ប្រធានាធិបតីអាមេរិក លោក ដូណាល់ ត្រាំ បាននិយាយថា លោកពិតជាសប្បាយចិត្ត ក៏ដូចជាស្វាគមន៍ ដែលមេដឹកនាំកូរ៉េខាងជើង លោក គីម ជុងអ៊ុន បង្ហាញមុខជាសាធារណៈឡើងវិញ ដោយមានសុខភាពល្អ។ នេះបើតាមការចេញផ្សាយដោយសារព័ត៌មាន CNA នៅថ្ងៃអាទិត្យ ទី០៣ ខែឧសភា ឆ្នាំ២០២០។
លោក គីម ជុងអ៊ុន បង្ហាញខ្លួនឡើងវិញក្នុងពិធីសម្ពោធរោងចក្រផលិតជីនៅកូរ៉េខាងជើងនាពេលថ្មីៗនេះ ( Yonhap)
លោក ដូណាល់ ត្រាំ ធ្វើការកត់សម្គាល់បែបនេះ នៅក្នុងសារមួយបង្ហោះលើ Twitter កាលពីថ្ងៃសៅរ៍ (ម៉ោងនៅវ៉ាស៊ីនតោន) និងបន្ទាប់លោកគីម បង្ហាញ មុខជាសាធារណៈលើកដំបូង ក្រោយបាត់មុខអស់ជាង២០ថ្ងៃ រហូតដល់បង្កឱ្យមានពាក្យចចាមអារ៉ាមថាមេដឹកនាំកូរ៉េខាងជើងរូបនេះមានបញ្ហាសុខភាព ធ្ងន់ធ្ងរ។ លោក ត្រាំ បានបញ្ជាក់នៅក្នុងសារដ៏ខ្លីខាងលើយ៉ាងដូច្នេះថា៖ «ខ្ញុំពិតជាសប្បាយចិត្ត ដែលឃើញគាត់ត្រឡប់មកវិញ និងមានសុខភាពល្អ»។
គួរជម្រាបថា លោក គីម ជុងអ៊ុន បានបង្ហាញខ្លួនជាសាធារណៈនៅក្នុងកម្មវិធីកាត់ខ្សែបូរសម្ពោធរោងចក្រផលិតជីមួយកន្លែង ហើយប្រជាពលរដ្ឋ ដែលចូលរួមក្នុងកម្មវិធីនោះបានទះដៃអបអរសាទរយ៉ាងខ្លាំង នៅពេលលោក គីម ជុងអ៊ុន បង្ហាញខ្លួន។
រោងចក្រដែលលោក គីម ជុងអ៊ុន បានចូលរួមបើកសម្ពោធខាងលើនេះ គឺជារោងចក្រផលិតជីឈ្មោះ សូជុន (Sunchon Phosphatic Fertilizer)។ កម្មវិធីទាំងមូលត្រូវបានប្រារព្ធឡើងនៅចំថ្ងៃទី០១ ខែឧសភា ដែលត្រូវជាទិវាពលកម្មអន្តរជាតិ ខណៈមនុស្សម្នាទូទាំងពិភពលោកត្រូវបានអនុញ្ញាត ឲ្យឈប់សម្រាក៕
（ហេង វុធ្ធ）
（ប្រភពព័ត៌មាន: FreshNews）
មតិពីមិត្តអ្នកអាន