យុគសម័យ- មហោស្រពកម្ពុជាឆ្នាំ២០១៩ (Cambodia Festival 2019) នៅទីក្រុងតូក្យូ ប្រទេសជប៉ុន បាននិងកំពុងចាប់ផ្តើមពីថ្ងៃទី៣ ដល់ថ្ងៃទី៤ ខែឧសភា ឆ្នាំ២០១៩ នៅសួន Yoyogi នៅទីក្រុងតូក្យូ។
លោក Kenji YAMADA អនុរដ្ឋមន្ត្រីនៃក្រសួងការបរទេសជប៉ុនដែលមានវត្តមានក្នុងឪកាសនោះ បានថ្លែងកោតសរសើរពី«ការអភិវឌ្ឍន៍របស់កម្ពុជាក្រោមពន្លឺនៃសុខសន្តិភាពនិងលទ្ធិប្រជាធិបតេយ្យ»។ កម្ពុជាជាប្រទេសដែលមានឱកាសវិនិយោគដ៏ទាក់ទាញ និងសម្បូរដោយកម្លាំងពលកម្មវ័យក្មេង ប្រកបដោយសក្តានុពលនិងប្រកបដោយក្តីសង្ឃឹមហើយជាមួយនឹងកិច្ចសហប្រតិបត្តិការល្អដ៏យូរលង់រវាងប្រទេសទាំងពីរ ជប៉ុនប្តេជ្ញាជំរុញលំហូរទេសចរនិងអ្នកវិនិយោគមកកាន់កម្ពុជាបន្ថែមទៀតផងដែរ។
ពិធីកាត់ខ្សែបូរណ៌បើកការពិព័រណ៌នៅទីក្រុង តូក្យូ ប្រទេសជប៉ុន
មហោស្រពនេះក៏មានតាំង ពិព័រណ៍រៀបចំរយៈពេល ២ថ្ងៃ ដោយមានការបង្ហាញរបាំបុរាណខ្មែរ សម្តែងដោយសិល្បករសិល្បការនីនៃក្រសួងវប្បធម៌និងវិចិត្រសិល្បៈកម្ពុជានិងក្បាច់គុណល្បុកតោរបស់ខ្មែរ ជាមួយនឹងការរៀបចំស្តង់បង្ហាញពីម្ហូបអាហារខ្មែរ វប្បធម៌ ទេសចរណ៍ និងស្តង់ពាណិជ្ជកម្ម ចំនួន ២៥០ស្តង់ ដែលមានអ្នកចូលរួមយ៉ាងច្រើនកុះករចំនួនប្រមាណ១០ម៉ឺននាក់។
កម្មវិធីនេះត្រូវបានរៀបចំឡើងក្នុងគោលបំណងផ្សព្វផ្សាយនិងលើកកម្ពស់សិល្បៈវប្បធម៌វិស័យទេសចរណ៍និងមុខមាត់នៃព្រះរាជាណាចក្រកម្ពុជានៅប្រទេសជប៉ុនព្រមទាំងសំដៅជំរុញផ្សព្វផ្សាយសក្កានុពលទេសចរណ៍កម្ពុជា។
ភ្ញៀវទេសចរណ៌ចូលរួមតាំងពិព័រណ៌ដ៏ច្រើនកុះករ
គួរកត់សម្គាល់ផងដែរថាឆ្នាំ២០១៩នេះជាខួបលើកទី៦៦នៃទំនាក់ទំនងការទូតរវាងប្រទេសទាំងពីរកម្ពុជា-ជប៉ុនហើយបច្ចុប្បន្នជប៉ុនមិនត្រឹមតែមានស្ថានទូតនៅរាជធានីភ្នំពេញប៉ុណ្ណោះទេតែក៏មានស្ថានកុងសុលនៅខេត្តសៀមរាបផងដែរ។
កាលពីឆ្នាំ២០១៨កន្លងទៅនេះកម្ពុជាទទួលបានទេសចរអន្តរជាតិជាង ៦.២លាននាក់ ក្នុងកំណើន ១០.៧ភាគរយ ក្នុងនោះទេសចរជប៉ុនមានចំនួនជាង ២១ម៉ឺននាក់ ក្នុងកំណើន ៣.៥ភាគរយ ហើយ២ខែដើមឆ្នាំ២០១៩នេះ កម្ពុជាទទួលបានទេសចរអន្តរជាតិជាង ១,២លាននាក់ក្នុងនោះទេសចរជប៉ុនជិត៤ម៉ឺននាក់ក្នុងកំណើន៣.១ភាគរយ។
（ប្រភព៖ rasmeinews កែសម្រួលដោយ សំណាង）
មតិពីមិត្តអ្នកអាន