កិច្ចប្រជុំកំពូលមេគង្គ-សាធាណរដ្ឋកូរ៉េ លើកទីមួយ បានចាប់ផ្តើមដំណើរការហើយ នាព្រឹក ថ្ងៃទី២៧ ខែវិច្ជិកា ឆ្នាំ២០១៩ នៅទីក្រុងប៊ូសាន សាធារណរដ្ឋកូរ៉េ ដែលឯកឧត្តម មូន ចេអ៊ីន ប្រធានាធិបតីសាធារណរដ្ឋកូរ៉េក្នុងនាមជាម្ចាស់ផ្ទះ បានទទួលបដិសណ្ឋារកិច្ចថ្នាក់ដឹកនាំនៃប្រទេសដងទន្លេមេគង្គ រួមមាន ឯកឧត្តម ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តការអន្តរជាតិ តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជា លោកជំទាវ អង់ សានស៊ូជី ទីប្រឹក្សារដ្ឋ នៃប្រទេសមីយ៉ាន់ម៉ា តំណាងឱ្យរដ្ឋាភិបាលមីយ៉ាន់ម៉ា ឯកឧត្តម ប្រាយុទ្ធ ចាន់អូចា នាយករដ្ឋមន្រ្តី នៃព្រះរាជាណាចក្រថៃ ឯកឧត្តម ង្វៀន សួនហ្វុក នាយករដ្ឋមន្រ្តីវៀតណាម និងឯកឧត្តម ថង លូនស៊ីសូលីត នាយករដ្ឋមន្រ្តីឡាវ។
ក្នុងកិច្ចប្រជុំកំពូលមេគង្គ និងសាធារណរដ្ឋកូរ៉េលើកទីមួយ ឯកឧត្តមប្រធានាធិបតី មូន ចេអ៊ីន បានលើកឡើងថា ប្រទេសក្នុងតំបន់ទន្លេមេគង្គបានដើរតួនាទីយ៉ាងសំខាន់ទាំងបញ្ហាតំបន់ក៏ដូចជាបញ្ហាសន្តិភាពនៅក្នុងឧបទ្វីបកូរ៉េផងដែរ។ ឯកឧត្តមប្រធានាធិបតីបានបន្ថែមថា ប្រទេសកូរ៉េខាងត្បូង នឹងនៅជាមួយប្រទេសមេគង្គ ហើយជឿជាក់ថាការអភិវឌ្ឍក្នុងតំបន់មេគង្គគឺជាបញ្ហារបស់កូរ៉េ។
នៅក្នុងកិច្ចប្រជុំនោះ ឯកឧត្ដមប្រធានាធិបតីនៃសាធារណរដ្ឋកូរ៉េក៏មិនភ្លេចលើកឡើងអំពីសម្ដេចតេជោនាយករដ្ឋមន្ត្រី ហ៊ុន សែន ដែលបានជំរុញឱ្យមានកិច្ចប្រជុំកំពូលមេគង្គ-កូរ៉េ ដើម្បីមកជំនួសកិច្ចប្រជុំថ្នាក់រដ្ឋមន្ត្រីធ្វើឡើងពីរឆ្នាំម្ដង។ ឯកឧត្ដមបាន សង្កត់ធ្ងន់ថា ប្រទេសតំបន់មេគង្គបានក្លាយទៅជាទឹកដីនៃឱកាស ហើយកូរ៉េខាងត្បូងគឺជាមិត្តភក្ដិពិសេសសម្រាប់ប្រទេសក្នុងតំបន់ទន្លេមេគង្គ ដើម្បីជំរុញឱ្យតំបន់នេះមានកិច្ចសហប្រតិបត្តិការ និងវិបុលភាពដើម្បីជួយជំរុញតំបន់អាស៊ានសម្រាប់យុគសម័យអាស៊ីប៉ាស៊ីហ្វិក។
ជាមួយគ្នានេះ បើទោះបីជាសម្តេចតេជោ ហ៊ុន សែន អវត្តមានអញ្ជើញចូលរួមកិច្ចប្រជុំនៅទីក្រុងប៊ូសាន ប្រទេសកូរ៉េក៏ដោយ ក៏ឯកឧត្តមប្រធានាធិបតី មូន ចេអ៊ីន បានថ្លែងអំណរគុណចំពោះសម្តេចតេជោ ហ៊ុន សែន ដែលបានខិតខំប្រឹងប្រែងជំរុញឱ្យមានកិច្ចប្រជុំកំពូលមេគង្គ-សាធារណរដ្ឋកូរ៉េនេះឡើង។ ឯកឧត្តមប្រធានាធិបតីកូរ៉េបានថ្លែងថា "មេគង្គបានក្លាយជាទឹកដីនៃឱកាស" ហើយប្រទេសកូរ៉េខាងត្បូងបានក្លាយជា "មិត្តពិសេស"របស់មេគង្គ ព្រោះប្រទេសទាំងនេះបានបង្កើតទំនាក់ទំនងនៃវិបុលភាពជាមួយអាស៊ាន។
គួរបញ្ជាក់ដែរថា សាធារណរដ្ឋកូរ៉េ និងប្រទេសតំបន់ទន្លេមេគង្គមានពាណិជ្ជកម្មរួមប្រមាណ ៨៤ពាន់លានដុល្លារអាម៉េរិក គិតត្រឹមឆ្នាំ២០១៨ ហើយបានកើនឡើងជាងពីរដងក្នុងរយៈពេល៨ឆ្នាំកន្លងទៅ៕
(ប្រភព៖ www.akp.gov.kh)