សម្តេច ហេង សំរិន អញ្ជើញទៅប្រទេសវៀតណាមចូលរួមពិធីគោរពវិញ្ញាណក្ខ័ន្ធ ឯកឧត្តម ឡេ ខាភៀវ (LE KHA PHIEU)

ឯកឧត្តម ឯកអគ្គរដ្ឋទូត វ៉ូ ក្វាង មិញ ជូនដំណើរ សម្តេច ហេង សំរិន អញ្ជើញទៅប្រទេសវៀតណាមចូលរួមពិធីគោរពវិញ្ញាណក្ខ័ន្ធ ឯកឧត្តម ឡេ ខាភៀវ ។

នាម៉ោង ០៦:៣០នាទី ព្រឹកថ្ងៃទី១៥ ខែសីហា ឆ្នាំ២០២០ ឯកឧត្តម ឯកអគ្គរដ្ឋទូតនៃសាធារណៈរដ្ឋសង្គមនិយមវៀតណាមប្រចាំនៅព្រះរាជាណាចក្រកម្ពុជាបានជូនដំណើរ សម្តេច ហេង សំរិន ប្រធានកិត្តិយសគណបក្សប្រជាជនកម្ពុជា ប្រធានរដ្ឋសភានៃព្រះរាជាណាចក្រកម្ពុជា អញ្ជើញទៅប្រទេសវៀតណាមចូលរួមពិធីគោរពវិញ្ញាណក្ខ័ន្ធ ឯកឧត្តម ឡេ ខាភៀវ អតីតអគ្គលេខាធិការមជ្ឈឹមបក្សកុម្មុនីស្តវៀតណាមនៅអាកាសយានដ្ឋានអន្តរជាតិភ្នំពេញ។

អមដំណើរសម្តេច ហេង សំរិន លើកនេះមានវត្តមានរបស់ថ្នាក់ដឹកនាំគណបក្សប្រជាជនកម្ពុជាជាច្រើនរូប ដែលក្នុងនោះរួមមានលោកជំទាវ ម៉ែន សំអន ប្រធានគណៈចលនាមហាជន និងជាឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចនៃព្រះរាជាណាចក្រកម្ពុជា។

ក្រៅពីចូលរួមកម្មវិធីគោរពវិញ្ញាណក្ខ័ន្ធ សម្តេច ហេង សំរិន នឹងជួបសវនាការជាមួយលោកជំទាវ ង្វៀន ធី គីម ងិន (NGUYEN THI KIM NGAN) ប្រធានរដ្ឋសភាវៀតណាមនៅទីស្នាក់ការរដ្ឋសភាវៀតណាមដើម្បីជួបពិភាក្សាការងារអំពីការជំរុញកិច្ចសហប្រតិបតិ្តការនានារវាងប្រទេសទាំងពីរកម្ពុជា-វៀតណាម ជាពិសេសកិច្ចសហប្រតិបត្តិការរវាងស្ថាប័ននីតិបញ្ញាត្តិទាំងពីរ។

មុននោះ ក្នុងសាររំលែកទុក្ខផ្ញើជូនលោកជំទាវប្រធានរដ្ឋសភាវៀតណាម ង្វៀន ធី គីម ងិន អំពីការទទួលមរណភាពរបស់ ឯកឧត្តម ឡេ ខាភៀវ សម្តេច ហេង សំរិនបានវាចា៖ “មរណភាពរបស់ ឯកឧត្តម ឡេ ខាភៀវ គឺជាការបាត់បង់ដ៏ធំធេងនៃថ្នាក់ដឹកនាំដ៏ឆ្នើមនិងឈ្លាសវៃរបស់បក្ស រដ្ឋនិងប្រជាជនវៀតណាម ក៏ដូចជាការបាត់បង់មិត្តដ៏ល្អរបស់កម្ពុជាដែល ឯកឧត្តម ធ្លាប់បានរួមចំណែកស្តា កសាង អភិវឌ្ឈន៍ និងចូលរួមយ៉ាងសកម្មក្នុងការជំរុញលើកកម្ពស់ទំនាក់ទំនង និងសហប្រតិបត្តិការយ៉ាងជិតស្និទ្ធ ក្នុងស្មារតីមិត្តភាព សាមគី្គភាព ជាមួយកម្ពុជា”។

បើតាមការគ្រោងទុក គណៈប្រតិភូគណបក្សប្រជាជនកម្ពុជានឹងវិលត្រឡប់មកប្រទេសកម្ពុជាវិញនៅក្នុងថ្ងៃដដែល៕

（យោងតាមស្ថានទូតវៀតណាមប្រចាំកម្ពុជា）

（យោងតាមស្ថានទូតវៀតណាមប្រចាំកម្ពុជា）