យុគសម័យ - នាថ្ងៃទី២៧ ខែមិថុនា នៅមជ្ឈមណ្ឌលពិព័រណ៌និងពាណិជ្ជកម្មអន្តរជាតិឡាវ (ITECC) នៅទីក្រុងវៀងចន្ទ (ប្រទេសឡាវ) នាយកដ្ឋានជម្រុញពាណិជ្ជកម្មនៃក្រសួងឧស្សាហកម្មនិងពាណិជ្ជកម្មវៀតណាម សហការជាមួយនាយកដ្ឋានជម្រុញពាណិជ្ជកម្មនៃក្រសួងឧស្សាហកម្មនិងពាណិជ្ជកម្មឡាវ បានរៀបចំឡើងពិធីបើកពិព័រណ៍ពាណិជ្ជ កម្មវៀតណាម - ឡាវឆ្នាំ ២០១៩ (VIETLAO EXPO 2019) ដោយមានការចូលរួមរបស់ស្តង់ទំនិងចំនួន ២៤០ ស្តង់មកពីអង្គភាពអាជីវកម្មប្រមាណ ១៨០ ដែលទាក់ទិននឹងវិស័យឧសថ ឧបករណ៍សុខាភិបាល សំណង និងជលផលជាដើម។
ពិព័រណ៌ពាណិជ្ជកម្មវៀតណាម - ឡាវជួយពង្រឹងកិច្ចសហប្រតិបត្តិការលើគ្រប់ជ្រុងជ្រោយរវាងប្រទេសទាំងពីរ (រូបថត៖ baonhandan.vn)
ថ្លែងនៅក្នុងពិធីបើកពិព័រណ៌នេះ អនុរដ្ឋមន្រ្តីក្រសួងឧស្សាហកម្មនិងពាណិជ្ជកម្មវៀតណាម លោកCao Quoc Hung បានលើកឡើងថា ក្នុងសម័យធ្វើសមាហរណកម្មនាបច្ចុប្បន្ននេះ ទំនាក់ទំនងក្នុងវិស័យឧស្សាហកម្មនិងពាណិជ្ជកម្មមានសារៈសំខាន់ ហើយដើម្បីជម្រុញកិច្ចសហប្រតិបត្តិការក្នុងការរីកចម្រើននេះ វៀតណាមនិងឡាវចាំបាច់ត្រូវពន្លឿនការប្តេជ្ញានិងអនុវត្តកិច្ចព្រមព្រៀងនានាដែលបានចុះហត្ថលេខា ព្រមទាំងអភិវឌ្ឍន៍ហេដ្ឋារចនាសម្ព័ន្ធចរចរណ៍និងហេដ្ឋារចនាសម្ព័ន្ធពាណិជ្ជកម្មផងដែរ។
រីឯខ្លួនវិញ អនុរដ្ឋមន្រ្តីក្រសួងឧស្សាហកម្មនិងពាណិជ្ជកម្មឡាវលោក Brakethong Phitthumma បានអះអាងថាពិព័រណ៍ពាណិជ្ជកម្មវៀតណាម - ឡាវប្រចាំឆ្នាំគឺជាព្រឹត្តិការណ៍ដ៏សំខាន់ និងមានអត្ថន័យក្នុងការជួយពង្រឹងកិច្ចសហប្រតិបត្តិការលើគ្រប់ជ្រុងជ្រោយរវាងឡាវនិងវៀតណាម ព្រមទាំងជួយជំរុញកិច្ចសហប្រតិបត្តិការសេដ្ឋកិច្ច - ពាណិជ្ជកម្មឡាវ - វៀតណាមអភិវឌ្ឍកាន់តែខ្លាំងក្លាថែមទៀតពីមួយថ្ងៃទៅមួយថ្ងៃ៕
(បកប្រែដោយ ហេង វុធ្ធី)
មតិពីមិត្តអ្នកអាន