ពិធីបិទវគ្គហ្វឹកហ្វឺនអន្តរាគមន៍ពិសេសក្បាច់គុនកងយោធពលខេមរភូមិន្ទ និងបើកវគ្គបំប៉នជំនាញ ស៊ើប ការណ៍ប្រដាប់អាវុធរបស់កងពលតូចថ្មើរជើងលេខ៥១ ស្ថិតនៅស្រុកព្រះនេត្រព្រះ ខេត្តបន្ទាយមានជ័យ ត្រូវបានប្រារព្ធធ្វើឡើងកាលពីថ្ងៃទី០៦ ខែសីហា ឆ្នាំ២០២០ ដោយមានសិក្ខាកាមជិត១០០នាក់ ដោយមានការអញ្ជើញចូលរួមពីឯកឧត្តម ឧត្តមសេនីយ៍ឯក ឯក សំអូន មេបញ្ជាការរងកងទ័ពជើគោក និងជាមេបញ្ជាការយោធភូមិភាគ៥។
សហព័ន្ធកីឡាគុនល្បុក្កតោកម្ពុជាបញ្ជ្រាបគុនល្បុក្កតោ ក្នុងវិស័យកងទ័ព
លោក អ៊ួ តារា អគ្គលេខាធិការសហព័ន្ធកីឡាគុនល្បុក្កតោកម្ពុជា ជាតំណាងដ៏ខ្ពង់ខ្ពស់ឯកឧត្តមបណ្ឌិតសភាចារ្យ ច័ន្ទ សារុន សមាជិករដ្ឋសភា និងជាប្រធានសហព័ន្ធកីឡាគុនល្បុក្កតោកម្ពុជាបានបង្ហាញក្តីសោមនស្សរីករាយ ក្នុងការចូលរួមចំណែកក្នុងការអភិវឌ្ឍវិស័យការពារជាតិផ្នែកក្បាច់គុន ដោយបានចូលរួមក្នុងការដំណើរការរៀបចំចងក្រងឯកសារសៀវភៅក្បាច់គុនកងយោធពលខេមរភូមិន្ទ ហើយបាននិងកំពុងរៀបចំជាឯកសារវីឌីអូសម្រាប់បង្កភាពងាយស្រួលក្នុងផ្ទេរនូវជំនាញក្បាច់គុនក្នុងជួរកងកម្លាំងប្រដាប់អាវុធ និងបណ្តុះបណ្តាលយោធាចារ្យក្បាច់គុន សម្រាប់បំពេញតម្រូវការរបស់អង្គភាពកងកម្លាំងនានា ដែលរៀបចំវគ្គបណ្តុះបណ្តាលក្បាច់គុនកងយោធពលខេមរភូមិន្ទ។ លោកអគ្គលេខាធិការរូបនេះបានបន្ថែមទៀតថា សហព័ន្ធកីឡាគុនល្បុក្កតោកម្ពុជា និងកងយោធពលខេមរភូមិន្ទបានធ្វើកិច្ចសហការគ្នាប្រមាណ៤ឆ្នាំមកហើយ ដើម្បីបញ្រ្ជាបគុនល្បុក្កតោ ដែលក្បាច់គុនអត្តសញ្ញាណជាតិ ព្រលឹងជាតិខ្មែរឱ្យទៅជាក្បាច់គុនកងទ័ពក្នុងពេលដំណាលគ្នានេះដែរក៏កំពុងខិតខំអភិវឌ្ឍន៍វិស័យកីឡាគុនល្បុក្កតោទៅកាន់ ស្រទាប់កុមារ យុវជន និងមហាជននានា។
លោកបានបន្ដថា នេះគឺជាយុទ្ធសាស្ត្រដ៏ធំរបស់ខ្លួនក្នុងគោលដៅចម្បងៗចំនួនពីរ ទី១ គឺ កំពុងជំរុញបន្ថែមឱ្យក្បាច់គុនព្រលឹងជាតិមួយនេះទទួលបានជោគជ័យនៃការដាក់បញ្ជូលជាសម្បត្តិបេតិកភណ្ឌអរូបី នៃមនុស្សជាតិ ដែលបានដាក់ការស្នើសុំរួចហើយនៅអង្គការយូណេស្កូ ដោយរង់ចាំការប្រកាសលទ្ធផលនាពេលខាងមុខ។ ទី២-ការបញ្ជាបក្បាច់គុននេះ គឺជាយុទ្ធសាស្ត្រចម្បង ក្នុងដំណើរឆ្ពោះទៅទទួលរៀបចំធ្វើជាម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣ ប្រកបដោយភាពជឿជាក់ និងក្តីសង្ឃឹមបំផុត ដោយក្រុមទី១ គឺរំពឹងលើក្រុមកីឡាករ កីឡាការិនីជម្រើសជាតិ និងក្រុមទី២ រំពឹងលើក្រុមយោធា ដែលអាចជាកីឡាករមានទេពកោលស្យត្រៀមចូលរួមប្រកួតស៊ីហ្គេមបាន តាមរយៈការប្រកួតជម្រុះជាដើម។ លោកបានបន្ថែមថា ដូច្នេះ ទើបសហព័ន្ធកីឡាគុនល្បុក្កតោកម្ពុជាកំពុងខិតខំបញ្ជ្រាបការហ្វឹកហាត់ ការបណ្តុះបណ្តាលកាន់តែសម្បូរបែប ដើម្បីឲ្យសហព័ន្ធមានជម្រើសកាន់តែច្រើន ក្នុងការជ្រើសរើសអត្តពលិកប្រកបដោយសក្តានុពល ដណ្តើមបាននូវភាពជោគជ័យជាប្រវត្តិសាស្ត្រ ក្នុងឋានៈជាម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣៕
(ប្រភពព័ត៌មាន: AKP)
មតិពីមិត្តអ្នកអាន