យុគសម័យ - នាថ្ងៃទី ៣១ ខែតុលា ប្រធានាធិបតីអាមេរិក លោក Donald Trump បាននិយាយថា សហរដ្ឋអាមេ រិកនិងចិន នឹងប្រកាសប្រាប់អំពីទីតាំងថ្មី ដែលលោកហើយនិងប្រធានរដ្ឋចិន លោក Xi Jinping នឹងចុះហត្ថលេខាលើកិច្ចព្រមព្រៀង ពាណិជ្ជកម្មដំណាក់កាលទីមួយ ក្រោយពីឈីលីបានសម្រេចលុបចោលការរៀបចំកិច្ចប្រជុំកំពូលអន្តរជាតិមួយ ដែលគ្រោង ប្រព្រឹត្តទៅនៅពាក់កណ្តាលខែវិច្ឆិកាខាងមុខ។
ប្រធានាធិបតីអាមេរិក លោក Donald Trump (ឆ្វេង) ចាប់ដៃជាមួយប្រធានរដ្ឋចិន លោក Xi Jinping (រូបភាព៖ AFP)
តាមរយៈបណ្តាញទំនាក់ទំនងសង្គម Twitter លោក Donand Trump បានប្រាប់ថា ទីក្រុងវ៉ាស៊ីនតោននិងទីក្រុងប៉េកាំង កំពុងស្វែងរកទីតាំងថ្មី សម្រាប់ការចុះកិច្ចព្រមព្រៀងពាណិជ្ជកម្ម "ដំណាក់កាលទីមួយ" ហើយកន្លែងថ្មីនឹងត្រូវប្រកាសឲ្យដឹងក្នុងពេលឆាប់ៗ។ ការស្វែងករកកន្លែងថ្មីបែបនេះ គឺដោយសារតែឈីលីបានសម្រេចចិត្តលុបចោល កិច្ចប្រជុំកំពូលកិច្ចសហប្រតិបត្តិការសេដ្ឋកិច្ច អាស៊ី-ប៉ាស៊ីហ្វិក ហៅកាត់ថា APEC ដែលត្រូវបានគ្រោងនឹងរៀបចំឡើងនៅថ្ងៃទី ១៦-១៧ ខែវិច្ឆិកា ខណៈលោក Donald Trump ដំបូងឡើយ ចង់ឆ្លៀតឱកាសក្នុងការចូលរួមកិច្ចប្រជុំនេះ ទៅចុះកិច្ចព្រមព្រៀងពាណិជ្ជកម្មជាមួយ លោក Xi Jinping។
គួរជម្រាបថា លោក Donand Trump មិនបានបញ្ជាក់ច្បាស់ថា ជំនួបដើម្បីចុះកិច្ចព្រមព្រៀងជាមួយលោក Xi Jinping នឹងប្រព្រឹត្តទៅ នៅពេលណាឡើយ ប៉ុន្តែបើតាមសេតវិមាន គឺប្រហែលនៅចន្លោះពេលស្រដៀងគ្នា នៃគម្រោងរៀបចំកិច្ចប្រជុំ APEC ដែរ។ ពាក់ព័ន្ធនឹងទីតាំងថ្មីវិញ បើតាមប្រភពពីអាមេរិក រដ្ឋ Alaska និង Hawaii អាចជាជម្រើសដែលចិនទទួលយកបាន ខណៈទីក្រុងប៉េកាំង អាចស្នើឡើងទីក្រុងម៉ាកាវ៕
ប្រធានាធិបតីស៊ីលី Sebastian Pinera សម្រេចលុបចោលកិច្ចប្រជុំមួយចំនួន ដោយក្នុងនោះរួមមាន កិច្ចប្រជុំសហប្រតិបត្តិការសេដ្ឋកិច្ចអាស៊ី ប៉ាស៊ីហ្វិក នៅថ្ងៃទី ១៦ និង១៧ ខែវិច្ឆិកា និងសន្និសីទស្តីពីការបម្រែបម្រួលអាកាសធាតុរបស់អង្គការសហប្រជាជាតិ នៅក្នុងខែធ្នូ។ ការសម្រេចលុបចោលបែបនេះ ដោយសារប្រទេសស៊ីលីកំពុងស្ថិតក្នុងភាពវឹកវរ និងបាតុកម្មរបស់ប្រជាជន។ |
(សរុបព័ត៌មាន ដោយ ស្រីព្រេជ)
មតិពីមិត្តអ្នកអាន