ក្រសួងការងារកម្ពុជា បានបញ្ជាក់ថា កូរ៉េខាងត្បូងបន្តជួយកម្ពុជាលើគម្រោងអភិវឌ្ឍប្រព័ន្ធសេវាការងារសាធារណៈ រហូតដល់ឆ្នាំ២០២០ និងប្ដេជ្ញាបន្តកិច្ចសហប្រតិបត្តិការល្អលើវិស័យការងារ និងបណ្ដុះបណ្ដាលវិជ្ជាជីវៈ ជាមួយកម្ពុជាបន្តទៀត ពិសេសគឺការបន្តគម្រោង ការអភិវឌ្ឍប្រព័ន្ធផ្តល់សេវាការងារសាធារណៈ នេះតែម្ដង។
កូរ៉េខាងត្បូងបន្តជួយកម្ពុជាលើគម្រោងអភិវឌ្ឍប្រព័ន្ធសេវាការងារសាធារណៈ
ក្រសួងការងារ និងបណ្ដុះបណ្ដាលវិជ្ជាជីវៈ បានចុះកិច្ចព្រមព្រៀងជាមួយក្រសួងការងារ និងមុខរបរនៃសាធារណរដ្ឋកូរ៉េខាងត្បូង លើការដាក់ឱ្យដំណើរការអនុវត្តគម្រោង «ការអភិវឌ្ឍប្រព័ន្ធផ្តល់សេវាការងារសាធារណៈ ឬហៅថា "PES System" ក្រោមគម្រោង Korea - Cambodia WorkNet ដំណាក់កាលទី២ (២០១៩ - ២០២០)។ កិច្ចព្រមព្រៀងនេះត្រូវបានចុះហត្ថលេខាដោយលោក ហៃ ហ៊ុនឡេង ប្រធានទីភ្នាក់ងារជាតិមុខរបរ និងការងារ (NEA) ជាមួយលោក យ៉ាង ស៊ុងជុន (Yang Seungjun) ប្រធាននាយកដ្ឋានសហប្រតិបត្តិការអភិវឌ្ឍ នៃក្រសួងការងារ និងមុខរបរនៃសាធារណរដ្ឋកូរ៉េខាងត្បូង។ ពិធីចុះហត្ថលេខានេះធ្វើឡើងក្រោមវត្តមាន អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ នៅទីស្ដីក្រសួងការងារ នាថ្ងៃរសៀលថ្ងៃទី២៤ ខែមិថុនា ឆ្នាំ២០១៩។
នាឱកាសនោះ លោក អ៊ិត សំហេង ក៏បានលើកឡើងថា នាពេលកន្លងមកកម្ពុជា-កូរ៉េខាងត្បូង មានទំនាក់ទំនងល្អជាមួយគ្នា និងជាដៃគូកិច្ចសហប្រតិបត្តិការយ៉ាងជិតស្និទ្ធ ដោយភាគីកូរ៉េខាងត្បូងបានទទួលពលករកម្ពុជាទៅធ្វើការនៅទីនោះជាបន្តបន្ទាប់ រហូតដល់់ពេលបច្ចុប្បន្នចំនួនពលករកម្ពុជា ដែលទៅធ្វើការនៅប្រទេសសាធារណរដ្ឋកូរ៉េខាងត្បូង បានកើនដល់ប្រមាណជិត ៦ម៉ឺននាក់។ លោកបន្តថា តាមរយៈការធ្វើដំណើរទៅសួរសុខទុក្ខរបស់ពលករកម្ពុជានៅប្រទេសកូរ៉េខាងត្បូងកន្លងមក លោកមើលឃើញថា ពលករកម្ពុជានៅទីនោះពិតជាបានរស់នៅយ៉ាងសុខសប្បាយ និងទទួលបានប្រាក់ឈ្នួលខ្ពស់ថែមទៀត ដែលជួយជំរុញជីវភាពរស់នៅរបស់ពួកគេ និងគ្រួសារកាន់តែល្អប្រសើរឡើង។ ពាក់ព័ន្ធនឹងគម្រោង "ការអភិវឌ្ឍប្រព័ន្ធផ្តល់សេវាការងារសាធារណៈ ឬហៅថា "PES System" នេះ ត្រូវបានលោក អ៊ិត សំហេង គាំទ្រ និងលើកទឹកចិត្តយ៉ាងពេញទំហឹង និងបានស្នើឱ្យក្រុមការងារបច្ចេកទេសទាំងពីរភាគី ខិតខំធ្វើការងារឱ្យបានជិតស្និទ្ធ ដើម្បីសម្រេចបានជោគជ័យសម្រាប់ប្រទេសជាតិទាំងពីរ កម្ពុជា-សាធារណរដ្ឋកូរ៉េខាងត្បូង។៕
(យោងតាម vayofm សរុបដោយវិច្ឆិកា)
មតិពីមិត្តអ្នកអាន