យោងតាមសេចក្តី ប្រកាសព័ត៌មានរបស់ ADB បានឲ្យដឹងថា ការផ្តល់កម្ចីនេះ គឺជាកម្មវិធីទី២ នៃការអភិវឌ្ឍន៍ផ្នែកសេវា និងការគ្រប់គ្រងវិស័យហិរញ្ញវត្ថុសាធារណៈ ដែលបានធ្វើវិមជ្ឈការ រួមមានប្រាក់កម្ចី ផ្តោតលើគោល នយោបាយចំនួន ២០ លានដុល្លារ ដែលនឹងគាំទ្រដល់វិធីសាស្រ្ត ដើម្បីពង្រឹងផែនការ និងការគ្រប់គ្រងសារពើពន្ធ នៃរដ្ឋបាលមូលដ្ឋាន ក៏ដូចជារដ្ឋបាលសាធារណៈ ។ វាក៏រួមបញ្ចូល ប្រាក់កម្ចីអនុវត្តន៍គម្រោងចំនួន ៩.៣៥ លានដុល្លារ ដើម្បីជួយកសាងសាលារដ្ឋបាល មូលដ្ឋានជាតិ ដែលជាមជ្ឈមណ្ឌលបណ្តុះបណ្តាល សម្រាប់មន្រ្តីរាជរដ្ឋាភិបាលក្នុងតំបន់។ លើសពីនេះ រាជរដ្ឋាភិបាល នឹងផ្តល់ហិរញ្ញប្បទានដល់គម្រោងនេះចំនួន១.៧ លានដុល្លារផងដែរ ។
ពលរដ្ឋនៅជនបទទទួលបានទឹកស្អាតប្រើប្រាស់ពីគម្រោងរបស់ ADB។ រូបថត ADB
ធនាគារអភិវឌ្ឍន៍អាស៊ី (ADB) បានអនុម័តហិរញ្ញប្បទាន ជាង២៩លានដុល្លារអាមេរិក ដើម្បីគំាទ្ររាជរដ្ឋាភិបាលកម្ពុជា ធ្វើឱ្យប្រសើរឡើង នូវការផ្តល់សេវាតាមរយៈ កំណែទម្រង់សំខាន់ៗ ក្នុងការគ្រប់គ្រងហិរញ្ញវត្ថុសាធារណៈ និងវិមជ្ឈការ ជាពិសេសនៅតាមតំបន់ជនបទ ដែលភាគច្រើនពលរដ្ឋក្រីក្ររស់នៅ។
យោងតាមសេចក្តី ប្រកាសព័ត៌មានរបស់ ADB បានឲ្យដឹងថា ការផ្តល់កម្ចីនេះ គឺជាកម្មវិធីទី២ នៃការអភិវឌ្ឍន៍ផ្នែកសេវា និងការគ្រប់គ្រងវិស័យហិរញ្ញវត្ថុសាធារណៈ ដែលបានធ្វើវិមជ្ឈការ រួមមានប្រាក់កម្ចី ផ្តោតលើគោល នយោបាយចំនួន ២០ លានដុល្លារ ដែលនឹងគាំទ្រដល់វិធីសាស្រ្ត ដើម្បីពង្រឹងផែនការ និងការគ្រប់គ្រងសារពើពន្ធ នៃរដ្ឋបាលមូលដ្ឋាន ក៏ដូចជារដ្ឋបាលសាធារណៈ ។ វាក៏រួមបញ្ចូល ប្រាក់កម្ចីអនុវត្តន៍គម្រោងចំនួន ៩.៣៥ លានដុល្លារ ដើម្បីជួយកសាងសាលារដ្ឋបាល មូលដ្ឋានជាតិ ដែលជាមជ្ឈមណ្ឌលបណ្តុះបណ្តាល សម្រាប់មន្រ្តីរាជរដ្ឋាភិបាលក្នុងតំបន់។ លើសពីនេះ រាជរដ្ឋាភិបាល នឹងផ្តល់ហិរញ្ញប្បទានដល់គម្រោងនេះចំនួន១.៧ លានដុល្លារផងដែរ ។
អ្នកជំនាញជាន់ខ្ពស់ ផ្នែកគ្រប់គ្រងវិស័យសាធារណៈ របស់ធនាគារអភិវឌ្ឍន៍អាស៊ី លោកស្រី Jhelum Thomas បានលើកឡើងថា «គម្រោងនេះមានគោលបំណង ជួយដល់រដ្ឋបាលមូលដ្ឋាន នៅទូទាំង ប្រទេសកម្ពុជា ក្នុងការផ្តល់នូវសេវាសាធារណៈមូលដ្ឋាន ប្រកបដោយនិរន្តរភាព និងប្រសិទ្ធភាព ហើយក៏នឹងបង្រួមគម្លាតតំបន់ជនបទ និងទីប្រជុំជនផងដែរ។ គម្រោងនេះ ចាំបាច់ណាស់ ខណៈដែលជំងឺ រាតត្បាតកូវីដ១៩ ធ្វើឱ្យប្រជាពលរដ្ឋមួយចំនួន បានផ្លាស់ទី ពីទីក្រុងទៅជនបទ។ ប្រការនេះនឹងនាំដល់ សម្ពាធបន្ថែមដល់រដ្ឋបាលមូលដ្ឋាន ក្នុងការផ្តល់ជំនួយសង្គមនិងសេវាកម្មចំបាច់ដូចជាផ្លូវថ្នល់ ការផ្គត់ផ្គង់ ទឹក និងអនាម័យ ដើម្បីគាំទ្រដល់ការរីកចម្រើនណើន ប្រកបដោយបរិយាប័ន្ន និងសមធម៌» ។
លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ ស្វាគមន៍ចំពោះការអនុម័តផ្តល់ហិរញ្ញប្បទាននេះ ដោយសារតែវាមានសារៈប្រយោជន៍ដល់ប្រជាពលរដ្ឋ ក៏ដូចជាជួយដល់រាជរដ្ឋាភិបាលកម្ពុជា ក្នុងការសម្រេចឱ្យបាននូវការធ្វើកំណែទម្រង់វិមជ្ឈការ។
លោកបានបញ្ជាក់ថា៖ «ជំហររបស់ក្រសួងសេដ្ឋកិច្ច មើលឃើញដូចគ្នាទៅនឹងការលើកឡើងរបស់ ADB ក៏ដូចជាផលដែលយើងបានព្រមព្រៀងហ្នឹង។ គោលបំណងរបស់យើង គឺរួមគ្នាធ្វើឱ្យប្រសើរឡើងនូវការផ្តល់សេវាតាមរយៈកំណែទម្រង់សំខាន់ៗ ចំពោះការគ្រប់គ្រងហិរញ្ញវត្ថុសាធារណៈ និងវិមជ្ឈការ»។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជា បានសាទរចំពោះការផ្តល់ហិរញ្ញប្បទានរបស់ ADB នេះដែលលោកថា នឹងក្លាយជាកម្លាំងចលករបន្ថែមទៀត ដើម្បីជួយទៅដល់ដំណើរការកែទម្រង់រដ្ឋបាលសាធារណៈនៅថ្នាក់ក្រោម ក៏ដូចជាការផ្តល់សេវាទៅដល់ប្រជាពលរដ្ឋ។
បើតាមលោក ច័ន្ទរឿន ក្នុងអំឡុងពេលវិបត្តិកូវីដ ១៩ នេះ រដ្ឋាភិបាលកម្ពុជាបានកាត់បន្ថយថវិកាជាច្រើន ដែលធ្វើឱ្យវិស័យនេះ អាចនឹងជួបប្រទះនូវការខ្វះខាត ហើយដំណើរការនៃការធ្វើកំណែទម្រង់នឹងមានភាពយឺតយ៉ាវ។
លោក ច័ន្ទរឿន បញ្ជាក់ថា៖ «ជាការពិតប្រទេសកម្ពុជា បើទោះបីជាមួយរយៈក្រោយចំណូលថវិការដ្ឋពឹងផ្អែកលើចំណូលរបស់រដ្ឋខ្លួនឯង បានពីការប្រមូលពន្ធ និងវិស័យដទៃទៀតក្តី ក៏ប៉ុន្តែកម្រិតថវិកាដែលយើងយកមកប្រើនៅក្នុងរដ្ឋបាលថ្នាក់ក្រោមហ្នឹងនៅមានកម្រិតនៅឡើយ។ បើសិនមានតែគោលនយោបាយក្នុងការកែទម្រង់ តែមិនមានគោលនយោបាយផ្នែកហិរញ្ញវត្ថុក៏ការកែទម្រង់អត់ទៅលឿន និងមិនមានប្រសិទ្ធភាពដែរ»៕
（សរុបដោយវិច្ឆិកា）
មតិពីមិត្តអ្នកអាន