យុគសម័យ - នាព្រឹកថ្ងៃទី ២៣ ខែមិថុនា នៅស្រុក Ngoc Hoi (ខេត្ត Kon Tum) នាយកដ្ឋានឃោសនាអប់រំមជ្ឈិមសហការជាមួយក្រសួងការបរទេសវៀតណាម ក្រសួងឧស្សាហកម្មនិងពាណិជ្ជកម្មវៀតណាម បញ្ជាការដ្ឋានកងទ័ពព្រំដែន និងគណៈកម្មាធិការបក្សខេត្ត Kon Tum បានរៀបចំសន្និសីទស្តីពីការបណ្តុះបណ្តាលនិងផ្សព្វផ្សាយលទ្ធផលនៃការគ្រប់គ្រងព្រំដែនគោកវៀតណាម - កម្ពុជាក្នុងឆ្នាំ ២០២០ ។
អនុប្រធានគណៈកម្មការឃោសនានិងអប់រំមជ្ឈិម លោក Bui Truong Giang (រូបថត៖ TVP)
ថ្លែងមតិក្នុងសន្និសីទនេះ អនុប្រធានគណៈកម្មការឃោសនានិងអប់រំមជ្ឈិម លោក Bui Truong Giang បានសង្កត់ធ្ងន់ពីសារសំខាន់នៃការបោះបង្គោលព្រំដែននិងការងារខ័ណ្ឌសីមាក៏ដូចជាការគ្រប់គ្រងនិងការពារព្រំដែនជាតិសម្រាប់ការអភិវឌ្ឍន៍សេដ្ឋកិច្ច - សង្គមធ្វើឱ្យប្រសើរឡើងនូវជីវភាពរស់នៅរបស់ប្រជាជន ជាពិសេសប្រជាជននៅតាមតំបន់ព្រំដែន។ កម្លាំងដែលចូលរួមដោយផ្ទាល់ក្នុងការគ្រប់គ្រងព្រំដែនគោកលើដីជាក់ស្តែង ជាពិសេសកម្មាភិបាល យុទ្ធជន និងប្រជាជននៃជនជាតិភាគតិចនៅតាមតំបន់ព្រំដែន នឹងក្លាយជាកម្លាំងស្នូលក្នុងការការពារព្រំដែននិងបង្គោលតម្រុយព្រំដែនរបស់មាតុភូមិ។
ហេតុដូច្នេះការឃោសនានិងផ្សព្វផ្សាយអំពីខ្លឹមសារទាក់ទងនឹងការគ្រប់គ្រងព្រំដែនគឺចាំបាច់ណាស់ដែលត្រូវធ្វើជាប្រចាំដើម្បីឱ្យប្រជាពលរដ្ឋបានយល់ដឹងច្បាស់និងមានទំនួលខុសត្រូវក្នុងការរក្សានិងការពារព្រំដែននៃមាតុភូមិ ព្រមទាំងរួមចំណែកដល់ការជំរុញទំនាក់ទំនងវៀតណាម - កម្ពុជា ក៏ដូចជាបង្កើតកុងសុងស៊ីសនិងឯកភាពជាឯកច្ឆ័ន្ទខ្ពស់លើគោលការណ៍និងគោលមាគ៌ា របស់បក្សនិងរដ្ឋក្នុងការងារគ្រប់គ្រងព្រំដែនផងដែរ។
ទិដ្ឋភាពនៃសន្និសីទនេះ (រូបថត៖ TVP)
នាពេលខាងមុខនេះ កម្លាំងដែលអនុវត្តការឃោសនាបោះបង្គោលព្រំដែននិងការងារខ័ណ្ឌសីមា ព្រំដែនគោកវៀតណាម - កម្ពុជាគួរតែប្រកាន់ខ្ជាប់នូវភាពជាក់ស្តែងនិងផ្តោតសំខាន់លើការចាប់យកស្ថានភាពនៃសាធារណមតិ និងមនោគមវិជ្ជាក្នុងសំណាក់ប្រជាជនជាពិសេសនៅតាមតំបន់ព្រំដែនដើម្បីចាត់វិធានការឃោសនាឲ្យបានសមស្រប ព្រមទាំងរកឃើញឲ្យបានទាន់ពេលវេលា ការពារនិងប្រយុទ្ធប្រឆាំងនឹងទស្សនៈ ព័ត៌មាននិងសកម្មភាពរំលោភបំពានព្រំដែនដែនដី និងបញ្ហាជនជាតិនិយមដើម្បីបំផ្លាញធ្លុងសាមគ្គីភាពប្រជាជនទាំងមូលនិងមិត្តភាពប្រពៃណីរដ៏ល្អប្រពៃរវាងវៀតណាមនិងកម្ពុជា៕
(បកប្រែដោយ ហេងវុធ្ធី)
(ប្រភពព័ត៌មាន: tapchithongtindoingoai.vn)
មតិពីមិត្តអ្នកអាន