និស្សិតកម្ពុជា ១៥ ក្រុម មានគ្នា ៣៥ នាក់មកពីសាកលវិទ្យាល័យនានានៅកម្ពុជា តាមរយៈ អង្គការមូលនិធិអាស៊ី សហការជាមួយ ក្រសួងអប់រំ យុវជន និងកីឡា រួមគ្នាផលិតវីដេអូអប់រំ ស្ដីពី «អាជីពការងារ» ដើម្បីទុកជាប្រទីបបំភ្លឺផ្លូវ ពីជម្រើសការងារ ទីផ្សារការងារ និងតម្រង់ទិសលើមុខវិជ្ជាសិក្សាទៅអនាគត។
ថ្លែងក្នុងវេទិកាផ្សព្វផ្សាយ វីដេអូអប់រំស្ដីពី «អាជីពការងារ» ឬ Career Introductory Video (CIV) នាថ្ងៃព្រហស្បតិ៍នេះ នៅសាកលវិទ្យាល័យ បញ្ញាសាស្ត្រកម្ពុជា (PUC) លោក សាយលេស អេវឺរឹត តំណាងអង្គការ មូលនិធិអាស៊ី ប្រចាំកម្ពុជា បានថ្លែងថា វីដេអូ ចំនួន ១៥ នេះ ជាគម្រោងផ្ដួចផ្ដើមរបស់អង្គការមូលនិធិអាស៊ី សហការជាមួយក្រសួងអប់រំ យុវជន និងកីឡា ដើម្បីទុកជាប្រទីបបំភ្លឺផ្លូវ ផ្ដល់ព័ត៌មានមូលដ្ឋាន ដល់សិស្ស-និស្សិត ពីជម្រើសការងារ ទីផ្សារការងារ ការរៀបចំខ្លួន និងតម្រង់ទិសពួកគេទៅថ្ងៃអនាគត។
លោកបានថ្លែងថា «វីដេអូទាំងនេះសង្កត់ធ្ងន់ទៅលើ STEM ដែលជាវិស័យដ៏សំខាន់មួយចំពោះ វិស័យអប់រំ និងផ្នែកអភិវឌ្ឍន៍គំនិតច្នៃប្រឌិត។ វាបានចែករម្លែកនូវចំនេះដឹងនានា។ ខ្ញុំសង្ឃឹមថា វីដេអូនេះ មិនត្រឹមតែអាចជួយដល់យុវជនដែលកំពុងសិក្សានៅក្នុងទីក្រុងប៉ុណ្ណោះនោះទេ តែថែមទាំងអាចបញ្ច្រៀបទៅដល់ក្រុមយុវជនដែលនៅតាមជនបទផងដែរ។ ហើយវានឹងជួយផ្តល់នូវក្តីសុបិនសម្រាប់ក្រុមយុវជន និងកាត់បន្ថយការឈប់រៀន។
វីដេអូខ្លីបដែលគេចាត់ទុកថាល្អជាងគេ និងបានជាប់ចំណាត់ថ្នាក់លេខ១ ក្នុងចំណោមវីដេអូទាំង ១៥ដោយបាននិយាយពីអាជីពការងារលើជំនាញ “វិស្វករសំណង់ស៊ីវិល” នោះ យុវជន ផែន ភារុណ តំណាងក្រុមមកពីសាលា PUC បានបង្ហាញថា វិស័យការងារលើជំនាញវិស្វករ មានតម្រូវការខ្ពស់នៅក្នុងទីផ្សារការងារ ហើយសិស្ស ក៏អាចសិក្សាបាននៅសាកលវិទ្យាល័យជាច្រើននៅកម្ពុជា ប៉ុន្ដែសិស្សត្រូវពូកែលើមុខវិជ្ជា គណិត និងរូបវិទ្យាជាមុនសិន។
ភារុណ បន្ដថា «ជំនាញវិស្វករនេះ សំខាន់ណាស់នៅក្នុងទីផ្សារការងារក្នុងប្រទេសកម្ពុជា នាពេលបច្ចុប្បន្ន ព្រោះប្រទេសកម្ពុជា ជាប្រទេសដែលកំពុងលូតលាស់ ដូច្នេះយើងមានតម្រូវការអ្នកជំនាញវិស្វករច្រើនដែលជាអ្នកមានសមត្ថភាពក្នុងការសាងសង់ និងរចនាអាគារឲ្យមានសោភ័ណ្ឌភាព» ។
វីដេអូខ្លីបដែលជាប់ចំណាត់ថ្នាក់លេខ ២ ដែលនិយាយពីអាជីពនៃ «ការងារគ្រប់គ្រងធនធានមនុស្ស» បង្កើតដោយក្រុមនិស្សិតមកពីសាកលវិទ្យាល័យ ន័រតុន បានបង្ហាញ តាមរយៈការចុះទៅសម្ភាន៍ផ្ទាល់ ជាមួយប្រធានផ្នែកធនធានមនុស្សនៅក្រុមហ៊ុនមួយចំនួន និងបានបញ្ជាក់ថា តម្រូវការបុគ្គលិកលើជំនាញនេះជារៀងរាល់ថ្ងៃមានតម្រូវការ ២០ ភាគរយក្រៅពីអាជីពដ៏ទៃ ។
យុវជន តយ អ៊ុល តំណាងក្រុមនិសស្សិតមកពីសាកលវិទ្យាល័យន័រតុនបានថ្លែងថា «វីដេអូរបស់ពួកខ្ញុំ បង្កើតឡើងនេះ ចង់បង្ហាញដល់សិស្សដែលពួកគាត់កំពុងសិក្សានៅវិទ្យាល័យ ឲ្យពួកគាត់អាចចាប់យកជំនាញសិក្សាមួយដែលត្រឹមត្រូវតាមទីផ្សារការងារ និងអាចតម្រង់ទិសដល់ពួកគាត់ ដែលមានចំណាប់អារម្មណ៍អាជីពមួយនេះ»។
គួរបញ្ជាក់ថា វីដេអូ ផ្សេងៗទៀតដែលបានបង្ហាញពី អាជីព និងការងារ នេះ ក្រសួងអប់រំ យុវជន និង កីឡា បានផ្សព្វផ្សាយនៅលើគេហទំព័រផ្ទាល់របស់ក្រសួងអប់រំផងដែរ៕
មតិពីមិត្តអ្នកអាន