រដ្ឋមន្ត្រីការបរទេសខ្មែរ លោកប្រាក់ សុខុន បានអញ្ជើញ លោក Pham Binh Minh រដ្ឋមន្ត្រីការបរទេសវៀតណាម មកធ្វើជាសហប្រធានជាមួយលោក ដើម្បីដឹកនាំកិច្ចប្រជុំគណៈកម្មការចម្រុះកម្ពុជា-វៀតណាមលើកទី១៧ ស្តីពីកិច្ចសហប្រតិបត្តិការសេដ្ឋកិច្ច វប្បធម៌ វិទ្យាសាស្ត្រ និងបច្ចេកទេសពីថ្ងៃទី២០-២១ សីហា ឆ្នាំ២០១៩។ នេះ បើយោងតាមសេចក្ដីប្រកាសព័ត៌មាន របស់ក្រសួងការបរទេស និងសហប្រតិបត្តិការអន្តរជាតិ របស់កម្ពុជា នៅថ្ងៃទី១៦ សីហា។
លោកប្រាក់ សុខុន និង លោក Pham Binh Minh
តាមសេចក្ដីប្រកាសព័ត៌មាន កិច្ចប្រជុំគណៈកម្មការចម្រុះកម្ពុជា-វៀតណាម ត្រូវបានរៀបចំឡើងជាទៀងទាត់ក្នុងគោលបំណងធ្វើបច្ចុប្បន្នភាព វឌ្ឍនភាពកិច្ចសហប្រតិបត្តិការ និងរិះរកវិធី និងមធ្យោបាយនានា ដើម្បីពង្រីកថែមទៀតនូវវិសាលភាព និងប្រសិទ្ធភាពនៃទំនាក់ទំនងទ្វេភាគីរវាងប្រទេសទាំងពីរ នៅក្នុងវិស័យនានា។ កិច្ចប្រជុំនេះ ក៏នឹងផ្តល់កាលានុវត្តភាពសម្រាប់ភាគីទាំងពីរ ធ្វើការផ្លាស់ប្តូរទស្សនៈគ្នាលើកិច្ចសហប្រតិបត្តិការ ក្នុងក្របខ័ណ្ឌតំបន់ និងអន្តរជាតិ ដែលមានផលប្រយោជន៍ទៅវិញទៅមកផងដែរ។
ភាគីកម្ពុជា ចាត់ទុកកិច្ចប្រជុំគណៈកម្មការចម្រុះកម្ពុជា-វៀតណាមលើកទី១៧នេះ នឹងជួយលើកកម្ពស់ថែមទៀតនូវចំណងមិត្តភាពជាភាតរៈយូរអង្វែង និងភាពជាអ្នកជិតខាងល្អរវាងប្រទេសទាំងពីរ ក៏ដូចជារួមចំណែកដល់សន្តិភាព និងវិបុលភាពនៅក្នុងតំបន់ និងសកលលោក៕
(សរុបដោយវិច្ឆិកា)
មតិពីមិត្តអ្នកអាន