ឥទ្ធិពលនៃមេរោគផ្លូវដង្ហើម កូវីដ១៩ បានសម្លាប់វិស័យទេសចរណ៍របស់ប្រទេសកម្ពុជាស្ទើរតែទាំងស្រុង គ្រាន់តែរយៈពេលពី២ទៅ៣ខែប៉ុណ្ណោះ ខណៈប្រទេសនេះរំពឹងខ្លាំងទៅលើទេសចរអន្តរជាតិ។ ទោះយ៉ាងណា ការរើបំរះរបស់វិស័យនេះពីគំនាបកូវីដ១៩ ត្រូវបានជំនួសដោយការធ្វើដំណើរកម្សាន្តរបស់ភ្ញៀវទេសចរក្នុងស្រុក។
មគ្គុទ្ទេសក៍ទេសចរម្នាក់រចាំប្រាសាទអង្គរវត្ត។ (រូបថត៖ Thmey Thmey.com)
វិបត្តិកូវីដ១៩ ធ្វើឱ្យប៉ះពាល់ដល់ការងារមគ្គុទ្ទេសក៍ទេសចរណ៍ រាប់ពាន់នាក់។ ក្នុងកាលៈទេសៈនេះ មគ្គុទ្ទេសក៍មួយចំនួន បានងាកទៅប្រកបរបរផ្សេង ដើម្បីដោះស្រាយជីវភាព ខ្លះក៏បន្តអាជីពនេះ ដោយឱកាសលើទេសចរជនជាតិខ្មែរ។
ប្រាសាទអង្គរវត្តជានិមិត្តរូបដ៏រុងរឿងនៃព្រលឹងជាតិរបស់ប្រជាជនកម្ពុជា។ ទង់ជាតិនៅក្នុងរបបមុនៗ ក៏ដូចទង់ជាតិនៃរបបយើងបច្ចុប្បន្នសុទ្ធតែមានរូបប្រាសាទអង្គរវត្តទាំងអស់ ។ ប្រាសាទអង្គរវត្ត គឺជាអច្ឆរិយវត្ថុដ៏កម្រមួយរបស់មនុស្សជាតិ ព្រោះជាស្នាដៃកំពូលមួយខាងស្ថាបត្យកម្មរបស់មនុស្ស ។
លោក ឆាយ ឈៀត ជាមគ្គុទ្ទេសក៍ទេសចរណ៍ភាសាអង់គ្លេស ប្រចាំប្រាសាទអង្គរវត្ត។ ពីមុន មានតែទេសចរបរទេសប៉ុណ្ណោះ ដែលជួលសេវាកម្មមគ្គុទ្ទេសក៍របស់លោក ឆាយ ឈៀត ពេលពួកគេចង់ដឹងរឿងរ៉ាវនានាក្នុងប្រាសាទអង្គរវត្ត។ តែបច្ចុប្បន្ននេះ ទេសចរក្នុងស្រុក ក៏ចង់ដឹងប្រវត្តិប្រាសា ទ នេះដែរ។
កំពុងអង្គុយនៅក្រោមម្លប់ដើមឈើចំណាស់ មុខប្រាសាទអង្គរវត្ត លោក ឆាយ ឈៀត ប្រាប់ថា ពលរដ្ឋខ្មែរមួយចំនួន ដែលមានជីវភាពសមរម្យ ជួលសេវាកម្មលោក ដើម្បីបកស្រាយប្រវត្តិសាស្ដ្រនានា ទាក់ទងនឹងអង្គរវត្ត។ លោកប្រាប់ថា ថ្ងៃខ្លះលោកអាចនាំភ្ញៀវបាន២ ទៅ៣ក្រុម នៅថ្ងៃធម្មតា និង ៤ ទៅ៥ក្រុម នៅថ្ងៃចុងសប្ដាហ៍ ដែលក្នុងមួយក្រុម លោកអាចរកបាន១០ដុល្លារ បើធៀបនឹងដើរភ្ញៀវបរទេស ដែលលោកធ្លាប់ជូនបាន ១៥ដុល្លារ។
លោក ឆាយ ឈៀត មើលឃើញថា ភ្ញៀវទេសចរជាតិមួយចំនួន បានបង្ហាញការចង់ដឹងប្រវត្តិប្រា សាទ ដែលពីមុនមានតែទេសចរបរទេសប៉ុណ្ណោះ។ មគ្គុទ្ទេសក៍រូបនេះប្រាប់ថា៖« ខ្មែរមកប្រាសាទ គួរតែមានមគ្គុទ្ទេសក៍ ព្រោះខ្លះដើរមើលច្រើនដង តែអត់ដឹងសូម្បីព្រះរាជាដែលកសាងប្រាសាទនោះ គួរតែស្វែងយល់ប្រវត្តិសាស្ដ្រឱ្យច្រើន ព្រោះជាប្រាសាទយើង»៕
（បូកសរុបដោយឌីណា）
មតិពីមិត្តអ្នកអាន