យុគសម័យ - មន្ត្រីក្រសួងពាណិជ្ជកម្មថៃបានអះអាងថារដ្ឋមន្រ្តីនឹងព្យាយាមបញ្ចប់ការចរចាស្តីពីកិច្ចព្រមព្រៀង RCEP ដោយសង្ឃឹមថាកិច្ចព្រមព្រៀងនេះនឹងជួយជំរុញកំណើនពាណិជ្ជកម្មនៅក្នុងតំបន់។
តំណាំងទាំងឡាយដែលចូលរួមក្នុងការចរចារលើកិច្ចព្រមព្រៀង RCEP លើកទី៨ នៅទីក្រុងប៉េកាំង ប្រទេសចិន (រូបថត៖ Vietnamplus.vn)
នាថ្ងៃទី ២០ ខែសីហា ប្រទេសថៃបានឲ្យដឹងថាថាមន្រ្តីនៃប្រទេសចំនួន ១៦ នៅក្នុងតំបន់អាស៊ីប៉ាស៊ីហ្វិក (រួមទាំងប្រទេសជាសមាជិកអាស៊ានចំនួន ១០ ប្រទេសអូស្ត្រាលី ចិន ឥណ្ឌា ជប៉ុន កូរ៉េខាងត្បូង និងនូវែលសេឡង់) បានសម្តែងនូវការប្តេជ្ញាចិត្តក្នុងការពន្លឿនការចរចាស្តីពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ដោយមានក្តីសង្ឃឹមថានឹងបញ្ចប់កិច្ចព្រមព្រៀងនេះមុនខែវិច្ឆិកាខាងមុខ ក្នុងបរិបទដែលភាពតានតឹងពាណិជ្ជកម្មនិងអស្ថិរភាពសកលោកកំពុងកើនឡើងពីមួយថ្ងៃទៅមួយថ្ងៃ។
ប្រធាននាយកដ្ឋានចរចាពាណិជ្ជកម្មចំណុះក្រសួងពាណិជ្ជកម្មថៃលោកស្រី Auramon Supthaweethum បានថ្លែងថាកិច្ចប្រជុំថ្នាក់រដ្ឋមន្ត្រីសេដ្ឋកិច្ចអាស៊ាននិងកិច្ចប្រជុំថ្នាក់រដ្ឋមន្ត្រី RCEP នឹងត្រូវធ្វើឡើងចាប់ពីថ្ងៃទី ៣ ដល់ ថ្ងៃទី១០ ខែកញ្ញានៅទីក្រុងបាងកក។
គួរឲ្យបញ្ចាក់ថា កិច្ចព្រមព្រៀង RCEP គឺជាកិច្ចព្រមព្រៀងពាណិជ្ជកម្មសេរីក្នុងតំបន់ (FTA) ដែលរួមមានប្រទេសជាសមាជិកអាស៊ានទាំង១០ និងប្រទេសចំនួន ៦ ទៀតដែលអាស៊ានបានចុះហត្ថលេខាលើកិច្ចព្រមព្រៀងពាណិជ្ជកម្មសេរី។ ការចរចាស្តីពីកិច្ចព្រមព្រៀង RCEP ត្រូវបានចាប់ផ្តើមឡើងនាឆ្នាំ ២០១៣ ដោយមានគោលដៅដំបូងគឺបញ្ចប់ការចុះហត្ថលេខាមុនឆ្នាំ ២០១៥ ក៏ប៉ុន្តែ កាលបរិច្ឆេទនៃការកំណត់នេះត្រូវបានពន្យារពេលជាច្រើនដងហើយ។
ប្រសិនបើបានចុះហត្ថលេខាកិច្ចព្រមព្រៀងនេះដោយជោគជ័យ កិច្ចព្រមព្រៀងនេះនឹងត្រូវបាន រំពឹងថានឹងបង្កើតតំបន់ពាណិជ្ជកម្មសេរីធំបំផុតនៅលើពិភពលោក ដែលមានចំនួនប្រជាជនប្រមាណ ៣,៥ ពាន់លាននាក់ និង ៣០% នៃផលិតផលក្នុងស្រុកសរុបនៅលើពិភពលោក។ តួរលេខនេះគឺធំជាងច្រើនដងបើប្រៀបធៀបនឹងកិច្ចព្រមព្រៀង CPTPP ផងដែរ៕
（យោងតាម vietnamplus.vn បកប្រែដោយ ហេង វុធ្ធី）
មតិពីមិត្តអ្នកអាន