យុគសម័យ - នារសៀលថ្ងៃទី ៤ ខែមិថុនា នៅទីស្នាក់ការក្រសួងការបរទេស ឧបនាយករដ្ឋមន្រ្តី រដ្ឋមន្រ្តីក្រសួងការបរទេស លោក Pham Binh Minh បានអញ្ជើញទទួលជួបជាមូយឯកអគ្គរាជទូតជប៉ុនលោក Yamada Takio អញ្ជើញមកចូលជួបសំដែងការគួរសមក្នុងឱកាសទទួលបេសកកម្មនៅវៀតណាម។
ឧបនាយករដ្ឋមន្ត្រីលោក Pham Binh Minh អញ្ជើញទទួលជួបជាមួយឯកអគ្គរាជទូតជប៉ុនលោក Yamada Takio
នៅក្នុងជំនួបនេះ លោកឧបនាយករដ្ឋមន្រ្តីបានជឿជាក់ថា ជាមួយនឹងបទពិសោធន៍ការទូតដ៏សំបូរបែប ឯកអគ្គរាជទូតនឹងអញ្ជើញចូលរួមវិភាគទានជាច្រើនដល់ទំនាក់ទំនងភាពជាដៃគូយុទ្ធសាស្ត្រយ៉ាងទូលំទូលាយរវាងវៀតណាមនិងជប៉ុន ដែលធ្លាប់មានភាពល្អប្រពៃរវាងប្រទេសទាំងពីរ។
ក្នុងរយៈពេលកន្លងមក មេដឹកនាំនៃប្រទេសទាំងពីរបានធ្វើការសន្ទនាតាមទូរស័ព្ទដើម្បីពិភាក្សាអំពីកិច្ចសហប្រតិបត្តិការបង្ការទប់ស្កាត់នឹងជំងឺរាតត្បាត COVID-19 ក៏ដូចជាការជំរុញការផ្លាស់ប្តូរសេដ្ឋកិច្ចនិងរវាងប្រទេសទាំងពីរនាពេលខាងមុខនេះ ដែលក្នុងនោះ រួមទាំងកិច្ចសន្ទនាតាមទូរស័ព្ធនៃនាយករដ្ឋមន្រ្តីលោក Nguyen Xuan Phuc និងនាយករដ្ឋមន្រ្តីលោក Abe Shinzo។ រវាងឧបនាយករដ្ឋមន្រ្តី រដ្ឋមន្រ្តីក្រសួងការបរទេសលោក Pham Binh Minh និងរដ្ឋមន្រ្តីក្រសួងការបរទេសជប៉ុនលោក Motegi Toshimitsu។
លោកឧបនាយករដ្ឋមន្រ្តីបានមានប្រសាសន៍ថា ឯកអគ្គរាជទូតបានទទួលបេសកកម្មក្នុងបរិបទដែលប្រទេសទាំងពីរបានគ្រប់គ្រងយ៉ាងល្អនូវការឆ្លងរាលដាលនៃជំងឺរាតត្បាត COVID-19 វៀតណាមកំពុងទទួលតួនាទីជាប្រធានអាស៊ាននិងសមាជិកមិនអចិន្រ្តៃយ៍នៃក្រុមប្រឹក្សាសន្តិសុខអង្គការសហប្រជាជាតិ។ ទាំងនេះគឺជាលក្ខខណ្ឌអំណោយផលសម្រាប់ប្រទេសទាំងពីរបន្តជំរុញកិច្ចសហប្រតិបត្តិការទ្វេភាគីនិងពហុភាគី។
ក្នុងឱកាសនេះ ឧបនាយករដ្ឋមន្រ្តីលោក Pham Binh Minh បានថ្លែងអំណរគុណចំពោះការគាំទ្រនិងជំនួយរបស់ជប៉ុនក្នុងការប្រយុទ្ធប្រឆាំងនឹងជំងឺរាតត្បាត COVID-19 ក៏ដូចជាមូលនិធិ ODA របស់ជប៉ុនដល់វៀតណាមក្នុងរយៈពេលប៉ុន្មានឆ្នាំចុងក្រោយនេះ។
លោកឯកអគ្គរាជទូត Yamada Takio បានសម្តែងការសប្បាយរីករាយនៅពេលដែលលោកបានមកទទួលបេសកកម្មនៅវៀតណាម ដោយបានវាយតម្លៃខ្ពស់ចំពោះប្រសិទ្ធភាពនៃវិធានការណ៍បង្ការនិងទប់ស្កាត់នឹងជំងឺរាតត្បាត COVID-19 របស់វៀតណាម។ ព្រមជាមួយគ្នានេះ លោកបានអះអាងថា លោកនឹងខិតខំប្រឹងប្រែងអស់កម្លាំងកាយដើម្បីជំរុញទំនាក់ទំនងរវាងប្រទេសទាំងពីរអភិវឌ្ឍនិងកាន់តែប្រសើរឡើង៕(បកប្រែដោយសាមេត)
(ប្រភពព័ត៌មាន: baochinhphu.vn)
មតិពីមិត្តអ្នកអាន