សហរដ្ឋអាមេរិក បានផ្តល់ជំនួយបន្ថែមទំហំ ១,៥លានដុល្លារដល់កម្ពុជា ដើម្បីជួយប្រយុទ្ធប្រឆាំងជំងឺកូវីដ១៩ ដែលពិធីនេះធ្វើនៅ ថ្ងៃទី២៧ ខែមេសា ឆ្នាំ២០២០ នៅទីស្តីការក្រសួងសុខាភិបាល។
ទិដ្ឋភាពនៃពិធីប្រគល់សម្ភារៈបរិក្ខារពេទ្យ។ (រូបថត៖ cen.com.khmer)
ឯកឧត្ដមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងលោកជំទាវ ឯកឧត្តមថ្នាក់ដឹកនាំក្រសួង បានអញ្ជើញក្នុងពិធីប្រគល់-ទទួលអំណោយរបស់រដ្ឋាភិបាលសហរដ្ឋអាមេរិក ពីឯកឧត្តម Patrick W.Murphy ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា ជូនដល់រាជរដ្ឋាភិបាលកម្ពុជា។
ទន្ទឹមនឹងនោះ រដ្ឋមន្ដ្រីក្រសួងសុខាភិបាលកម្ពុជា ឯកឧត្តម សាស្ដ្រាចារ្យ ម៉ម ប៊ុនហេង បាន ថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនសហរដ្ឋអាមេរិក ដែលបានផ្ដល់ជំនួយដ៏ថ្លៃថ្លានេះ ដែលបញ្ជាក់ពីចំណងសាមគ្គីភាព មិត្ដភាព និងកិច្ចសហប្រតិបត្ដិការកម្ពុជា-សហរដ្ឋអាមេរិក ដើម្បីជំរុញវិធានការការពារ ទប់ស្កាត់ និងឆ្លើយតបការរាតត្បាតនៃជំងឺកូវីដ១៩ ឱ្យបានកាន់តែឆាប់រហ័ស ជាពិសេស គឺការរំលឹកខួបទី៧០ឆ្នាំ នៃទំនាក់ទំនងការទូតរវាងប្រទេសទាំងពីរ។
ឯកអគ្គរដ្ឋទូតអាមេរិក ឯកឧត្តម W.Patrick Murphy បានថ្លែងថា ចាប់ពីកម្ពុជាទទួលរងការផ្ទុះមេរោគកូវីដ១៩ដំបូង រហូតដល់ថ្ងៃទី២៧ ខែមេសា ឆ្នាំ២០២០នេះ រដ្ឋាភិបាលសហរដ្ឋអាមេរិក បានផ្តល់ជំនួយដល់ប្រព័ន្ធសុខាភិបាលកម្ពុជា សរុប ៣,៥លានដុល្លារ ក្នុងការគ្រប់គ្រងអ្នកជំងឺ ថែទាំអ្នកជំងឺ ការពារកុំឱ្យមានការឆ្លង ការធ្វើការអង្កេត ការឆ្លើយតបរហ័ស ផ្តល់អ្នកជំនាញសហរដ្ឋអាមេរិកធ្វើការបណ្តុះបណ្តាល និងគាំទ្រដល់ក្រុមឆ្លើយតបរហ័ស ស្វែងរកអ្នកប៉ះពាល់ជាដើម ដើម្បីជួយទប់ស្កាត់ការរាលដាលនៃជំងឺកូវីដ១៩នៅកម្ពុជា។
ឯកអគ្គរដ្ឋទូតក៏បានវាយតម្លៃខ្ពស់ចំពោះរដ្ឋាភិបាលប្រជាជនកម្ពុជានិងជាពិសេសក្រុមវេជ្ជបណ្ឌិតនិងគ្រូពេទ្យ ដែលបានទប់ស្កាត់នឹងការរីករាលដាលនៃជំងឺ Covid-19 ប្រកបដោយប្រសិទ្ធភាពហើយសង្ឃឹមថាក្នុងរយៈពេលខាងមុខប្រទេសទាំងពីរកម្ពុជា - អាមេរិកនឹងពង្រឹងបន្ថែមទៀតនូវកិច្ចសហប្រតិបត្តិការ ជាពិសេសក្នុងវិស័យសុខាភិបាល។
រដ្ឋមន្ត្រីក្រសួងសុខាភិបាល ថ្លែងថា ជំនួយដែលសហរដ្ឋអាមេរិកផ្តល់ដល់កម្ពុជា ជាផ្នែកមួយជួយកម្ពុជាឱ្យទាន់ពេលវេលា ដើម្បីទប់ស្កាត់ជំងឺកូវីដ១៩ ឱ្យមានប្រសិទ្ធភាពខ្ពស់។ សហរដ្ឋអាមេរិកផ្តល់ជំនួយដ៏សំខាន់ រួមគ្នាដើម្បីពង្រឹងប្រព័ន្ធសុខាភិបាលកម្ពុជា ពង្រឹងសមត្ថភាពធនធានមនុស្ស./.
(បូកសរុបដោយឌីណា)
មតិពីមិត្តអ្នកអាន