មណីយដ្ឋានទឹកឈូនិងភ្នំបូកគោ ជាតំបន់ទេសចរណ៍ដ៏ទាក់ទាញបំផុតសម្រាប់ខេត្តកំពត ខណៈដែលភ្ញៀវទេសចរទៅលេងខេត្តកំពតមិនដែលមើលរំលងតំបន់ទាំងពីរនេះឡើយ។
រមណីយដ្ឋានភ្នំបូកគោ និងទឹកឈូជាគោលដៅទេសចរណ៍ដ៏ទាក់ទាញបំផុតសម្រាប់ខេត្តកំពតប្រទេសកម្ពុជា
លោក សយ ស៊ីណុល ប្រធានមន្ទីរទេសចរណ៍ខេត្តកំពតបានអះអាងថា រមណីយដ្ឋានទឹកឈូនិងភ្នំបូកគោ ជាតំបន់ទេសចរណ៍ដ៏ទាក់ទាញបំផុត សម្រាប់ខេត្ត ខណៈដែលតំបន់ទាំងអស់នេះទទួលភ្ញៀវទេសចរទៅលេងកម្សាន្តរហូតដល់ជាង២១ម៉ឺននាក់នាពេលកន្លងមក។
លោកបន្តថា តំបន់រមណីយដា្ឋនទឹកឈូ គឺជាគោលដៅទេសចរណ៍ដ៏សំខាន់បំផុតសម្រាប់ខេត្ត ដែលមានទឹកហូរកាត់ស្ពានកំពង់បាយ មានចម្ងាយជាង៨គីឡូម៉ែត្រនិងមានកន្លែងលេងកម្សាន្ត៦កន្លែង ដែលអាចឱ្យភ្ញៀវទេសចរអាចងូតទឹក ជិះខ្សែកាបឆ្លងព្រែក ជិះទូក ជិះក្តាររំអិល ជាដើម និង អាចគយគន់នូវទេសភាពដំណាំហូបផ្លែនៅអមសងខាងទឹកធ្លាក់ ជាពិសេសចម្ការទុរេនដ៏ល្បីល្បាញប្រចាំខេត្ត ដែលមានភ្ញៀវទេសចរប្រមាណជាង៤០ភាគរយបានទៅតំបន់នោះ ។ លោកបានឱ្យដឹងថា ចំណែកគោលដៅមួយទៀតគឺ រមណីយដ្ឋានឋានសួគ៌បូកគោដែលបានទាក់ទាញភ្ញៀវទេសចរប្រមាណ៣០ភាគរយ ដែលនៅតាមផ្លូវឡើងលើកំពូលភ្នំ យើងត្រូវជិះកាត់តាមចង្កេះភ្នំមានព្រៃព្រឹក្សាខៀវស្រងាត់អមជុំវិញផ្លូវ ។
រមណីយដ្ឋានភ្នំបូកគោ និងទឹកឈូជាគោលដៅទេសចរណ៍ដ៏ទាក់ទាញបំផុតសម្រាប់ខេត្តកំពតប្រទេសកម្ពុជា
លោកបានបន្តទៀតថា ពេលឡើងដល់កំពូលភ្នំយើងអាចងូតទឹកជ្រោះលេងកម្សាន្ត ញាំអាហារ ថតយករូបសំណាកយាយម៉ៅដែលមានកម្ពស់២០ម៉ែត្រ មើលសំណង់ចាស់ៗ និងអាចស្នាក់នៅសណ្ឋាគារដែលមាននៅលើកំពូលភ្នំបានផងដែរ ។ លោកបានឱ្យដឹងទៀតថា ចំពោះថ្ងៃឈប់សម្រាកមន្ទីរណែនាំសណ្ឋាគារ បញ្ចុះតម្លៃមកត្រឹម៤០ទៅ៤៥ដុល្លារ ដើម្បីធ្វើយ៉ាងណាទាក់ទាញភ្ញៀវទេសចរបន្តស្នាក់នៅនិងដើរលេងតំបន់នោះកាន់តែច្រើន ។
សំឡេង« នៅក្នុងក្រុងយើងបានរៀបចំទូកសម្រាប់ជិះលេងពេលរាត្រី ដែលជាផលិតផលមួយដ៏សំខាន់ សម្រាប់ការស្នាក់នៅរបស់ភ្ញៀវទេសចរដែលទៅលេងខេត្តកំពត អ៉ីចឹងយើងមានន័យថា យើងមានគោលដៅមួយចំនួនធំដែលយើងបានធ្វើ ជំរុញផលិតផលនិងការរៀបចំសេវាកម្ម ។ ក្នុងក្របខ័ណ្ឌនៃការពង្រឹងសេវាកម្មនេះមន្ទីរបានសហការជាមួយអ្នកពាក់ព័ន្ធធ្វើការរៀបចំសណ្តាប់ធ្នាប់ អនាម័យ បរិស្ថាន ក៏ដូចជាការរក្សាតម្លៃដែលជាចំណុចមួយរសើបធំនៃការទទួលបាននៃភ្ញៀវទេសចរ »។
រមណីយដ្ឋានភ្នំបូកគោ និងទឹកឈូជាគោលដៅទេសចរណ៍ដ៏ទាក់ទាញបំផុតសម្រាប់ខេត្តកំពតប្រទេសកម្ពុជា
យោងតាមរបាយការណ៍បានឱ្យដឹងថា នៅទូទាំងខេត្តកំពតមានសេវាកម្មទេសចរណ៍ សណ្ឋាគារ ផ្ទះសំណាក់ ភោជនីយដ្ឋាន អាហារដ្ឋាន និងសេវាកម្មផ្សេងៗដែលបានចុះបញ្ជីជាង ៦៨០កន្លែង សម្រាប់បម្រើជូនអ្នកទេសចរដែលទៅលេងកម្សាន្តនៅទីនោះ ៕
មតិពីមិត្តអ្នកអាន