យុគសម័យ - អ្នកនាំពាក្យក្រសួងការបរទេសវៀតណាម លោកស្រី Le Thi Thu Hang បានឆ្លើយតបអ្នកយកព័ត៌មានវៀតណាមនិងបរទេស ទាក់ទងនឹងការដែល នាវាស្ទង់ប្រេង Haiyang – 8 របស់ចិនវិលត្រឡប់មកធ្វើប្រតិបត្តិការរំលោភលើតំបន់សេដ្ឋកិច្ចផ្តាច់មុខនិងខ្ពង់រាបបាតសមុទ្ររបស់វៀតណាម។
អ្នកនាំពាក្យក្រសួងការបរទេសវៀតណាម លោកស្រី Le Thi Thu Hang (រូបថតៈ TTXVN)
នាថ្ងៃទី ១៦ ខែសីហា អញ្ជើញឆ្លើយសំនួររបស់អ្នកសារព័ត៌មានវៀតណាមនិងបរទេសទាក់ទងនឹងនាវាស្ទង់ប្រេង Haiyang-8 របស់ចិន វិលត្រឡប់មករំលោភលើតំបន់សេដ្ឋកិច្ចផ្តាច់មុខនិងតំបន់ខ្ពង់រាបបាតសមុទ្ររបស់វៀតណាមនោះ អ្នកនាំពាក្យក្រសួងការបរទេសវៀតណាម លោកស្រី Le Thi Thu Hang បានលើកច្បាស់ថា៖ “យោងតាមព័ត៌មានរបស់ស្ថាប័នមានសមត្ថកិច្ចបានឲ្យដឹងថា នៅថ្ងៃទី ១៣ ខែសីហាឆ្នាំ ២០១៩ នាវាស្ទង់ប្រេង Haiyang-8 រួមជាមួយនាវាអមការពារមួយចំនួនរបស់ចិន បានវិលត្រឡប់មកធ្វើប្រតិបត្តិការវិញដែលរំលោភលើតំបន់សមុទ្ររបស់វៀតណាម។
នេះគឺជាតំបន់សមុទ្រក្រោមអធិបតេយ្យភាពនិងយុត្តាធិការរបស់វៀតណាមទាំងស្រុង ដែលត្រូវបានកំណត់តាមបទ ប្បញ្ញត្តិនៃអនុសញ្ញាអង្គការសហប្រជាជាតិ ស្តីពីច្បាប់សមុទ្រឆ្នាំ ១៩៨២។ វៀតណាមក៏បានទាក់ទងជាមួយចិន ដើម្បីជំទាស់ការដែលចិនបានរំលោភបំពានយ៉ាងធ្ងន់ធ្ងរជាថ្មីម្តងទៀតលើតំបន់សមុទ្ររបស់វៀតណាម ព្រមទាំង ស្នើអោយចិនដកនាវាទាំងអស់របស់ខ្លួន ចេញពីតំបន់សមុទ្ររបស់វៀតណាម ដោយគោរពអធិបតេយ្យភាព យុត្តាធិការនិងសិទ្ធិទាំងអស់ក៏ដូចជាផលប្រយោជន៍ស្របច្បាប់របស់វៀតណាម និងអនុលោមតាមអនុសញ្ញារបស់អង្គការសហប្រជាជាតិស្តីពីច្បាប់សមុទ្រក្នុងឆ្នាំ ១៩៨២ និងច្បាប់អន្តរជាតិផងដែរ។
កងកម្លាំងមានសមត្ថកិច្ចគ្រប់ផ្នែករបស់វៀតណាម បន្តអនុវត្តរាល់វិធានការការពារ អធិបតេយ្យភាព សិទ្ធិអធិបតេយ្យភាពនិងសិទ្ធិយុត្តាធិការស្របតាមច្បាប់របស់វៀតណាមនិងច្បាប់អន្តរជាតិ។ វៀតណាមក៏បានបញ្ជាក់នូវការគោរពដ៏ខ្ពង់ ខ្ពស់របស់ខ្លួន ចំពោះសន្តិភាពនិងសន្តិសុខដោយយកច្បាប់ជាចម្បងនៅសមុទ្រខាងកើត។ ម្យ៉ាងវិញទៀត វៀតណាមមានសុឆន្ទៈក្នុងការដោះស្រាយការខ្វែងគំនិតគ្នាតាមរយៈសន្តិវិធី តែងតែគោរពនិងមានបំណងចង់លើកកម្ពស់ទំនាក់ទំនងមិត្តភាពជាមួយចិនដើម្បីប្រយោជន៍របស់ប្រទេសទាំងពីរ ប្រជាជនទាំងពីរនិងដើម្បីសន្តិភាព ស្ថិរភាពនិងសន្តិសុខក្នុងតំបន់និងអន្តរជាតិ ព្រមទាំងប្តេជ្ញាការពារសិទ្ធិនិងផលប្រយោជន៍ស្របច្បាប់និងស្របច្បាប់របស់ខ្លួនជាដាច់ខាត។ វៀតណាមសូមអំពាវនាវដល់បណ្តាប្រទេសពាក់ព័ន្ធនិងសហគមន៍អន្តរជាតិចូលរួមវិភាគទានជាវិជ្ជមានក្នុងការថែរក្សាសន្តិភាព ស្ថិរភាពនិងកិច្ចសហប្រតិបត្តិការនៅសមុទ្រខាងកើត តំបន់និងអន្តរជាតិ"៕
(យោងតាម baotintuc.vn បកប្រែដោយ ស្រីព្រេជ)
មតិពីមិត្តអ្នកអាន