រាជរដ្ឋាភិបាលបានបញ្ជាក់ថាខ្លួនបានផ្ទេរប្រាក់ឧបត្ថម្ភមួយចំនួនសម្រាប់កម្មករនិយោជិតដែលបាត់បង់ការងារកាលពីម្សិលមិញរហូតដល់ចំនួន ៤០ ដុល្លារទៅឱ្យកម្មកររោងចក្រ និងបុគ្គលិកបម្រើការងារក្នុងវិស័យទេសចរណ៍ជាង ៣០០០០ នាក់ដែលត្រូវបានបញ្ឈប់ពីការងារជាបណ្តោះអាសន្នដោយសារតែការរាតត្បាតនៃវីរុសកូវីដ-១៩។
រាជរដ្ឋាភិបាលចាប់ផ្ដើមផ្ដល់ប្រាក់ឧបត្ថម្ភដល់កម្មករនិយោជិត
យោងតាមក្រសួងការងារ ទឹកប្រាក់សរុបចំនួន ៦៨៤.២៩៤ ដុល្លារត្រូវបានផ្ដល់ទៅឱ្យកម្មករនយោជិតចំនួន ៣៣.២៣១ នាក់ដែលត្រូវបានផ្អាកពីការងារក្នុងរោងចក្រចំនួន ៨៣ សណ្ឋាគារ និងភោជនីយដ្ឋានចំនួន ២៨ តាមរយៈប្រព័ន្ធទូទាត់របស់ធនាគារឯកទេស វីង (ខេមបូឌា)។ក្រសួងបានបន្ថែមឲ្យដឹងថាអ្នកដែលទទួលបានប្រាក់ឧបត្ថម្ភនេះនឹងទទួលបានសារបញ្ជាក់តាមរយៈលេខទូរស័ព្ទដែលពួកគេបានចុះឈ្មោះ។
ក្រសួងបានថ្លែងថា៖ «ក្នុងករណីដែលពួកគេមិនទទួលបានសារបញ្ជាក់ពីធនាគារឯកទេស វីង ពួកគេអាចទាក់ទងទៅកាន់អ្នកផ្តល់ប្រាក់ដោយផ្ទាល់ឬទៅកាន់អតីតនាយកដ្ឋានរដ្ឋបាលនិយោជករបស់ពួកគេ។»
គួរបញ្ជាក់ឲ្យដឹងផងដែរថា ការផ្ទេរប្រាក់នេះគឺជាដំណាក់កាលដំបូងនៃការផ្ដល់ប្រាក់ឧបត្ថម្ភសម្រាប់រយៈពេលនៃការបាត់បង់ការងារហើយប្រាក់ឈ្នួលត្រូវបានព្យួរ ដោយពួកគេនឹងទទួលបានទឹកប្រាក់ចំនួន ១៥ ដុល្លារសម្រាប់ការព្យួរកិច្ចសន្យាការងាររយៈពេល ៧ ទៅ ១០ ថ្ងៃ ៣០ ដុល្លារសម្រាប់ ១១ ទៅ ២០ ថ្ងៃ និង ៤០ ដុល្លារសម្រាប់រយៈពេល ២១ ថ្ងៃ ទៅមួយខែ។
ទាក់ទងនឹងការផ្ដល់ប្រាក់ឧបត្ថម្ភនេះដែរ កាសែតខ្មែរថាមស៍បានព្យាយាមទាក់ទងទៅកាន់លោក ហេង សួ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីៈកាលពីម្សិលមិញដើម្បីធ្វើការបញ្ជាក់បន្ថែមពីការលើកឡើងរបស់លោកកាលពីសប្តាហ៍មុនថារដ្ឋាភិបាលនឹងផ្ទេរប្រាក់ដល់កម្មករជិត ៦ ម៉ឺននាក់នៅសប្តាហ៍នេះ។ ទោះយ៉ាងណាលោកមិនអាចទាក់ទងសុំការអត្ថាធិប្បាយបានទេ។
លោក ហេង សួ ក៏ធ្លាប់បានប្រាប់កាសែតខ្មែរថាមស៍ឲ្យដឹងផងដែរថា ក្នុងដំណើរការទូទាត់ប្រាក់នេះបានជួបប្រទះបញ្ហាមួយចំនួន ខណៈដែលកម្មករមួយចំនួនបានផ្តល់លេខទូរស័ព្ទមិនត្រឹមត្រូវដែលធ្វើឲ្យធនាគរវីងមានការលំបាកក្នុងការផ្ទេរប្រាក់ទៅកាន់ពួកគេ។
លើសពីនេះទៀត ការទូទាត់ប្រាក់ឧបត្ថម្ភនេះនឹងត្រូវផ្តល់ជូនចំពោះតែកម្មករនិយោជិកដែលនិយោជករបស់ខ្លួនបានចុះឈ្មោះអាជីវកម្មរបស់ពួកគេជាផ្លូវការជាមួយក្រសួងការងារ និងបណ្តុះបណ្តាល វិជ្ជាជីវៈ ក្រសួងទេសចរណ៍ ឬក្រសួងពាណិជ្ជកម្មតែប៉ុណ្ណោះ។
ប្រធានសមាគមភ្នាក់ងារទេសចរណ៍កម្ពុជា អ្នកស្រី ឆាយ សៀវលីន បានមានប្រសាសន៍ក្នុងការស្វាគមន៍ចំពោះដំណឹងនេះសម្រាប់កម្មករដែលបានទទួលថវិកាឧបត្ថម្ភ។
ទោះជាយ៉ាងណាក៏ដោយ អ្នកស្រី បានថ្លែងថារាជរដ្ឋាភិបាលក៏គួរតែជួយគាំទ្របន្ថែមទៀតដល់ប្រតិបត្តិករទេសចរណ៍ក្នុងអំឡុងពេលមានវិបត្តិនេះផងដែរ។
លោកស្រីបានមានប្រសាសន៍ថា៖ «តាមអ្វីដែលខ្ញុំដឹង ប្រតិបត្តិករទេសចរណ៍ប្រមាណជា ១០ ប៉ុណ្ណោះដែលបានទទួលការយល់ព្រមពីរដ្ឋាភិបាលសម្រាប់ជំនួយប្រាក់ឈ្នួល ខណៈដែលក្រុមហ៊ុនភាគច្រើនដែលបានស្នើសុំជំនួយនោះត្រូវបានបដិសេធ។»
លោកស្រីបានបន្ថែមថា ដោយសារតែលក្ខណៈវិនិច្ឆ័យតឹងរឹងរបស់រាជរដ្ឋាភិបាល អាជីវកម្មជាច្រើននៅក្នុងវិស័យទេសចរណ៍ទំនងជានឹងមិនទទួលបានជំនួយអ្វីនោះទេ។
លោកស្រីបានបន្តឲ្យដឹងថា៖ «យើងចង់ឲ្យរាជរដ្ឋាភិបាលមានការបន្ធូរបន្ថយលក្ខខណ្ឌតឹងរឹងមួយចំនួនដែលបានដាក់លើអាជីវកម្មទេសចរណ៍។ ដោយសារតែមានមនុស្សជាច្រើនដែលមិនអាចទទួលបានជំនួយទាំងនេះ ដូច្នេះហើយ វាក៏មានផលប៉ះពាល់ដល់ប្រជាជនផងដែរ។»
យោងតាមតួលេខចុងក្រោយរបស់ក្រសួង រោងចក្រកាត់ដេរនិងស្បែកជើងក្នុងស្រុកចំនួន ២៣៧ បានដាក់ពាក្យស្នើសុំផ្អាកប្រតិបត្តិការ ដែលកើតឡើងដោយសារតែកង្វះការបញ្ជាទិញពីអតិថិជននៅក្រៅប្រទេសដែលភាគច្រើនពីអឺរ៉ុបនិងសហរដ្ឋអាមេរិក៕
(ប្រភពព័ត៌មាន: khmertimeskh.com)
មតិពីមិត្តអ្នកអាន