ប្រទេសកម្ពុជាអាចក្លាយជាប្រទេសក្នុងតំបន់អាស៊ីបន្ទាប់ ដែលបដិសេធការនាំចូលសំរាមពីក្រៅប្រទេស ទោះបីជាមានការលើកឡើងពីវិស័យឯកជនថា កម្ពុជាអាចដុតកាកសំណល់ដើម្បីផលិតអគ្គិសនីក៏ដោយ។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះជាណាចក្រកម្ពុជា
យោងតាមកាសែត The Guardian បានឱ្យដឹងថា ការហាមឃាត់របស់ប្រទេសចិន លើនាំចូលកាកសំណល់មកពីបរទេសកាលពីឆ្នាំមុន បានធ្វើឱ្យបណ្តាប្រទេសអភិវឌ្ឈន៍ ខិតខំប្រឹងប្រែងរកកន្លែងថ្មីដើម្បីចាក់សំរាម។
កាសែត The Guardian បាននិយាយនៅក្នុងរបាយការណ៍របស់ខ្លួនថា ”កាកសំណល់មានបរិមាណដ៏ច្រើនសម្បើម បានប្តូរទិសទៅរកអាស៊ីអាគ្នេយ៍ ប៉ុន្តែការប្រឆាំងនឹងគ្រប់គ្រងការនាំចេញកាកសំណល់ កំពុងតែកើនឡើងផងដែរនៅក្នុងតំបន់នេះ”។
របាយការណ៍នេះបានបន្ថែមទៀតថា បណ្តាប្រទេសដទៃទៀតនៅអាស៊ីដូចជា ឥណ្ឌូណេស៊ី ហ្វីលីពីន និងម៉ាឡេស៊ី ក៏បានបញ្ជូនកុងទីន័រដែលពេញដោយសំរាម ឲ្យត្រឡប់ទៅប្រទេសកាណាដា បារាំង និងប្រទេសអភិវឌ្ឍន៍ផ្សេងទៀតវិញផងដែរ។ ផែនការរបស់ប្រទេសកម្ពុជាសម្រាប់ការនាំចូលសំរាម ត្រូវបានប្រកាសក្នុងអំឡុងពេលកិច្ចប្រជុំរបស់ទីស្ដីការគណៈរដ្ឋមន្ត្រី ដែលដឹកនាំដោយលោកនាយករដ្ឋមន្ត្រីកម្ពុជា សម្តេចតេជោ ហ៊ុន សែន កាលពីថ្ងៃសុក្រ។
ក្នុងអំឡុងពេលនៃកិច្ចប្រជុំនេះ សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍ថា ស្ថាប័ននានានៃព្រះរាជាណាចក្រកម្ពុជា ត្រូវតែប្រុងប្រយ័ត្ន និងហាមឃាត់ការនាំចូលកាកសំណល់ពីបរទេស។ លោកបានមានប្រសាសន៍ថា ”កុំអនុញ្ញាតឱ្យមានការនាំចូលបែបនេះ។ ខ្ញុំចាំថាកាលពីមុនមានគេបានមករកយើង ហើយស្នើឱ្យកម្ពុជាដុតកាកសំណល់ ដើម្បីផលិតថាមពលអគ្គិសនី។ ពួកគេចង់នាំចូលកាកសំណល់ពីបរទេស”។
សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍ថា “មន្ត្រីត្រូវគោរពតាមបទបញ្ជារបស់លោក។ ខ្ញុំព្រមានអ្នកទាំងអស់គ្នានៅទីនេះ មិនត្រូវអនុញ្ញាតឱ្យមានការវិនិយោគបែបនេះនៅកម្ពុជាទេ ពីព្រោះពួកគេកំពុងស្វែងរកការនាំចូលកាកសំណល់ពីបរទេស។ ហើយពួកគេនឹងនិយាយថា ពួកគេចង់យកកម្ពុជាជាប្រទេសចាប់ផ្ដើមប្រើសំរាមដំបូងគេ”។
ក្មេងស្រីម្នាក់កំពុងជ្រើសរើសសំរាមដែលអាចកែច្នៃឡើងវិញនៅគំនរសំរាមក្នុងខេត្តសៀមរាប (រូបថតៈ Reuters)
“ប៉ុន្តែគោលបំណងរបស់ពួកគេ គឺនាំចូលកាកសំណល់ពីបរទេស ហើយចាក់ចោលនៅកម្ពុជា។ ដូច្នេះយើងនឹងមិនអនុញ្ញាតឱ្យមានការវិនិយោគបែបនេះទេ។ កម្ពុជាមិនមែនជាកន្លែងចាក់សំរាមឧស្សាហកម្មទេ”។
យោងទៅតាមក្រសួងបរិស្ថាន បរិមាណសំរាមដែលផលិតនៅក្នុងប្រទេស បានកើនឡើងប្រហែល ១០ ភាគរយជារៀងរាល់ឆ្នាំ ដោយសារកំណើនប្រជាជន ការផ្លាស់ប្តូររបៀបរស់នៅ និងខ្វះការយល់ដឹងពីរបៀបបែងចែកកាកសំណល់។ របាយការណ៍បាននិយាយថា ជារៀងរាល់ថ្ងៃរាជធានីភ្នំពេញ ប្រមូលសំរាមប្រហែល ៣ពាន់ តោនខណៈខេត្តព្រះសីហនុប្រមូលបាន ៦រយតោនក្នុងមួយថ្ងៃ។ របាយការណ៍បានបន្ថែមថាកាកសំណល់ប្រមាណ ១,៥ លានតោន ត្រូវបានបញ្ជូនទៅកន្លែងចាក់សំរាមជារៀងរាល់ឆ្នាំខណៈដែល ៤០ម៉ឺន តោនត្រូវបានកែច្នៃឡើងវិញ ហើយសល់ត្រូវបានដុត ឬក៏ត្រូវបានគេបោះចោលទៅក្នុងទឹក។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជា បានថ្លែងកាលពីម្សិលមិញថា លោកស្វាគមន៍ចំពោះគោលបំណងរបស់លោក ហ៊ុន សែន ក្នុងការហាមប្រាមការនាំចូលកាកសំណល់ចូលមកប្រទេសកម្ពុជា។ លោកបានមានប្រសាសន៍ថា ”ខ្ញុំគិតថាប្រសិនបើចង់កែច្នៃកាកសំណល់ដើម្បីផលិតអគ្គិសនី ក្រសួងរ៉ែ និងថាមពល គួរតែចាត់វិធានការដើម្បីពិនិត្យសំណើររបស់ក្រុមហ៊ុនជាមុនសិន ប៉ុន្តែខ្ញុំគិតថា ពួកគេបានធ្វើរួចហើយ”។
ការនាំចូលកាកសំណល់កំពុងបង្កឱ្យមានបញ្ហា។ នៅប្រទេស ហ្វីលីពីន លោកប្រធានាធិបតី Rodrigo Duterte បានបញ្ជាឱ្យបញ្ជូនកាកសំណល់ត្រឡប់ទៅប្រទេស កាណាដា វិញ៕
សរុបដោយ ហេង វុធ្ធី
(ប្រភព៖ Khmer Times សរុបដោយ ហេងវុធ្ធី)
មតិពីមិត្តអ្នកអាន