យុគសម័យ - ប្រទេសវៀតណាម ដែលពិភពលោកស្គាល់ថា ជាប្រទេសនាំចេញកសិកម្មធំមួយនៅអាស៊ីអាគ្នេយ៍នោះ បាននាំចេញ បន្លែផ្លែឈើក្នុងទំហំប្រមាណជិត ២ ពាន់លានដុល្លារអាមេរិក នៅ៥ខែដំបូងឆ្នាំនេះ ខណៈដែលការនាំចូលបន្លែផ្លែឈើមកវិញ ក៏កើនខ្លាំងណាស់ដែរពោលគឺក្នុងទំហំជាទឹកប្រាក់ប្រមាណ ជិត១ពាន់ លានដុល្លារអាមេរិក នេះបើយោងតាមរបាយការណ៍ពី ក្រសួងកសិកម្ម និងអភិវឌ្ឍន៍ជនបទវៀតណាមដែលបានផ្សាយនាពេលថ្មីៗនេះ។
ទីផ្សារកម្ពុជាពេញចិត្តចំពោះបន្លែនិងផ្លែឈើរបស់វៀតណាម
តាមការបញ្ជាក់ក្នុងរបាយការណ៍ ក្នុងរយៈពេល៥ខែ មកនេះ វៀតណាម ក៏បាននាំចេញបន្លែផ្លែឈើប្រមាណជាង ១,៨ ពាន់លានដុល្លារអាមេរិក ស្មើនឹងកំណើនជាង១០% ធៀបនឹងឆ្នាំកន្លងទៅ។
តាមការបញ្ជាក់ក្នុងរបាយការណ៍ ក្នុងរយៈពេល៥ខែ មកនេះ វៀតណាម ក៏បាននាំចេញបន្លែផ្លែឈើប្រមាណជាង ១,៨ ពាន់លានដុល្លារអាមេរិក ស្មើនឹងកំណើនជាង១០% ធៀបនឹងឆ្នាំកន្លងទៅ។
គួរចាប់អារម្មណ៍ដែរថា នារយៈចុងក្រោយនេះ ការនាំចេញផលិតផលបន្លែផ្លែឈើវៀតណាម គឺទទួលបានជោគជ័យគួរឲ្យកត់សម្គាល់ក្នុងការចូលក្នុងទីផ្សារធំៗដូចជាអាមេរិក ញ៉ូស័រឡែន និងអូស្ត្រាលីជាដើម ទោះបីជាមានការដាក់កម្រិតលើស្ដង់ដារខ្ពស់ក៏ដោយ។
យ៉ាងណាក៏ដោយចុះ អ្នកជំនាញ បានក្រើនរំឭកថា ប្រទេសវៀតណាមគួរតែបន្ដភាពជាអាទិភាពជាមួយនឹងប្រទេសចិន ព្រោះចិនគឺជាទីផ្សារធំបំផុតមួយ ដែលមានតម្រូវការអ្នកប្រើប្រាស់ច្រើន ជាមួយនឹងចំនួនប្រជាជនសរុបជាង ១,៤ពាន់លាននាក់ ខណៈដែលផ្ទៃដីដាំដុះកសិកម្ម ការអភិវឌ្ឍឧស្សាហកម្មក្នុងវិស័យនេះនៅបច្ចុប្បន្ននេះ កំពុងមានការកាត់បន្ថយ។
តាមរបាយការណ៍ពីក្រសួងកសិកម្ម និងអភិវឌ្ឍន៍ជនបទវៀតណាម បានបញ្ជាក់ថា ប្រទេសចិន គឺជាទីផ្សារដែលមានតម្រូវការនាំចូលបន្លែផ្លែឈើពីវៀតណាមច្រើនជាងគេ ពោលគឺមានចំណែកទីផ្សាររហូតដល់ទៅជិត ៦១% នៃទីផ្សារនាំចេញសរុប ខណៈដែលការនាំចេញបន្លែផ្លែឈើទៅកាន់ប្រទេសក្បែរខាងដូចជាកម្ពុជា និងឡាវវិញ គឺមានការធ្លាក់ចុះជិត ៣០%។
ទន្ទឹមនឹងនេះ ការនាំចេញទៅកាន់ទីផ្សារប្រទេសផ្សេងៗទៀត ក៏មានការកើនឡើងដែរ ដោយការនាំចេញបន្លែ ផ្លែឈើរបស់វៀតណាមទៅថៃ វិញសម្រេចបាន ជិត ៥៨លានដុល្លារ កើនឡើងដល់ទៅ ជាង ២៤៤% ខណៈដែលការនាំចេញទៅកូវ៉េខាងត្បូង មាន ជិត៥៥លានដុល្លារ កើនឡើងជាង២៥%។ រីឯការនាំចេញ ទៅជប៉ុនវិញ មានជាង៤៦លានដុល្លារ កើនជាង២៦% ខណៈការនាំចេញទៅហូឡង់ គឺមាន២៨លានដុល្លារ កើនជាង២៨%។
វៀតណាមក៏បានជំរុញឲ្យក្រុមហ៊ុនក្នុងស្រុកផលិតកែច្នៃ បន្លែផ្លែឈើសម្រាប់នាំចេញបន្ថែមទៀតផងដែរ ដោយការនាំចេញរំពឹងថា នឹងស្ទុះងើបឡើងវិញខ្លាំងនៅចុងឆ្នាំនេះ ក្រោយពេលដែលការរីករាលដាលនៃកូវីដ-១៩ អាចគ្រប់គ្រងបាន។
ក្រៅពីការនាំចេញបន្លែផ្លែឈើនេះដែរ វៀតណាម ក៏រំពឹងថា នឹងក្លាយជាប្រទេសនាំចេញអង្ករនាំមុខគេបង្អស់មួយផងដែរ ខណៈដែលនៅឆ្នាំនេះ វៀតណាមរំពឹងថា នឹងអាចនាំចេញអង្ករបានដល់ ៧លានតោន។ ហើយបើគិតត្រឹម៥ខែនៅឆ្នាំនេះ វៀតណាមសម្រេចបានការនាំចេញជាង ៣លានតោន កើនឡើង ១១% បើគិតជាទឹកប្រាក់មានតម្លៃសរុបជាង ១ពាន់ ៤រយលានដុល្លារអាមេរិក កើនឡើងជាង ២៥% ធៀបនឹងរយៈពេលដូចគ្នាកាលពីឆ្នាំមុន៕
(បកប្រែដោយវិច្ឆិកា)
មតិពីមិត្តអ្នកអាន