ក្រសួងទេសចរណ៍ បានស្នើឲ្យប្រតិបត្តិទេសចរណ៍ទាំងអស់ ត្រៀមលក្ខណៈឲ្យស្រេចបាច់ ដើម្បីទទួលភ្ញៀវទេសចរឡើងវិញ ក្រោយវិបត្តិកូវីដ-១៩បញ្ចប់ តាមរយៈការពង្រឹងគុណភាពសេវាកម្ម អនាម័យ និងផលិតផលទេសចរណ៍របស់ខ្លួន។
ឯកឧត្តមបណ្ឌិត ថោង ខុន រដ្ឋមន្រ្តីក្រសួងទេសចរណ៍។ (រូបថត៖ thmey thmey.com)
ក្រសួង បានប្រាប់ឲ្យម្ចាស់សណ្ឋាគារ ពិសេសសណ្ឋាគារដែលដំណើរការអាជីវកម្មលើសពី១០ឆ្នាំ យកពេលវេលានេះមកជួសជុល និងកែលម្អទីតាំងខ្លួនឡើងវិញ ដើម្បីបង្កើនលទ្ធភាពទទួលបានការវាយតម្លៃលើចំណាត់ថ្នាក់សណ្ឋាគារ និងសេវាកម្មការស្នាក់នៅ។
ដើម្បីទទួលបានចំណាត់ថ្នាក់សណ្ឋាគារ គឺក្រសួងទេសចរណ៍ទាមទារឲ្យម្ចាស់សណ្ឋាគារនីមួយៗ មានភាពជឿជាក់លើការផ្តល់សេវាកម្ម សម្ភារ គ្រឿងបំពាក់ និងការរៀបចំសណ្ឋារកិច្ច ឲ្យបានល្អ ដែលស្របទៅតាមនិយាមអន្តរជាតិ។ លក្ខខណ្ឌដែលអាចឲ្យម្ចាស់សណ្ឋាគារទទួលបានចំណាត់ថ្នាក់សណ្ឋាគារ ម្ចាស់សណ្ឋាគារអាចសាកល្បងតាមរយៈwww.cambodiatourismrating.org/kh។
រយៈពេល៤សប្តាហ៍ហើយ ដែលកម្ពុជាពុំមានករណីឆ្លងថ្មី នៃជំងឺកូវីដ-១៩។ ដ្បិតតែស្ថានភាពហាក់ធូរស្រាល ប៉ុន្តែក្រសួងទេសចរណ៍ នៅតែបន្តអនុវត្តយុទ្ធនាការ«Stay Home Today, Travel Tomorrow» ដើម្បីធានាសុខសុវត្ថិភាពដល់ប្រជាពលរដ្ឋទាំងអស់គ្នា។
សូមរំលឹកថា ប្រមុខរាជរដ្ឋាភិបាលកម្ពុជាសម្តេច ហ៊ុន សែន ក៏បានគូសបញ្ជាក់យ៉ាងច្បាស់ថា វិស័យទេសចរណ៍កម្ពុជា មិនមែនពឹងលើតែ ប្រាសាទអង្គរវត្ត ឬប្រាសាទដទៃនោះទេ ពោលគឺ កម្ពុជា កំពុងកែច្នៃតំបន់ទេសចរណ៍ចម្រុះបន្ថែមទៀត ដើម្បីទាក់ទាញភ្ញៀវទេសចរជាតិ និងអន្តរជាតិ ឲ្យមកកម្សាន្តបានកាន់តែច្រើន./.
（បកប្រែដោយឌីណា）
មតិពីមិត្តអ្នកអាន