មន្ត្រីជាន់ខ្ពស់ក្រសួងក្រសួងទេសចរណ៍បានគូសបញ្ជាក់ថា នៅថ្ងៃទី១នៃព្រះរាជពិធីបុណ្យ អុំទូក បណ្ដែតប្រទីប និងសំពះព្រះខែ អកអំបុក វេទិការទសចរណ៍ ដែលត្រូវបានរៀបចំ សម្រាប់ភ្ញៀវទេសចរណ៍គឺមានភ្ញៀវទេសចរបរទេសចំនួន១.៩៨១នាក់ បានចូលអង្គុយ ទស្សនាការប្រណាំងទូក និងបណ្ដែតប្រទីបលើវេទិកាទេសចរណ៍។
ភ្ញៀវទេសចរបរទេសជិត២.០០០នាក់ ចូលរួមទស្សនាក្នុងព្រះរាជពិធីបុណ្យ អំទូកលើវេទិកាទេសចរណ៍ កាលពីថ្ងៃទី១។ (ប្រភព៖ pressocm.gov.kh)
លោក គុជ បញ្ញាសា អនុរដ្ឋលេខាធិការ ក្រសួងទេសចរណ៍ បានឲ្យដឹងនេះថា ជារៀងរាល់ឆ្នាំ ក្រសួងទេស ចរណ៍តែងតែបានរៀបចំឱ្យមានវេទិកាទេសចរណ៍ សម្រាប់ឱ្យភ្ញៀវទេសចរបានចូលទស្សនាការប្រណាំងទូក បណ្ដែតប្រទីប និងសំពះព្រះខែ អកអំបុក នៅមុខព្រះរមរាជវាំង រយៈពេលបីថ្ងៃពេញ។ ឯកឧត្ដមបានបន្ដថា វេទិកាទេសចរណ៍នេះ មានការបកប្រែជា៣ភាសា គឺ ភាសាអង់គ្លេស បារាំង និងភាសាចិន និងការផ្តល់ជូននូវទឹកបរិសុទ្ធ ភេសជ្ជៈ និងសេវាកម្មផ្សេងៗទៀតផងដែរដើម្បីទទួលរាក់ទាក់ជូនភ្ញៀវអន្តរជាតិនានា ដែលអញ្ជើញចូលរួម ទស្សនា ព្រះពិធីបុណ្យជាតិដ៏ធំមួយនេះ។
លោក គុជ បញ្ញសា បានបន្ដទៀតថា សម្រាប់ព្រះពិធីបុណ្យថ្ងៃទី១ កាលពីថ្ងៃទី១០ ខែវិច្ឆិកា ឆ្នាំ២០១៩ ទទួលភ្ញៀងអន្តរជាតិ ចំនួន១.៩៨១នាក់។ លោកអនុរដ្ឋលេខាធិការបានបន្ថែមថា ការរៀបចំវេទិកាទេសចរណ៍នេះ គឺដើម្បីឱ្យភ្ញៀវទេសចរបានកម្សាន្ត និងឈ្វេងយល់ពីប្រពៃណី ទំនៀមទម្លាប់ វប្បធម៌របស់ខ្មែរ។ វេទិកាទេសចរណ៍នេះ សម្រាប់អង្គុយទស្សនាការប្រណាំងទូកនៅមុខព្រះរមរាជវាំងនេះ គឺជាការទាក់ទាញភ្ញៀវវទេសចរអន្តជាតិ ឱ្យមកកម្ពុជាកាន់តែច្រើន ជាពិសេសគឺលើកទឹកចិត្តដល់ជនបរទេសស្វែងយល់ពីវប្បធម៌ខ្មែរបន្ថែមទៀត។
លោក ថោង ខុន រដ្ឋមន្ត្រីក្រសួងទេសចរណ៍បានបង្ហាញការរំពឹងទុកថា ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុកនៅឆ្នាំនេះនឹងទទួលបានភ្ញៀវទេសចរចូលរួមទស្សនាច្រើនជាងឆ្នាំមុនៗ។ លោករដ្ឋមន្ត្រីក៏បានអំពាវនាវដល់ប្រជាពលរដ្ឋ និងភ្ញៀវទេសចរពិសេសអាជីវករលក់ដូរទាំងឡាយសូមចូលរួមថែរក្សាអនាម័យ សុវត្ថិភាពចំណីអាហារ ត្រូវទុកដាក់សំរាមឱ្យបានត្រឹមត្រូវ គិតគូរលើបញ្ហាបរិស្ថាន និងសោភ័ណភាពក្នុងព្រះរាជពិធីបុណ្យទាំងមូល ហើយសូមចូលរួមថែរក្សាសន្តិសុខ សណ្ដាប់ធ្នាប់សាធារណៈក្នុងព្រះរាជពិធីបុណ្យ និងរាជធានីភ្នំពេញទាំងមូលឱ្យបានល្អប្រសើរផងដែរ៕
(សរុបដោយវិច្ឆិកា)
មតិពីមិត្តអ្នកអាន