យុគសម័យ - ពីបទពិសោធន៍ជាក់ស្តែងនៃការគ្រប់គ្រងជំងឺល្អរបស់វៀតណាម លោកនាយករដ្ឋមន្រ្តី Nguyen Xuan Phuc បានចែករំលែក ជាមួយថ្នាក់ដឹកនាំនៃបណ្តាប្រទេស G20 នូវវិធានការណ៍ជាច្រើន ក្នុងការជំរុញកិច្ចសហប្រតិបត្តិការនិងសកម្មភាពរួមគ្នា ក្នុងការបង្ការនិងទប់ទល់នឹងជំងឺ Covid-19 ។
ទិដ្ឋភាពរួមនៃកិច្ចប្រជុំ G20 ស្តីពី Covid-19 តាមរយៈប្រព័ន្ធអនឡាញ។
កិច្ចប្រជុំកំពូល G20 ស្តីពីការបង្ការនិងទប់ទល់នឹងជំងឺ Covid-19 បានធ្វើឡើងចាប់ពីម៉ោង ៧ យប់ដល់ម៉ោង ៩ យប់ថ្ងៃទី ២៦ ខែមីនា (តាមម៉ោងនៅវៀតណាម) តាមគំនិតផ្តួចផ្តើមរបស់ប្រធាន G20 ប្រទេស Saudi Arabia។
នេះគឺជាកិច្ចប្រជុំកំពូលពិសេសរបស់ G20 ក្នុងបរិបទនៃជំងឺរាតត្បាតដែលកំពុងរីករាលដាលទូទាំងសកលលោក ដែលមានឥទ្ធិពលយ៉ាងជ្រាលជ្រៅនិងទៅលើពហុវិស័យ ៖សេដ្ឋកិច្ចពិភពលោក ក៏ដូចជាស្ថេរភាពនិងការអភិវឌ្ឍរបស់ប្រទេសជាច្រើន។
អញ្ជើញចូលរួមក្នុងកិច្ចប្រជុំនេះតាមរយៈប្រព័ន្ធអនឡាញ មានថ្នាក់ដឹកនាំជាន់ខ្ពស់នៃប្រទេសជាសមាជិក G20 និងប្រទេស ថ្នាក់ដឹកនាំនៃអង្គការអន្តរជាតិធំមួយចំនួនក៏បានអញ្ជើញចូលរួមដែរ ដូចជាអង្គការសហប្រជាជាតិធនាគារពិភពលោក (WB) មូលនិធិរូបិយវត្ថុអន្តរជាតិ (IMF), អង្គការពាណិជ្ជកម្មពិភពលោក (WTO) អង្គការសុខភាព ពិភពលោក (WHO) អង្គការសហប្រតិបត្តិការ និង អភិវឌ្ឍន៍សេដ្ឋកិច្ច (OECD), អង្គការពលកម្មអន្តរជាតិ (ILO) ...
អង្គប្រជុំនេះបានអនុម័តសេចក្តីថ្លែងការណ៍រួម G20 ស្តីពីការបង្ការនិងទប់ទល់នឹងជំងឺ Covid-19 ដែលបង្ហាញពីការប្តេជ្ញាចិត្តនយោបាយ ការប្តេជ្ញាចិត្តខ្ពស់និងសាមគ្គីភាពក្នុងបង្ការនិងទប់ទល់នឹងជំងឺ Covid-19 ក៏ដូចជាជំរុញការអភិវឌ្ឍសេដ្ឋកិច្ចពិភពលោកប្រកបដោយចីរភាព។
លោកនាយករដ្ឋមន្រ្តី Nguyen Xuan Phuc បានអះអាងថាសាមគ្គីភាព កិច្ចសហប្រតិបត្តិការនិងការសម្របសម្រួលមានសារៈសំខាន់ណាស់។ លោកនាយករដ្ឋមន្រ្តី បញ្ជាក់ការប្តេជ្ញាចិត្ត និងការប្តេជ្ញាចិត្តរបស់ប្រទេសវៀតណាមក្នុងការប្រយុទ្ធប្រឆាំងនឹងការរីករាលដាលនៃជំងឺ Covid-19 ។ លោកនាយករដ្ឋមន្រ្តី Nguyen Xuan Phuc បានសង្កត់ធ្ងន់លើការអនុវត្តគោលដៅទាំង ២ របស់ខ្លួនក្នុងការគ្រប់គ្រងនូវការរីករាលដាលនៃជំងឺ Covid-19 និងបន្តការអភិវឌ្ឍន៍សេដ្ឋកិច្ចនិងសន្តិសុខសង្គម។
លោកនាយករដ្ឋមន្រ្តីក៏បានបញ្ជាក់ថា ប្រទេសវៀតណាមក្នុងនាមជាប្រធានអាស៊ាន ២០២០ បាននឹងកំពុងធ្វើការជាមួយបណ្តាប្រទេសអាស៊ាន ដើម្បីលើកកម្ពស់ស្មារតីសហគមន៍ "ការរួបរួមគ្នានិងការបន្សាំយ៉ាងសកម្ម" ដើម្បីអនុវត្តយ៉ាងម៉ឺងម៉ាត់នូវវិធានការណ៍នានា និងសម្របសម្រួលសកម្មភាពប្រឆាំងនឹងជំងឺ Covid-19។ ទន្ទឹមនឹងនេះ វៀតណាម តែងតែចែករំលែកព័ត៌មាននិងបទពិសោធន៍ជាមួយបណ្តាប្រទេស G20 និងបណ្តាប្រទេសជាដៃគូផ្សេងៗទៀត។
លោកនាយករដ្ឋមន្រ្តីបានស្វាគមន៍ចំពោះតួនាទីដ៏សំខាន់និងការចូលរួមចំណែកយ៉ាងសកម្មរបស់ G20 ក៏ដូចជា អង្គការអន្តរជាតិ ដូចជាអង្គការសហប្រជាជាតិ WHO, WB, IMF, WTO ក្នុងការប្រយុទ្ធប្រឆាំងនឹង Covid-19។
ការចូលរួមនិងការចែករំលែកវិធានការរឹងមាំនិងខ្លាំងក្លា ដើម្បីជំរុញកិច្ចសហប្រតិបត្តិការរបស់លោកនាយករដ្ឋមន្រ្តី Nguyen Xuan Phuc នៅឯកិច្ចប្រជុំកំពូល G20 តាមរយៈប្រព័ន្ធអនឡាញ ដែលបានបញ្ជាក់ពីការគាំទ្រ និងកិច្ចសហប្រតិបត្តិការរបស់វៀតណាម ជាមួយបណ្តាប្រទេស G20 និងសហគមន៍ជាតិ ក្នុងការប្រយុទ្ធប្រឆាំងនិងជំងឺ Covid-19។ អ្វីៗ ទាំងនេះបង្ហាញថា វៀតណាមជាសមាជិកសកម្មនិងមានការចូលរួមប្រកបដោយទំនួលខុសត្រូវក្នុងការពង្រឹងកិច្ចសហប្រតិបត្តិការពិភពលោក សម្រាប់ការបន្សាំទៅនឹងបញ្ហាប្រឈមរួម./.
(បកប្រែដោយឌីណា)
មតិពីមិត្តអ្នកអាន