សៀវភៅដែលមានចំណងជើងថា “សម្តេចហ៊ុន សែន វីរបុរសសង្ហា ដើបញ្ច្រាស់ទិស ប្រឆាំងកូវីដ១៩” នឹងត្រូវបោះពុម្ពនិងផ្សព្វផ្សាយជាសាធារណៈ ក្នុងពេលឆាប់ៗខាងមុខនេះ។នេះបើតាមការបញ្ជាក់របស់លោក ពៅ សុខ ទីប្រឹក្សាផ្ទាល់សម្តេចតេជោនាយករដ្ឋមន្ត្រីហ៊ុន សែន និងជាអ្នកនិពន្ធវណ្ណកម្មមួយនេះ។
សៀវភៅដែលមានចំណងជើងថា “សម្តេចហ៊ុន សែន វីរបុរសសង្ហា ដើបញ្ច្រាស់ទិស ប្រឆាំងកូវីដ១៩” ។
តាមអ្នកនិពន្ធ សៀវភៅ ដែលមានកម្រាស់ជាង២៧០ទំព័រនេះនឹងបង្ហាញពីភាពឆ្លាតវៃ នៃសិល្បៈក្នុងការដឹកនាំនិងការគ្រប់គ្រងរបស់ប្រមុខរាជរដ្ឋាភិបាល ក្នុងការទប់ស្កាត់ ប្រយុទ្ធប្រឆាំង ជំងឺកូវីដ១៩ រហូតទទួលបានជោគជ័យ១០០ភាគរយក្នុងរលកទី១ (ដំណាក់កាលទី១)នេះ។ លោកបានបន្តថា បញ្ហាកូវីដ១៩នេះ ប្រសិនបើមេដឹកនាំគ្មានភាពឆ្លាតវៃ និងហ្មត់ចត់ ល្អិតល្អន់ទេនោះ នោះនឹងមិនអាច ការពារប្រជាពលរដ្ឋរបស់ខ្លួនឱ្យចៀសផុតពីគ្រោះថ្នាក់ ដែលបង្កឡើងដោយជំងឺកាចសាហាវនេះបានទេ ដូចប្រសាសន៍សម្តេចតេជោ ដែលបានលើកឡើងក្នុងស្និសីទសារព័ត៌មានកន្លងមកថា មិនថា ប្រទេសនោះមានបច្ចេកវិជ្ជាទំនើបខ្លាំងប៉ុន្មានទេ ប៉ុន្តែ កត្តាសំខាន់បំផុត គឺតើមេដឹកនាំប្រទេសនោះមានភាពវៃឆ្លាត និងពូកែចាត់ចែងប៉ុនណា?។
គួររម្លឹកថា តាមបទពិសោធន៍ ក្នុងដំណាក់កាល(រលកទី១)នេះ បណ្តាប្រទេសមហាអំណាចធំៗ ដូចជាបារាំង អាម៉េរិកាំង រុស្សី ចិន អាល្លឺម៉ង់ អ៊ីតាលី អេស្ប៉ាញ និងប្រទេសដទៃទៀត ដែលសុទ្ធតែ មានបច្ចេកវិជ្ជាវេជ្ជសាស្ត្រល្អៗ គ្រូពេទ្យពូកែៗ ប៉ុន្តែ ពួកគេនៅតែមិនអាចទប់ស្កាត់ ឬការពារប្រជាជនរបស់គេឱ្យរួចផុតពីគ្រោះថ្នាក់បាន។ ផ្ទុយទៅវិញ នៅកម្ពុជា តាមទស្សនៈសម្តេចតេជោហ៊ុន សែន ជាប្រទេសតូច តែបេះដូងធំ ចិត្តទូលាយ មិនត្រឹមតែ ការពារប្រជាជនខ្លួនឱ្យរួចផុត ពីជំងឺឆ្លងកាចសាហាវនេះទេ ថែមទាំងបានជួយប្រជាជនពិភពជាង២ពាន់នាក់ នៅលើនាវាវេស្ទ័រដាម ដែលប្រទេសចំនួន៦បានបោះបង់ចោលលើមហាសាគរ ឱ្យមានក្តីសង្ឃឹមថែមទៀតផង។ មនុស្សទាំងជាង២ពាន់នាក់លើនាវានោះ ក៏មានជនជាតិអាម៉េរិកជាង៦០០នាក់ផងដែរ ដែលកាយវិការនេះ ធ្វើឱ្យសម្តេចតេជោហ៊ុន សែន ក្លាយជាវីរបុរសសង្ហា ដើរបញ្ច្រាសទិស ប្រឆាំងកូវីដ១៩។
លោកទីប្រឹក្សាបានរំលេចអំពីសម្តេចតេជោថា កាយវិការ ដ៏គួរឱ្យគោរព ចំពោះសិល្បៈ នៃភាពជាអ្នកដឹកនាំ របស់សម្តេចតេជោហ៊ុន សែន នៅអំឡុងពេលនេះ ទោះបីកន្លងមក មានបណ្តាប្រទេសខ្លះរិះគន់ ឬសើចចំអកឱ្យកម្ពុជា ឬមានការវាយតម្លៃដោយខុសឆ្គង ពីបណ្តាបងប្អូនគណបក្សប្រឆាំង ប៉ុន្តែ គុណសម្បត្តិដ៏ធំធេងរបស់សម្តេច សម្តេចហ៊ុន សែន បានធ្វើឱ្យកម្ពុជា ក្លាយជាប្រទេស ដ៏មានមោទកភាពល្បីល្បាញគួរឱ្យគោរព លើឆាកអន្តរជាតិ ជាប្រវត្តិសាស្ត្រ។
លោក ពៅ សុខ ទីប្រឹក្សាផ្ទាល់សម្តេចតេជោនាយករដ្ឋមន្ត្រីហ៊ុន សែន និងជាអ្នកនិពន្ធសៀវភៅដែលនឹងចេញផ្សាយ។
លោកពៅ សុខ បញ្ជាក់ថា ចំពោះការចងក្រង និងបោះពុម្ពសៀវភៅនេះ គឺ ដើម្បីជាតឹកតាំងជាប្រវត្តិសាស្ត្រ ជាសារណា ឬនិក្ខេបបទ នៃមនុស្សជាតិ ទាំងថ្នាក់ជាតិ ថ្នាក់តំបន់ និងពិភពលោក ដែលបញ្ជាក់ថា កម្ពុជា ជាប្រទេសតូច តែចិត្តធំ ចិត្តទូលាយ និងមានមេដឹកនាំល្អ គួរឱ្យកោតសរសើរ នាសវត្សរ៍ទី២១ ក្នុងការប្រយុទ្ធប្រឆាំងវីរុសកូវីដ១៩ ដែលគេមិនអាចបដិសេធបាន ព្រោះដំណាក់កាលនេះ ពុំទាន់មានប្រទេសណាមួយ អាចធ្វើបានល្អដូចកម្ពុជាឡើយ កម្ពុជា ពិតជាមានមោទកភាព។
លោកបានបង្ហើបទៀតថា សៀវភៅ (សម្តេចហ៊ុន សែន វីរបុរសសង្ហា ដើរបញ្ច្រាស់ទិស ប្រឆាំងកូវី១៩ )នេះ នឹងបោះពុម្ពផ្សាយដំណាលគ្នា ឬមុនក្រោយគ្នាបន្តិចបន្តួច ជាមួយសៀវភៅ ដែលមានចំណងជើងថា “សម្តេចហ៊ុន សែន កំពូលស្ថាបនិក និងបិតា សន្តិភាពរបស់កម្ពុជា”៕
(ប្រភពព័ត៌មាន: rasmeinews.com)
មតិពីមិត្តអ្នកអាន