កន្លងមកកម្ពុជានាំចេញចេកអំបូងលឿងទៅកាន់ប្រទេសវៀតណាម ដែលប្រទេសនេះជាអ្នកនាំចេញបន្ត។ នៅខែសីហាឆ្នាំ២០១៨ ភាគីចិនបានយល់ព្រមឲ្យកម្ពុជានាំចេញផ្លែចេកទៅទីផ្សាររបស់ខ្លួនដោយផ្ទាល់។ កិច្ចព្រមព្រៀងនោះមិនបានកំណត់ចេកប្រភេទណានោះទេ តែមន្ត្រីកសិកម្មរបស់កម្ពុជាអះអាងថាមានតែចេកអំបូងលឿងនោះទេ ដែលមានលក្ខណៈគ្រប់គ្រាន់សម្រាប់ការនាំចេញនេះ។ ហើយនៅថ្ងៃនេះ ការនាំចេញចេកអំបូងលឿងដោយផ្ទាល់ទៅប្រទេសចិន បានចាប់ផ្ដើម។
ចេកអំបូងលឿងបានវេចខ្ចប់ដើម្បីនាំចេញ។ (រូបថត៖ ទំព័រហ្វេសប៊ុក លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ)
ក្នុងរយៈពេល ៥ខែ ដើមឆ្នាំ២០២០ ក្រុមហ៊ុន ឡុង ស្រេង បាននាំចេញចេកអំបូងលឿងចំនួន ២២ ៧៦២តោន ទៅកាន់ទីផ្សារប្រទេសវៀតណាម និងចិន។ នេះបើតាមសំណេររបស់លោក វេង សាខុន រដ្ឋមន្ត្រីក្រសូងកសិកម្ម។
តាមសំណេររបស់លោក វេង សាខុនដដែល ក្រុមហ៊ុន ឡុង ស្រេង ដែលមានទីតាំងនៅស្រុកស្ទឹងត្រង់ ខេត្តកំពង់ចាមនេះ កំពុងដាំដុះដំណាំចេកចំនួន ១០០០ហិកតា, ក្រូចថ្លុងចំនួន ៧៨ហិកតា, មៀនប៉ៃលិន ២៤០ហិកតា, ទុរេន ១៤៥ហិកតា និងខ្នុរការុតចំនួន ១២៥ហិកតា។ ក្រុមហ៊ុន ឡុង ស្រេង ស្ថិតក្នុងចំណោមក្រុមហ៊ុន១០ ដែលរដ្ឋាភិបាលកម្ពុជា អនុញ្ញាតឲ្យនាំចេញចេកស្រស់ ទៅទីផ្សារប្រទេសចិន។ នេះបើតាមលោក វេង សាខុន ដោយលោកបានបន្តទៀតថា ក្រសួងកសិកម្ម បាន និងកំពុងខិតខំ ពង្រឹងកិច្ចសហប្រតិបត្ដិការជាមួយដៃគូអភិវឌ្ឍន៍ និងវិស័យឯកជន ដើម្បីគាំទ្រលើការវិនិយោគគ្រប់ខ្សែច្រវាក់តម្លៃកសិកម្ម តាមរយៈការបង្កើនផលិតភាពផលិតកម្ម ការវេចខ្ចប់ ការរក្សាស្តុកទុក ការកែច្នៃប្រកបដោយគុណភាព អនាម័យ និងសុវត្ថិភាព សមស្របតាមស្តង់ដារនៃទីផ្សារនាំចេញ៕
(បកប្រែដោយឌីណា)
មតិពីមិត្តអ្នកអាន