ឥទ្ធិពលជំងឺកូវីដ-១៩ ធ្វើឲ្យរមណីយដ្ឋានអង្គរ ស្ទើរតែលែងមានភ្ញៀវទេសចរទៅហើយ។ របាយការណ៍ពីគ្រឹះស្ថានអង្គរ បង្ហាញថា មកដល់ខែមេសា ឆ្នាំ២០២០ រមណីយដ្ឋានអង្គរ ទទួលបានភ្ញៀវបរទេសតែ៦៥៤នាក់ និងចំណូល បានតែជិត៣ម៉ឺនដុល្លារប៉ុណ្ណោះ ដោយចំនួនភ្ញៀវ ថយចុះ៩៩,៦៤ភាគរយ ហើយចំណូល ថយចុះដល់ទៅ៩៩,៦៥ភាគរយ បើធៀបនឹងខែមេសា ឆ្នាំ២០១៩។
ទិដ្ឋភាពរួមនៃអង្គរ នៅពេលដែលស្ថានភាពនៃការរីករាលដាលនៃជំងឺ Covid-19 មានភាពស្មុគស្មាញ។ (រូបថត៖ Thmey Thmey)
កាលពីមុន ក្នុង១ខែៗ អង្គវត្តទទួលភ្ញៀវទេសចរច្រើនពាន់ម៉ឺននាក់ និងទទួលបានប្រាក់ចំណូលរហូតដល់ច្រើនលានដុល្លារ។ អង្គវត្ត គឺជាគោលដៅទេសចរណ៍ដ៏ល្អបំផុតរបស់កម្ពុជា និងដ៏ល្អរបស់ពិភពលោក។ ក្នុងរយៈពេល៣០ឆ្នាំចុងក្រោយនេះ ក្រៅពីទទួលភ្ញៀវទេសចរជាលក្ខណៈធម្មតា និងទទួលប្រាក់ចំណូល, អង្គវត្ត បានទទួលភ្ញៀវកម្រិតកំពូល ដែលជាថ្នាក់ដឹកនាំរដ្ឋជាច្រើនរូបផងដែរ។
បើគិតរយៈពេល៤ខែ គឺពីខេមករា ដល់ខែមេសា ឆ្នាំ២០២០ កម្ពុជា ទទួលចំណូលបានជិត១៨លានដុល្លារ ពីការលក់បណ្ណជូនភ្ញៀវជាង៣៨ម៉ឺននាក់ សម្រាប់ការចូលទស្សនារមណីយដ្ឋានអង្គរ។ របាយការណ៍របស់គ្រឹះស្ថានអង្គរ បានឲ្យដឹងថា ៤ខែឆ្នាំ២០២០នេះ ចំនួនភ្ញៀវបរទេស ធ្លាក់ចុះ៦០,៥១ភាគរយ ហើយចំណូល ធ្លាក់ចុះ ៥៩,៣៣ភាគរយ បើធៀបនឹងរយៈពេលដូចគ្នា កាលពីឆ្នាំ២០១៩./.
（បូកសរុបដោយឌីណា）
មតិពីមិត្តអ្នកអាន