តាមតួរលេខជាផ្លូវការពីមន្ត្រីទេសចរណ៍ បានឲ្យដឹងនៅថ្ងៃទី៨ខែកក្កដានេះថា ទេសចរអន្តរជាតិមកកម្ពុជាក្នុងសម័យកូវីដ១៩ នេះគឺបានតែជាង១លាននាក់ប៉ុណ្ណោះ។ ថយចុះជាង៥៩% បើធៀបទៅនឹងរយៈពេលដូចគ្នាទៅនឹងឆ្នាំទៅមិញ។
ភ្ញៀវទេសចរមកទស្សនាអង្គវត្ត។ (រូបថត៖ rasmeinews.com)
លោក តុប សុភ័ក្រ អនុរដ្ឋលេខាធិការក្រសួងទេសចរណ៍ និងជាអ្នកនាំពាក្យបានឲ្យរស្មីកម្ពុជាដឹងនៅថ្ងៃនេះថា ទោះបីជាយើងនៅតែបើកចំហជើងមេឃ បើកឲ្យភ្ញៀវអន្តរជាតិមកលេងកម្ពុជាយ៉ាងណាក៏ដោយ ក៏គ្មានសញ្ញាណាមួយមានភ្ញៀវបរទេសមកដែរ។ អ្វីដែលជាសញ្ញាថា គេអត់មកគឺដោយសារយើងបានចងលក្ខខណ្ឌជាប់ទៅលើបញ្ហាកូវីដ១៩ ដោយឲ្យគេមក តែតម្រូវឲ្យគេយកលុយមកដំកល់ទុកក្នុងធនាគាររាប់ពាន់ដុល្លារសំរាប់ព្យាបាលជំងឺកូវីដ ១៩ ពេលកើតជំងឺនេះជាយថាហេតុ។ ត្រូវចូលតាមដានជំងឺនេះ១៤ថ្ងៃថែមទៀត។ នេះជាឧបសគ្គធំដែលគេមិនមក បើជើងមេឃបើកចំហធំយ៉ាងណាក៏ដោយ។ ក៏ប៉ុន្តែមន្ត្រីរូបនេះបានបង្ហើបប្រាប់ថា ក្រសួងកំពុងតែរិះរកវិធីផ្សេងទៀត ដើម្បីដោះស្រាយអោយភ្ញៀវអន្តរជាតិមកកម្ពុជា បានក្នុងកំរឹតធូស្រាលជាងលក្ខខណ្ឌខាងលើនេះ។
អ្នកនាំពាក្យរូបនេះបានលើកឡើងថា យើងកំពុងរកច្រកមួយទាក់ទងទ្វេរភាគីឫត្រីភាគីរវាងប្រទេសណាមួយ ដើម្បីឲ្យប្រជាជនគេមកលេងកម្ពុជា ហើយប្រជាជនកម្ពុជាអាចទៅលេងប្រទេសនោះបានវិញ ក្នុងកំរិតមិនតឹងតែងឫរឹតត្បឹតទៅវិញទៅមក។ បញ្ហានេះ ក្រសួងកំពុងសិក្សានិងពិចារណាដោះស្រាយក្នុងពេលឆាប់ៗនេះ។ ក៏ប៉ុន្តែមន្ត្រីរូបនេះ បានសរសើរដល់ទេសចរក្នុងស្រុក និងជនបរទេសដែលបានរស់នៅកម្ពុជា មានសកម្មភាពបានដើរលេងកំសាន្តនៅតាមរមណីយដ្ឋាននានាជាច្រើន ជួយលើកស្ទួយជីវភាពសហគមន៍ទេសចរណ៍បានមួយកំរឹតផងដែរ។
សូមរំលឹកថា តាមរបាយការណ៍ផ្លូវការពីក្រសួងទេសចរណ៍ដែលបានចេញផ្សាយនៅថ្ងៃនេះ បានឲ្យដឹងថា នៅរយៈពេល ៤ខែ ដើមឆ្នាំ២០២០នេះ ចំនួនទេសចរអន្តរជាតិដែលបានធ្វើដំណើរចូលមកកាន់កម្ពុជាមានចំនួនតែប្រមាណជាង ១,១លាននាក់ប៉ុណ្ណោះ ខណៈដែលរយៈពេលដូចគ្នាកាលពីឆ្នាំ២០១៩ មានរហូតដល់ទៅជាង ២,៤លាននាក់ ពោលគឺមានការធ្លាក់ចុះប្រមាណជាង ១,២លាននាក់ គិតជាអត្រាភាគរយ គឺធ្លាក់ចុះរហូតដល់ ៥២%។
បើមើលទៅលើរបាយការណ៍ បង្ហាញថា នៅក្នុងរយៈពេល៤ខែដើមឆ្នាំនេះ ចំនួនទេសភ្ញៀវទេសចរអន្តរជាតិធ្លាក់ចុះខ្លាំងជាងគេ គឺនៅក្នុងខែមេសា និងខែមីនា។ ដោយខែមេសា ធ្លាក់ចុះចំនួនទេសចរអន្តរជាតិរហូតដល់ទៅជាង ៩៩%ឯណោះ ខណៈដែលខែមីនាធ្លាក់ចុះជិត ៦៥%។
ទោះជាយ៉ាងណា ការធ្លាក់ចុះវិស័យទេសចរណ៍និងឱនភាពសេដ្ឋកិច្ចដែលបណ្តាលមកពីវិបត្តិកូវីដនេះ មិនមែនមានតែកម្ពុជា ជាអត្តនោម័តនោះទេ។ វាជាសត្យានុម័តលើសកលលោកទាំងមូល គ្មានប្រទេសណាថាមិនរងផលប៉ះពាល់នោះទេ។ ពិសេសផ្នែកឯកជនក្នុងវិស័យនេះ បានបាត់ផលប្រយោជន៍យ៉ាងធ្ងន់ធ្ងរ៕
(បូកសរុបដោយឌីណា)
មតិពីមិត្តអ្នកអាន