យុគសម័យ - នារសៀលថ្ងៃទី៤ ខែតុលា នៅទីស្នាក់ការវិទ្យុសម្លេងវៀតណាម រដ្ឋធានីហាណូយ អគ្គនាយករងវិទ្យុសម្លេងវៀតណាមលោក Vu Hai បានទទួលជួបពិភាក្សារជាមួយគណៈប្រតិភូនៃក្លឹបអ្នកកាសែតកម្ពុជាដឹកនាំដោយលោក ពុយ គា អគ្គលេខាធិការនៃក្លឹបអ្នកកាសែតកម្ពុជាផងដែរ។
អគ្គនាយករង VOV លោក Vu Hai និងអគ្គលេខាធិការនៃក្លឹបអ្នកកាសែតកម្ពុជាលោក ពុយ គា រួមទាំងគណៈប្រតិភូនៃភាគីទាំងពីរ (រូបថត៖ VOV)
នៅក្នុងជំនួបនេះ លោក Vu Hai បានធ្វើការឧទ្ទេសនាមអំពីវិទ្យុសម្លេងវៀតណាម។ មុននេះ វិទ្យុសម្លេងវៀតណាមត្រឹមតែជាវិទ្យុរ៉ាឌីយ៉ូតែប៉ុណ្ណោះ ប៉ុន្តែនាបច្ចុប្បន្នបានក្លាយទៅជាស្ថាប័នសារព័ត៌មានពហុមេឌា ដោយមានបណ្តាញផ្សាយសម្លេងចំនួន១៧ បណ្តាញទូរទស្សន៍ចំនួន៨ កាសែតអេឡិចត្រូនិកចំនួន២និងកាសែតបោះពុម្ភ១ទៀតផង។ អគ្គនាយករងនៃវិទ្យុសម្លេងវៀតណាមលោក Vu Hai បានឲ្យដឹងថា៖ “នាបច្ចុប្បន្ន វិទ្យុសម្លេងវៀតណាមកំពុងផ្សាយរលកធាតុអាកាសចម្ងាយខ្លី ចម្ងាយមធ្យម។ វិទ្យុសម្លេងវៀតណាមក៏មានកម្មវិធីផ្សាយជាភាសាបរទេសចំនួន១២ ក្នុងនោះមានកម្មវិធីផ្សាយជាភាសាខ្មែរដែរ។ វិទ្យុក៏បានបើកស្ថាប័នតំណាងអចិន្ត្រៃយ៍នៅឯបរទេស ក្នុងនោះមានស្ថាប័នតំណាងអចិន្ត្រៃយ៍នៅព្រះរាជាណាចក្រកម្ពុជា។ ចំពោះកិច្ចសហប្រិតបត្តិការអន្តរជាតិនោះគឺ វិទ្យុសម្លេងវៀតណាមមានទំនាក់ទំនងជាមួយវិទ្យុសម្លេងនិងទូរទស្សន៍ចំនួន៦០និងអង្គការផ្សាយសម្លេងនិងទូរទស្សន៍ជាច្រើនទៀតលើទូទាំងពិភពលោក ព្រមទាំងជាសមាជិកសកម្មមួយនៃសមាគមន៍ផ្សាយសម្លេងនៅតំបន់អាស៊ី ប៉ាស៊ីហ្វិក”។
រីឯខ្លួនវិញ អគ្គលេខាធិការនៃក្លឹបអ្នកសារព័ត៌មានកម្ពុជាលោក ពុយ គា បានឲ្យដឹងថា ក្លឹបអ្នកកាសែតកម្ពុជាត្រូវបានបង្កើតឡើងក្នុងរយៈពេល១៨ឆ្នាំកន្លងមក។ នាបច្ចុប្បន្ន ក្លឹបមានសមាជិកប្រមាណ៣៤១នាក់។ លោក ពុយ គា ក៏បានសម្ដែងនូវក្ដីសប្បាយរីករាយដោយបានទៅទស្សនានិងជួបធ្វើការជាមួយវិទ្យុសម្លេងវៀតណាម ដើម្បីអាចសិក្សារៀនសូត្របទពិសោធន៍នៃវិទ្យុសម្លេងវៀត ណាមផងដែរ ។
មុននោះ នៅថ្ងៃទី៤ខែតុលានេះ លោក Ho Quang Loi អនុប្រធានប្រចាំការនៃសមាគមអ្នកកាសែតវៀតណាម បានចុះហត្ថលេខាលើអនុស្សារណៈយោគយល់ស្តីពីសហប្រតិបត្តិការនៃសមាគមអ្នកកាសែតទាំងពីរ ជាមួយ លោក ពុយ គា ដែលជាអគ្គលេខាធិការនៃក្លឹបអ្នកកាសែតកម្ពុជា ហើយកំពុងដឹកនាំប្រតិភូអ្នកកាសែតកម្ពុជានៅក្នុងទីក្រុងហាណូយ។
នៅក្នុងជំនួបនេះ ប្រធានប្រតិភូក្លឹបអ្នកកាសែតកម្ពុជា លោក ពុយ គា បានមានប្រសាសន៍ថា អ្នកកាសែតកម្ពុជា និងអ្នកកាសែតវៀតណាមមួយចំនួនធ្លាប់បានស្គាល់គ្នាជាលក្ខណៈបុគ្គលហើយ។ ប៉ុន្តែលោកបន្តថា បន្ទាប់ពីការចុះហត្ថលេខាផ្តើមកិច្ចសហប្រតិបត្តិការនេះទៅ ការទំនាក់ទំនងគ្នារវាងអ្នកកាសែតនៃប្រទេសទាំងពីរត្រូវបានដំឡើងដល់ថ្នាក់ស្ថាប័ន ដែលនឹងពង្រីកថែមទៀតនៃសាមគ្គីភាព និងកិច្ចសហការរវាងអ្នកកាសែតទាំងពីរប្រទេស។
លោក ពុយ គា បានបន្ថែមយ៉ាងដូច្នេះថា៖«មិនត្រឹមតែក្នុងក្របខណ្ឌនៃអាជីពសារព័ត៌មាននោះទេ ចាប់ពីពេលនេះទៅសមាគមអ្នកកាសែតទាំងពីរប្រទេសនឹងលើកទឹកចិត្តឲ្យមានការសរសេរអត្ថបទដែលជំរុញការវិនិយោគរវាងប្រទេសទាំងពីរ»៕
（សរុបព័ត៌មាន ដោយ ស្រីព្រេជ）
មតិពីមិត្តអ្នកអាន