យុគសម័យ - សេចក្តីជូនដំណឹងស្តីពី រដ្ឋមន្ត្រីការពារជាតិអាមេរិកលោក James Mattis នឹងលាលែងពីដំណែងនា ដំណាច់ខែកុម្ភៈឆ្នាំ ២០១៩ ខាងមុខនេះ ត្រូវបានប្រកាសគ្រាន់តែមួយថ្ងៃបន្ទាប់ពីសហរដ្ឋអាមេរិកបានធ្វើឲ្យសាធារណមតិពិភពលោកមានការភ្ញាក់ផ្អើលយ៉ាងខ្លាំងដោយមានការសម្រេចដកកងទ័ពចេញពីស៊ីរី។
រដ្ឋមន្ត្រីការពារជាតិអាមេរិក លោក James Mattis ដាក់ពាក្យសួមលាលែងពីដំណែងដោយសារខ្វែងគំនិតជាមួយប្រធានាធិបតីលោក Donald TRump (រូបថតៈ AFP/Getty Images )
យោងតាមកាសែត Washington Post រដ្ឋមន្ត្រីការពារជាតិអាមេរិក លោក Mattis បានដាក់ពាក្យលាលែងពីតំណែងបន្ទាប់ពីមានការខ្វែងគំនិតជាមួយ ប្រធានាធិបតី លោក Donald Trump ទាក់ទងនឹងការដកកងទ័ពចេញពីប្រទេសស៊ីរី។ ថ្លែងនៅក្នុងលិខិតលាលែងនេះ ប្រមុខក្រសួងការពារជាតិអាមេរិកបានសម្តែងនូវក្តីសង្ឃឹមថាលោកប្រធានាធិបតី Trump នឹងស្វែងរកបានអ្នកជំនួសដោយមាន “ទស្សនវិស័យស្រដៀង” ជាមួយលោកជាង។
មុននេះ ជាមួយនឹងសេចក្ដីសម្រេចដកកងទ័ពទាំងអស់ចេញពីប្រទេសស៊ីរីដែលធ្វើឱ្យក្រុមសម្ព័ន្ធមិត្តរបស់លោកមានការភ្ញាក់ផ្អើលនោះ លោកប្រធានាធិបតី Trump ត្រូវបានគេចោទប្រកាន់ថា មិនអើពើដល់មតិយោបល់ពីប្រឹក្សាផ្ទាល់ខ្លួន ក្នុងនោះមានទាំងរដ្ឋមន្រ្តីក្រសួងការពារជាតិលោក Mattis តែម្តង។
ប្រធានាធិបតី លោក Trump បានប្រកាសហេតុផលសម្រាប់ការដកទ័ពនេះគឺដោយសារជ័យជម្នះចំពោះអង្គការភេរវកររដ្ឋអ៊ីស្លាម (IS) ស្វ័យប្រកាស ដោយមិនអើពើដល់មតិរបស់មន្ទីរបញ្ចកោណនិងក្រសួងការបរទេសជាច្រើនខែមកហើយថា សង្គ្រាមប្រឆាំងនឹងក្រុមភេរវករមិនទាន់ត្រូវបានបញ្ចប់នៅឡើយទេ។ នៅក្នុងការិយាល័យ Oval នៅថ្ងៃទី ២០ ខែធ្នូ រដ្ឋមន្ត្រី លោក Mattis បានព្យាយាមបញ្ចុះបញ្ចូលប្រធានាធិបតីមិនឱ្យដកកងទ័ពចេញ ប៉ុន្តែសំណើនេះត្រូវបានបដិសេធ។
លិខិតរបស់លោក Mattis បានបង្ហាញថា លោកមិនយល់ស្របនឹងគោលនយោបាយឯកោនិយមរបស់ លោក Trump ដោយវាបានបញ្ជាក់ថាអាមេរិកត្រូវការរក្សាសម្ពន្ធភាពរឹងមាំនិងបង្ហាញការគោរពចំពោះសម្ពន្ធមិត្ត។ ហើយលោក Trump បានដកអាមេរិកចេញពីកិច្ចព្រមព្រៀងអន្តរជាតិជាច្រើនចាប់តាំងពីលោកចូលកាន់តំណែងកាលពីខែមករាឆ្នាំ២០១៧។
ក្រោយក្រសួងការពារជាតិបញ្ចេញលិខិតនេះភ្លាម ប្រធានាធិបតី លោក Trump បានសរសេរបង្ហោះវិញភ្លែតថា លោកនឹងតែងតាំងមនុស្សចូលជំនួសតំណែងនេះក្នុងពេលឆាប់ៗ។ លោកបានសរសេរបង្ហោះក្នុង Twitter ដូច្នេះថា “ឧត្តមសេនីយ៍ Mattis នឹងចូលនិវត្តន៍នៅដំណាច់ខែកុម្ភៈក្រោយពីបានបំរើក្នុងរដ្ឋការរបស់ខ្ញុំជារដ្ឋមន្ត្រីការពារជាតិអស់ពេល២ឆ្នាំមកនេះ”៕
（សរុបព័ត៌មាន ដោយ មិញ អាញ់）
មតិពីមិត្តអ្នកអាន