធានរដ្ឋ លោក To Lam។

សូមអរគុណយ៉ាងជ្រាលជ្រៅចំពោះលោកអនុរដ្ឋមន្ត្រីប្រចាំការ Nguyen Minh Vu!

វៀតណាម - ចិនបានផ្លាស់ប្តូរបញ្ហាជាច្រើនដែលពាក់ព័ន្ធនឹងសមុទ្រខាងកើតដោយស្មោះត្រង់ យុគសម័យ- នាថ្ងៃទី ២១ ខែកក្កដា លោកឧបនាយករដ្ឋមន្រ្តីនិងជារដ្ឋមន្រ្តីក្រសួងការបរទេស Pham Binh Minh រួមជាមួយសមាជិកនៃក្រុមប្រឹក្សាកិច្ចការរដ្ឋ រដ្ឋមន្រ្តីក្រសួងការបរទេសចិន លោកWang Yi បានអញ្ជើញធ្វើជាសហអធិបតីភាពក្នុងកិច្ចប្រជុំលើកទី ១២ នៃគណៈកម្មាធិការដឹកនាំ កិច្ចសហប្រតិបត្តិការទ្វេភាគីវៀតណាម - ចិន តាយរយៈប្រព័ន្ធវិដេអូ (Video Conference) ។

វៀតណាម - ចិនបានផ្លាស់ប្តូរកិច្ចសហប្រតិបត្តិការទ្វេភាគីរវាងប្រទេសទាំងពីរ យុគសម័យ - អ្នកតំណាងនៃប្រទេសវៀតណាម - ចិនបានផ្លាស់ប្តូរកិច្ចសហប្រតិបត្តិការទ្វេភាគីលើការបង្ការនិងប្រយុទ្ធប្រឆាំងនឹងជំងឺកូវិដ១៩ ស្ថានភាពអន្តរជាតិនិងតំបន់និងបញ្ហាសមុទ្រខាងកើត។

ហេង វុធ្ធី

thoidai.com.vn