ឯកឧត្ដម Pierre Baillet លេខាធិការអចិន្ត្រៃយ៍ នៃសមាគមអភិបាលក្រុងនិយាយភាសាបារាំង បានចាត់ទុកកម្ពុជា ជាប្រទេសជាគំរូ ក្នុងការអភិវឌ្ឍគម្រោងរបស់ខ្លួន សម្រាប់យកទៅអនុវត្តន៍បន្តនៅបណ្ដាប្រទេសជិតខាងមួយចំនួនទៀត ហើយកម្ពុជានឹងធ្វើជាម្ចាស់ផ្ទះរៀបចំមហាសន្និបាតរបស់អភិបាលក្រុងនិយាយភាសាបារាំងដែលនឹងប្រព្រឹត្តទៅ នៅដើមខែធ្នូ ឆ្នាំ២០១៩ នៅរាជធានីភ្នំពេញ។
សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានអនុញ្ញាត្ឱ្យឯកឧត្ដម Pierre Baillet លេខាធិការអចិន្ត្រៃយ៍ នៃសមាគមអភិបាលក្រុងនិយាយភាសាបារាំង ចូលរួបសម្តែងការគួរសម (រូបថតៈ pressocm.gov.kh )
នាព្រឹកថ្ងៃទី៨ខែមីនា ឆ្នាំ២០១៩ នៅឯវិមានសន្តិភាព សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យឯកឧត្ដម Pierre Baillet លេខាធិការអចិន្ត្រៃយ៍ នៃសមាគមអភិបាលក្រុងនិយាយភាសាបារាំង និងគណៈ ប្រតិភូ ចូលជួបសម្ដែងការគួរសម ក្នុងឱកាសដែលឯកឧត្ដមអញ្ជើញមកបំពេញទស្សនកិច្ចនៅកម្ពុជា ដើម្បីរៀបចំមហាសន្និបាតរបស់អភិបាលក្រុង និយាយភាសាបារាំង ដែលនឹងប្រព្រឹត្តទៅ នៅដើមខែធ្នូ ឆ្នាំ២០១៩។
នៅក្នុងជំនួបនេះ ឯកឧត្តម Pierre Baillet បានសម្ដែងក្តីរីករាយណាស់ ដោយបានឃើញទីក្រុងភ្នំពេញ គឺជាទីក្រុងមួយ ជាសមាជិក នៃទីក្រុងដែលនិយាយភាសាបារាំង។ ឯកឧត្តមក៏បានពាំនាំនូវការផ្តាំផ្ញើសួរសុខទុក្ខ ក៏ដូចជាពិនិត្យមើលនូវគម្រោងអភិវឌ្ឍន៍នានា ដែលបានអនុវត្តន៍កន្លងមក និងគម្រោងដែលត្រូវអភិវឌ្ឍន៍ នៅពេលខាងមុខជាមួយនឹងជំនួយ ដែលបានមកពីសហគមន៍ និយាយភាសាបារាំង ក្នុងនោះក៏មានមូលនិធិ Bill Gate ផងដែរ ក្នុងការស្ដារប្រព័ន្ធកែលម្អបរិស្ថាន ទីក្រុងកាកសំណល់ ទឹកស្អុយ ឬក៏ទឹកដក់ នៅតាមផ្លូវជាដើម។ ឯកឧត្តមបានបន្ដទៀតថា កម្ពុជាជាគំរូ ជាពិសេសទីក្រុងភ្នំពេញ និងទីក្រុងសៀមរាប អាចជាគំរូនៅក្នុងការអភិវឌ្ឍនូវគម្រោងទាំងនេះ។ ឯកឧត្តមក៏បានជម្រាបជូនសម្ដេចតេជោនាយករដ្ឋមន្ត្រី ផងដែរថា សមាគមអភិបាលក្រុងនិយាយភាសាបារាំង នឹងត្រៀមរៀបចំធ្វើសន្និបាត ដែលមានការចូលរួមពី អភិបាលក្រុងអភិបាលប៉ារីស នាដើមខែធ្នូ ឆ្នាំ២០១៩នេះ នៅទីក្រុងភ្នំពេញ និងខេត្តសៀមរាប ដែលក្នុងឱកាសនោះ នឹងរំលេចនូវភាពជោគជ័យ នៃការអនុវត្តគម្រោងនានា នៅកម្ពុជា ជាពិសេសនៅរាជធានីភ្នំពេញ និងនៅទីក្រុងសៀមរាប ហើយឱកាសនោះ ក៏នឹងបង្ហាញឱ្យសមាជិកមកពីទ្វីបទាំង៥ និងមានអភិបាលក្រុង ពីទ្វីបទាំងប្រាំ នៃពិភពលោកនេះ នឹងមកចូលរួមសន្និបាតនេះ។
ទិដ្ឋភាពនៃជំនួប (រូបថតៈ pressocm.gov.kh)
ជាការឆ្លើយតប សម្ដេចតេជោ ហ៊ុន សែន បានសម្ដែងនូវការរីករាយ ដោយបានទទួលគណៈប្រតិភូដែលបានមកបំពេញទស្សនកិច្ចនៅកម្ពុជា ដែលឱកាសនេះសម្តេចសង្ឃឹមថា គណៈប្រតិភូបានឃើញផ្ទាល់នឹងភ្នែកនូវការរីកចម្រើន ជាពិសេស នៅក្នុងការអនុវត្តគម្រោងនានា ដែលសមាគមនៃអភិបាលក្រុង និយាយភាសាបារាំង បានជួយមកដល់កម្ពុជា ដែលមានប្រវត្តិតាំងពីក្នុងទសវត្សរ៍៨០មកម្ល៉េះ។ សម្ដេចតេជោបានមានប្រសាសន៍បន្តថា វាជាកិត្តិយសសម្រាប់កម្ពុជា ដែលរាជធានីភ្នំពេញ បានក្លាយទៅជាសមាជិកមួយ នៃសមាគមប្រទេសដែលប្រើប្រាស់ភាសាបារាំង។ សម្ដេចតេជោក៏បានស្វាគមន៍ និងរីករាយជានិច្ច ជាមួយគម្រោងនានា និងការជួយរបស់សមាគមក៏ដូចជាមូលនិធិផ្សេងៗ ដែលរាជរដ្ឋាភិបាល ក៏បានត្រៀមថវិកាបដិភាគ សម្រាប់អនុវត្តន៍គម្រោងទាំងនោះ ឱ្យប្រកបដោយជោគជ័យ។
សម្ដេចតេជោនាយករដ្ឋមន្ត្រីបានសម្ដែងនូវសេចក្ដីរីករាយ ក្នុងការដែលទីក្រុងភ្នំពេញ នឹងរៀបចំធ្វើជាទីកន្លែងសន្និបាត របស់សមាគម អភិបាលក្រុងនិយាយភាសាបារាំង ដែលនឹងប្រព្រឹត្តទៅ នៅដើមខែធ្នូ ឆ្នាំ២០១៩ខាងមុខនេះ៕
(យោងតាម pressocm.gov.kh)