អង្គការសុខភាពពិភពលោក WHO បាននិយាយថា ប្រភពដើមនៃករណីឆ្លង COVID-19 ជាចង្កោមថ្មីមួយក្នុងទីក្រុងប៉េកាំងប្រទេសចិន នៅតែស្ថិតក្នុងភាពមិនច្បាស់លាស់នៅឡើយ ដែលតម្រូវឱ្យមានការបង្កើនការធ្វើតេស្ដបន្ថែមទៀត ខណៈមានការព្រួយបារម្ភកាន់តែខ្លាំង ពីការផ្ទុះឡើងនូវរលកទី ២។
នាយកកម្មវិធីសង្រ្គោះបន្ទាន់ WHO លោក ម៉ៃក៍ រីយ៉ាន (Mike Ryan) ។ (រូបថត៖ freshnewsasia)
នៅក្នុងសន្និសីទសារព័ត៌មានមួយនាទីក្រុងហ្សឺណែវ ប្រទេសស្វីស នៅថ្ងៃចន្ទសប្ដាហ៍នេះ នាយកកម្មវិធីសង្រ្គោះបន្ទាន់ WHO លោក ម៉ៃក៍ រីយ៉ាន (Mike Ryan) ក៏បានសង្កត់ធ្ងន់ដែរថា ការអះអាងអំពីការឆ្លង COVID-19 ជាចង្កោមក្នុងទីក្រុងប៉េកាំង បង្កឡើងដោយក្រុមអ្នកផ្គត់ផ្គង់ ឬកញ្ចប់ត្រីសាល់ម៉ុន (salmon) នាំចូលពីបណ្ដាប្រទេសអឺរ៉ុប មិនទាន់ក្លាយជាការអះអាងបឋមនោះទេ។ លោក Mike Ryan បានបញ្ជាក់ដូច្នេះថា «ខ្ញុំគិតថាយើងចាំបាច់ត្រូវស្វែងយល់ និងសង្កតមើលទៅលើអ្វី ដែលបានកើតឡើងនៅក្នុងករណីនេះ ហើយខ្ញុំមិនជឿឡើយថា វាគឺជាសម្មតិកម្មបឋម។ ប៉ុន្តែវាចាំបាច់ត្រូវបង្កើនការស្វែងរកការពិត និងការធ្វើតេស្ដ»។
គួរបញ្ជាក់ថា ប្រទេសចិន នៅថ្ងៃអាទិត្យទី១៤ មិថុនា បានប្រកាសពីករណីឆ្លងថ្មីនៃជំងឺកូវីដ ដែលមានចំនួន ៥៧ករណី ក្នុងរយៈពេល២៤ម៉ោងចុងក្រោយ។ ជាតួលេខឆ្លងជំងឺកូវីដ ដ៏ខ្ពស់ ដែលប្រទេសចិន មិនធ្លាប់មាន ចាប់តាំងពីខែមេសា។ នៅពេលចិនកំពុងព្រួយបារម្ភពីរលកទី ២ នៃជំងឺរាតត្បាតកូវីដ នៅអឺរ៉ុបឯណោះវិញ រដ្ឋាភិបាលបណ្តាប្រទេសសមាជិកសហភាពអឺរ៉ុប ចាប់បន្ធូរវិធានការ ដោយគ្រោងនឹងបើកព្រំដែន នៅក្នុងរង្វង់លំហ Schengen ចាប់ពីថ្ងៃចន្ទស្អែកទៅ។
ជំងឺកូវីដ១៩បានផ្ទុះឡើង សាជាថ្មី នៅទីក្រុងប៉េកាំងជាទីដែលករណីឆ្លងថ្មី បានកើនឡើង គួរឲ្យព្រួយបារម្ភ។ តាមគណៈកម្មការសុខភាពជាតិ នៅក្នុងចំណោមអ្នកឆ្លងមេរោគកូរ៉ូណាថ្មី ៥៧នាក់ ដែលគេរាប់ឃើញមាន នៅប្រទេសចិន នៅថ្ងៃអាទិត្យនេះ ៣៦នាក់ ជាអ្នករស់នៅទីក្រុងប៉េកាំង។
ដោយឡែក បើគិតអំពីករណីឆ្លងនៅក្នុងប្រទេសចិនទាំងមូលវិញ គឺថ្ងៃចន្ទម្សិលមិញនេះ អាជ្ញាធរបានរកឃើញអ្នកឆ្លង COVID-19 ថ្មីៗចំនួន ៤០នាក់ក្នុងនោះ ៣២នាក់ឆ្លងក្នុងស្រុក (២៧នាក់នៅប៉េកាំង) និង ០៨នាក់ជាប្រទេសករណីនាំចូល។ សរុបមកបច្ចុប្បន្នចិនមានករណីឆ្លង COVID-19 សរុប ៨៣,២២១ករណីក្នុងនោះស្លាប់ ៤,៦៣៤នាក់ និងជាសះស្បើយ ៧៨,៣៧៧នាក់៕
(បូកសរុបដោយឌីណា)
មតិពីមិត្តអ្នកអាន