ក្រៅពីមានតំបន់ទេសចរណ៍ប្រវត្តិសាស្រ្តនិងទីកន្លែងកម្សាន្តធម្មជាតិជាច្រើននោះទឹកដីដ៏ស៊ីវីល័យនៅទិសពាយព្យជាប់ព្រំប្រទល់កម្ពុជា-ថៃខេត្តបន្ទាយមានជ័យ នៅមានរមណីយដ្ឋានទេសចរណ៍ដែលទើបកែច្នៃដោយដៃកូនកសិកររស់នៅទីនោះឈ្មោះថា តំបន់ទេសចរណ៍ធម្មជាតិកែច្នៃ «សួន ស្នេហ៍ជនបទ» ស្ថិតនៅក្នុងភូមិកូនខ្លា សង្កាត់កំពង់ស្វាយ ក្រុងសិរីសោភណ្ឌ ខេត្តបន្ទាយមានជ័យ។ សួន ស្នេហ៍ជនបទ គឺជាទីកន្លែងសម្រាកលំហែកាយនាថ្ងៃចុងសប្ដាហ៍ដ៏ពេញនិយម របស់ប្រជាពលរដ្ឋមកពីគ្រប់ទិសទី។ នេះបើតាមលោក ប៊ុន សុង អ្នកគ្រប់គ្រងទូទៅ របស់រមណីយដា្ននកែច្នៃ សួន ស្នេហ៍ជនបទ។
ទីកន្លែងមួយនៃរមណីយដា្ននកែច្នៃ សួន ស្នេហ៍ជនបទ។ (រូបថត៖ Thmey Thmey.com)
លោក ប៊ុន សុង បានប្រាប់ថា៖«ជាមធ្យមមានភ្ញៀវទេសចរប្រមាណ១០០នាក់ ទៅ២០០នាក់ បានមកលេងកម្សាន្តនៅទីនេះចំពោះថ្ងៃធម្មតា។ចំណែកឯនៅថ្ងៃចុងសប្ដាហ៍វិញ អាចនឹងមានចំនួនច្រើនជាងនេះទ្វេដង។»
លោកបានបន្តទៀតថា ភ្ញៀវភាគច្រើន ជាអ្នកមកពីបណ្ដាខេត្តឆ្ងាយៗ និងមិនសូវមានភ្ញៀវបរទេសនោះទេ។ ប៉ុន្តែមុនពេលកូវីដ-១៩មកដល់ សួនស្នេហ៍ជនបទ ធ្លាប់មានជនបរទេសមកលេងកម្សាន្តច្រើន មិនចាញ់ភ្ញៀវខ្មែរនោះឡើយ។
ក្រៅតែពីសម្រស់ដ៏ស្រស់ត្រកាល ទេសភាពល្អត្រជាក់ភ្នែក សួននេះមានផ្ដល់សេវាកម្មច្រើនប្រភេទដល់ភ្ញៀវទេសចរដូចជា សេវាកម្មចំណីអាហារ ទីកន្លែងកម្សាន្តសម្រាប់កុមារ ហើយអ្វីដែលជាការចាប់អារម្មណ៍បំផុតនោះ គឺការផ្ដល់សេវាកម្មថត Pre-wedding សម្រាប់គូស្នេហ៍ទៀតផង។
ទេសភាពល្អត្រជាក់ភ្នែក។ (រូបថត៖ Thmey Thmey.com)
ការតុបតែងដ៏ត្រជាក់ភ្នែកដូច្នេះបានប្រែក្លាយអតីតដីខ្ពង់រាបជំរាលភ្នំមួយនេះក្លាយជាទីទាក់ទាញភ្ញៀវជាតិនិងអន្តរជាតិឆ្លងកាត់ខេត្តនោះចូលទៅទស្សនាកម្សាន្តនិងភ្លក្សរសជាតិអាហារស្រែ មាន់ និងត្រីស្រស់ៗពីស្រះធម្មជាតិ ពុំមានលស់ថ្ងៃឡើយ។ រមណីយដ្ឋាននេះលេចរូបរាងដំបូងក្រោមរូបភាពជាកន្លែងកម្សាន្តរបស់គ្រួសារឯកជនមួយនៅឆ្នាំ២០០៦ នៅលើផ្ទៃដីចំនួនមិនដល់ ១ ហិកតា។
តំបន់ទេសចរណ៍ធម្មជាតិបែបកែច្នៃ។ (រូបថត៖ Thmey Thmey.com)
បើតាមក្រសួងទេសចរណ៍ ក្នុងខេត្តបន្ទាយមានជ័យ មានតំបន់ទេសចរណ៍ច្រើនប្រភេទ រួមមាន តំបន់ទេសចរណ៍ធម្មជាតិបែបកែច្នៃ និងតំបន់ទេសចរណ៍បែបប្រវត្តិសាស្ត្រ ក្នុងនោះ ប្រាសាទបន្ទាយឆ្មា បារាយណ៍បុណ្យ និងអាងជើងគ្រុសដែលជាតំបន់មានសក្ដានុពលជាងគេក្នុងខេត្តនេះ៕
(បូកសរុបដោយឌីណា)
មតិពីមិត្តអ្នកអាន