នាថ្ងៃទី៥ ខែមីនា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យឯកឧត្ដម Vilay Lakhamephong រដ្ឋមន្ត្រីក្រសួងសន្តិសុខសាធារណៈឡាវ និងគណៈប្រតិភូចូលជួបសម្ដែងការគួរសម នៅឯវិមានសន្តិភាព។ ក្នុងជំនួបនេះ
ឯកឧត្ដម Vilay Lakhamephong បានជម្រាបជូនសម្ដេចតេជោថា ឯកឧត្ដមបានជួបពិភាក្សាជាមួយសម្ដេចក្រឡាហោម ស ខេង ដោយធ្វើការផ្លាស់ប្ដូរនូវព័ត៌មាន ក៏ដូចជាផ្លាស់ប្ដូរបទពិសោធន៍មួយយចំនួន ហើយក៏បានពិភាក្សាលើកិច្ចសហប្រតិបត្តិការមួយចំនួន រួមមានការទប់ស្កាត់ការជួញដូរគ្រឿងញៀន ការទប់ស្កាត់ឧក្រិដ្ឋកម្មឆ្លងដែន ការកាប់ឈើខុសច្បាប់ និងការពង្រឹងសន្តិសុខសុវត្ថិភាពតាមព្រំដែន ដើម្បីធ្វើយ៉ាងណាសម្រួលឱ្យប្រជាជនទាំងសងខាងនៃប្រទេសទាំងពីរ ធ្វើដំណើរឆ្លងកាត់ធ្វើអាជីកម្មឱ្យបានស្រួល និងប្រកបដោយសុវត្ថិភាព។
ឯកឧត្ដម Vilay បានបន្តថា ការធ្វើទស្សនកិច្ចរបស់ឯកឧត្ដម មកកាន់កម្ពុជានាពេលនេះ ឆ្លើយតបទៅនឹអ្វីដែលបានសម្រេចនាពេលកន្លងមក គឺកម្ពុជា និងឡាវ ត្រូវជួបគ្នាមួយឆ្នាំម្ដង ដើម្បីពិភាក្សា និងពិនិត្យមើលអ្វីដែលបានអនុវត្តន៍កន្លងមក និងដាក់ទិសដៅដើម្បីធ្វើការងាររួមគ្នាទៀត ស្របតាមអ្វីដែលបានសម្រេចដោយថ្នាក់ដឹកនាំនៃប្រទេសទាំងពីរ។
ជាការឆ្លើយតប សម្ដេចតេជោនាយករដ្ឋមន្ត្រី ហ៊ុន សែន បានសម្ដែងនូវការអបអរសាទរ និងស្វាគមន៍លើអ្វីៗ ដែលបានពិភាក្សា និងឯកភាពជាមួយសម្ដេចក្រឡាហោម ស ខេង កន្លងមក ហើយក៏បានសម្ដែងនូវការរីករាយផងដែរថា អ្វីជាកិច្ចពិភាក្សា ជាជំនួបរវាងឯកឧត្ដម Vilay និងសម្ដេចក្រឡាហោម ស ខេង គឺឆ្លុះបញ្ចាំងនូវទំនាក់ទំនងពិសេសរវាងប្រទេសយើងទាំងពីរ នោះគឺជំនួបជាប្រចាំឆ្នាំ ដែលអនុញ្ញាតឱ្យប្រទេសទាំងពីរបានជួបពិភាក្សាគ្នា ពិនិត្យមើលលើអ្វីដែលបានសម្រេចដោយថ្នាក់ដឹកនាំប្រទេសទាំងពីរហើយៗ អ្វីដែលត្រូវធ្វើបន្តទៅទៀត។
ក្នុងន័យនេះដែរ សម្ដេចតេជោបានលើកទឹកចិត្ត ឱ្យមានកិច្ចពិភាក្សាបន្តទៀត ពិសេសសម្រួលដល់ការធ្វើពាណិជ្ជកម្មរបស់ប្រជាជនទាំងសងខាងនៅតាមព្រំដែន។ សម្ដេច ក៏បានសម្ដែងនូវការរីករាយផងដែរលើកិច្ចសហប្រតិបត្តិការរវាងប្រទេសទាំងពីរដែលបាន លើកឡើងលើបញ្ហាគ្រឿងញៀន៕
（ប្រភពព័ត៌មាន: akp.gov.kh）
