អ្វីៗដែលលក់ដូរនៅផ្សារខ្មែរ គឺជាផលិតផលបែបទំនៀមទម្លាប់ខ្មែរ និងរសជាតិបែបខ្មែរ ដូចជា នំបញ្ចុក ត្រីងៀតត្រីប្រលាក់ដែលទិញពីខ្មែរទៅ បង្អែមខ្មែរ បន្លែស្លឹកនិងផ្កាស្ដៅសម្រាប់ធ្វើញាំ និងជាអន្លក់សម្រាប់ទឹកគ្រឿងបែបខ្មែរ ជាដើម។
គេដឹងជាទូទៅអំពីរឿងផ្សារ រ៉ុងក្លឿ នៅក្នុងទឹកដីថៃ ជាប់ព្រំដែនខ្មែរនៅច្រកប៉ោយប៉ែត។ ផ្សារនេះ គេចាត់ទុកដូចជាផ្សារខ្មែរក្នុងដីថៃដែរ ព្រោះអ្នកលក់ភាគច្រើនជាខ្មែរដែលឆ្លងដែនចេញចូលរកស៊ីព្រឹកល្ងាចនៅក្នុងទឹកដីថៃ។
តែឥឡូវនេះ មានផ្សារខ្មែរមួយទៀត នៅក្នុងប្រទេសវៀតណាម គឺនៅទីក្រុងហូជីមីញ។ ប៉ុន្តែ ផ្សារខ្មែរនេះ គឺវៀតណាមជាអ្នកលក់ដូរទេ។
សារព័ត៌មាន VN Expressចុះផ្សាយអត្ថបទរូបភាពមួយ ដោយហៅផ្សារមួយនៅក្នុងស្រុកទី១០ នៃទីក្រុងហូជីមីញ ថាជាផ្សារខ្មែរ ព្រោះតែផ្សារនេះលក់របស់របរប្រើប្រាស់ និងគ្រឿងឧបភោគបរិភោគបែបខ្មែរ។
បើតាមការចុះផ្សាយរបស់សារព័ត៌មានដដែល ផ្សារនេះ ថ្វីត្បិតតែគេដាក់ឈ្មោះថា ផ្សារខ្មែរ ប៉ុន្តែ អ្នកលក់គឺជាជនជាតិវៀតណាមទេ។
ជនជាតិវៀតណាមដែលបង្កើតផ្សារនេះដំបូង គឺជាជនជាតិវៀតណាមដែលធ្លាប់រស់នៅក្នុងទឹកដីកម្ពុជានៅមុនសម័យសង្គ្រាម ប៉ុន្តែ ត្រូវបានភៀសខ្លួន គ្រាដែលកម្ពុជាកើតមានសង្គ្រាមស៊ីវិល កាលពីជាង ៤០ឆ្នាំមុន។
អ្វីៗដែលលក់ដូរនៅទីនេះ គឺជាផលិតផលបែបទំនៀមទម្លាប់ខ្មែរ និងរសជាតិបែបខ្មែរ ដូចជា នំបញ្ចុក ត្រីងៀតត្រីប្រលាក់ដែលទិញពីខ្មែរទៅ បង្អែមខ្មែរ បន្លែស្លឹកនិងផ្កាស្ដៅសម្រាប់ធ្វើញាំ និងជាអន្លក់សម្រាប់ទឹកគ្រឿងបែបខ្មែរ ជាដើម។
សព្វថ្ងៃ ផ្សារនេះរីកកាន់តែធំ មានលក់គ្រឿងឧបភោគបរិភោគរបស់វៀតណាមដែរ ប៉ុន្តែ នៅសល់តូបលក់ប្រមាណ ១៥តូប ដែលលក់អ្វីៗជារបស់បែបខ្មែរសុទ្ធសាធ៕
(សរុបដោយវិច្ឆិកា)
មតិពីមិត្តអ្នកអាន