យុគសម័យ - នៅថ្ងៃទី ២៧ ខែតុលា បណ្ដាថ្នាក់ដឹកនាំមកពីប្រទេសរុស្ស៊ី បារាំង អាល្លឺម៉ង់និងទួរគី បានចេញសេចក្តីថ្លែងការណ៍រួមមួយ បន្ទាប់ពីកិច្ចប្រជុំកំពូល ចតុភាគី ដែលប្រព្រឹត្តទៅនៅទីក្រុងអ៊ីស្តង់ប៊ុលប្រទេសទួរគី ស្តីពីបញ្ហាស៊ីរី។
ថ្នាក់ដឹកនាំរុស្ស៊ី បារាំង អាល្លឺម៉ង់និងទួរគី ចេញសេចក្តីថ្លែងការណ៍រួមស្តីពីបញ្ហាស៊ីរី (រូបថតៈ RT)
ជំនួបចតុភាគី រុស្ស៊ី បារាំង អាល្លឺម៉ង់និងទួរគី ស្ដីពីវិបត្តិនៅស៊ីរី បានសម្រេចលទ្ធផលគួរឲ្យកត់សម្គាល់មួយចំនួន សំដៅបញ្ចប់ជម្លោះរ៉ាំរ៉ៃមួយនេះ។ នាជំនួបនៅទីក្រុងអ៊ីស្តង់ប៊ុលនៅថ្ងៃទី២៧ ខែតុលានេះតែម្តង ថ្នាក់ដឹកនាំនៃប្រទេសទាំងបួនបានលើកឡើងពីសារសំខាន់ក្នុងការបន្តអនុវត្តបទឈប់បាញ់នៅខេត្ត Idlib ដែលជាជម្រកចុងក្រោយរបស់ក្រុមឧទ្ទាមប្រឆាំងរដ្ឋាភិបាលក្រុងដាម៉ាស់។ មហាអំណាចទាំង៤ ក៏ឯកភាពគ្នាទុកបញ្ហានេះឲ្យស៊ីរីដោះស្រាយខ្លួន ដោយមានអង្គការសហប្រជាជាតិជួយសម្រួល។
ថ្នាក់ដឹកនាំប្រទេសទាំងបួនបានបង្ហាញការគាំទ្រចំពោះដំណើរការនយោបាយដែលដឹកនាំដោយស៊ីរីផ្ទាល់ មានការចូលរួមពីភាគីស៊ីរីទាំងអស់ ហើយដែលសម្របសម្រួលដោយអង្គការសហប្រជាជាតិ (រូបថតៈ RT)
អង្គការសហប្រជាជាតិនិងអង្គការអន្តរជាតិនានាគួរតែពង្រឹងជំនួយមនុស្សធម៌ដល់សមរភូមិនៅស៊ីរី (រូបថតៈ RT)
នាជំនួបនេះ ថ្នាក់ដឹកនាំប្រទេសទាំង៤ ក៏ស្នើឲ្យមានការកោះប្រជុំគណៈកម្មាធិការសរសេររដ្ឋធម្មនុញ្ញថ្មី សម្រាប់ស៊ីរីនៅត្រឹមដំណាច់ឆ្នាំ២០១៨ នេះ។ គណៈកម្មាធិការមួយនេះត្រូវបានបង្កើតឡើងនាកិច្ចប្រជុំស្វែងរកសន្តិភាពនៅរុស្ស៊ីកាលពីខែមករា ដោយមានសមាជិកទាំងអស់១៥០នាក់ក្នុងនោះ៥០នាក់ជ្រើសរើសដោយរដ្ឋាភិបាលក្រុងដាម៉ាស់ ៥០មកពីក្រុមប្រឆាំង និង៥០នាក់តែងតាំងដោយអង្គការសហប្រជាជាតិ៕
（សរុបព័ត៌មាន ដោយ ស្រីព្រេជ）
មតិពីមិត្តអ្នកអាន