កិច្ចសន្ទនាយុទ្ធសាស្ត្រវៀតណាម - អង់គ្លេស

អនុរដ្ឋមន្រ្តីក្រសួងការបរទេសវៀតណាមលោក To Anh Dung និងរដ្ឋលេខាធិការអង់គ្លេស លោក Harriett Baldwin

កិច្ចសន្ទនាយុទ្ធសាស្ត្រវៀតណាម - អង់គ្លេសបានអះអាងថាប្រទេសទាំងពីរបានគាំទ្រយ៉ាងពេញទំហឹងចំពោះពាណិជ្ជកម្មសេរីសកលលោកនិងអបអរសាទរចំពោះការចុះហត្ថលេខាលើកិច្ចព្រមព្រៀងពាណិជ្ជកម្មសេរី EU-វៀតណាម(EVFTA) នាថ្ងៃទី ៣០ ខែមិថុនាកន្លងទៅ។ វៀតណាមនិង អង់គ្លេសរំពឹងថាទំនាក់ទំនងពាណិជ្ជកម្មនឹងបន្តរីកចម្រើនថែមទៀតនៅពេលដែលអង់គ្លេសចាកចេញពី EU (ឬហៅថា Brexit )។ ទន្ទឹមនឹងនេះភាគីទាំងពីរក៏បានពិភាក្សាអំពីសំណើរបស់ អង់គ្លេសដើម្បីផ្លាស់ប្តូរកិច្ចព្រមព្រៀងសហប្រតិបត្តិការនិងទំនាក់ទំនងភាពជាដៃគូគ្រប់ជ្រុងជ្រោយរវាងវៀតណាមនិងសហភាពអឺរ៉ុប (PCA) ។ ប្រការនេះនឹងជំរុញទំនាក់ទំនងរវាងសហគ្រាសវៀតណាមនិងអង់គ្លេសឆ្ពោះទៅរកការប្រកួតប្រជែងនិងប្រតិបត្តិការប្រកបដោយប្រសិទ្ធភាពផងដែរ។​ ក្នុងជំនួបនេះ ភាគីអង់គ្លេសក៏បានអបអរសាទរចំពោះការដែលវៀតណាមត្រូវបានជ្រើសរើសជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ​ ហើយភាគីទាំងពីរឯកភាពគ្នាសហការយ៉ាងជិតស្និទ្ធ ក្នុងការធ្វើជាប្រធានអាស៊ាននៅឆ្នាំ២០២០ របស់វៀតណាម។

អនុរដ្ឋមន្រ្តីក្រសួងការបរទេសវៀតណាមលោក To Anh Dung

ប្រទេសទាំងពីរនឹងធ្វើការយ៉ាងជិតស្និទ្ធដើម្បីត្រៀមរៀបចំសន្និសីទស្ដីពីបម្រែបម្រួលអាកាសធាតុ COP26 ដើម្បីពង្រឹងការប្តេជ្ញាចិត្តរបស់ខ្លួនក្នុងការកាត់បន្ថយការបំភាយឧស្ម័ននិងលើកកម្ពស់ការប្រើប្រាស់ថាមពលកកើតឡើងវិញនៅវៀតណាម។ ភាគីទាំងពីរក៏បានចែករំលែកទស្សនៈទៅវិញទៅមកលើបញ្ញាសមុទ្រខាងកើតនាពេលថ្មីៗនេះ ដោយសម្តែងនូវការគាំទ្រចំពោះការដោះស្រាយដោយសន្តិវិធីនៃជម្លោះនៅសមុទ្រខាងកើតដោយឈរលើមូលដ្ឋានច្បាប់អន្តរជាតិ រួមមានច្បាប់ UNCLOS ដើម្បីរួមចំណែកក្នុងការលើកកម្ពស់សន្តិភាព ស្ថិរភាព អភិវឌ្ឍនិងវិបុលភាពនៅក្នុង តំបន់ផងដែរ៕

（ដោយ ហេង វុធ្ធី）

（ដោយ ហេង វុធ្ធី）