ពីទំនាក់ទំនងភាពជាអ្នកជិតខាង ឆ្ពោះទៅកាន់លំហអភិវឌ្ឍន៍រួម វៀតណាម - ឡាវ - កម្ពុជា

រូបភាពឧទាហរណ៍។

ទំនាក់ទំនងជាមួយបណ្តាប្រទេសជិតខាង តែងតែរក្សាបាននូវអាទិភាពក្នុងគោលនយោបាយការបរទេសរបស់វៀតណាម។ នៅក្នុងបរិបទនោះ ដំណើរទស្សនកិច្ចផ្លូវការនៅសាធារណរដ្ឋប្រជាធិបតេយ្យប្រជាមានិតឡាវ និងព្រះរាជាណាចក្រកម្ពុជា របស់នាយករដ្ឋមន្ត្រី Le Minh Hung បានបន្តបញ្ជាក់ពីការយកចិត្តទុកដាក់ខ្ពស់ចំពោះទំនាក់ទំនងជាមួយប្រទេសទាំងពីរ ព្រមទាំងបើកបន្ថែមនូវសក្តានុពលដើម្បីប្រែក្លាយការប្តេជ្ញាចិត្តជាន់ខ្ពស់នានាឱ្យក្លាយជាលទ្ធផលជាក់ស្តែង។

នេះគឺជាដំណើរទស្សនកិច្ចផ្លូវការលើកដំបូងរបស់នាយករដ្ឋមន្ត្រី Le Minh Hung មកកាន់ប្រទេសឡាវ និងកម្ពុជា ក្នុងតួនាទីថ្មី ដែលប្រព្រឹត្តទៅក្នុងកាលៈទេសៈដែលប្រទេសទាំងបីកំពុងប្រឈមមុខនឹងតម្រូវការថ្មីៗទាក់ទងនឹងការអភិវឌ្ឍ ការតភ្ជាប់ក្នុងតំបន់ និងការរក្សាទុកបរិស្ថានសន្តិភាព ស្ថិរភាព។

ដូច្នេះ អត្ថន័យនៃដំណើរទស្សនកិច្ចនេះ មិនត្រឹមតែស្ថិតនៅលើការពង្រឹងមូលដ្ឋានគ្រឹះនៃទំនាក់ទំនងនយោបាយប៉ុណ្ណោះទេ ប៉ុន្តែថែមទាំងស្ថិតនៅលើសមត្ថភាពធ្វើឱ្យកាន់តែស៊ីជម្រៅនូវការផ្សារភ្ជាប់ផលប្រយោជន៍រវាងប្រទេសទាំងបីផងដែរ។

ពីភាពជិតស្និទ្ធខាងភូមិសាស្ត្រ ឆ្ពោះទៅកាន់ការផ្សារភ្ជាប់ផលប្រយោជន៍

វៀតណាម ឡាវ និងកម្ពុជា មានទីតាំងភូមិសាស្ត្រជាប់ព្រំប្រទល់គ្នា រួមគ្នាចែករំលែកនូវលំហអភិវឌ្ឍន៍ ក៏ដូចជាផលប្រយោជន៍រួមគ្នាអំពីសន្តិភាព ស្ថិរភាព និងការអភិវឌ្ឍ។

នៅក្នុងទំនាក់ទំនងវៀតណាម - ឡាវ កិច្ចសហប្រតិបត្តិការលើវិស័យការពារជាតិ សន្តិសុខ និងការគ្រប់គ្រងព្រំដែន មានអត្ថន័យផ្ទាល់ចំពោះស្ថិរភាពនៃប្រទេសនីមួយៗ។

ឯកអគ្គរដ្ឋទូតវៀតណាមប្រចាំនៅឡាវ Tran Minh Tam បានបញ្ជាក់ថា៖ «ឡាវលើកកម្ពស់តួនាទីជាមជ្ឈមណ្ឌលតភ្ជាប់នៃតំបន់ វៀតណាមលើកកម្ពស់គុណសម្បត្តិខាងទីផ្សារ សមត្ថភាពផលិតកម្ម និងច្រកទ្វារចេញទៅសមុទ្រ ព្រមជាមួយគ្នានោះ ប្រទេសទាំងពីរចូលរួមកាន់តែស៊ីជម្រៅទៅក្នុងខ្សែច្រវាក់ផលិតកម្ម ខ្សែច្រវាក់ផ្គត់ផ្គង់ និងខ្សែច្រវាក់តម្លៃនៃតំបន់។ ការផ្សារភ្ជាប់ជាយុទ្ធសាស្ត្រមិនមែនឈប់ត្រឹមតែការរួមដំណើរគ្នាសុទ្ធសាធខាងនយោបាយប៉ុណ្ណោះទេ ប៉ុន្តែគឺជាការប្រទាក់ក្រឡាយ៉ាងស្អិតរមួតនូវផលប្រយោជន៍ជាតិ។ អាស្រ័យហេតុនេះ វិបុលភាព និងការអភិវឌ្ឍរបស់ប្រទេសមួយ គឺជាកម្លាំងរុញច្រាន និងជាឈ្នាន់ជំរុញការអភិវឌ្ឍរបស់ប្រទេសមួយទៀត»។

ជាមួយកម្ពុជាវិញ ការប្រទាក់ក្រឡានៃផលប្រយោជន៍កាន់តែបង្ហាញឱ្យឃើញយ៉ាងច្បាស់នៅក្នុងពាណិជ្ជកម្ម ការវិនិយោគ គមនាគមន៍ ទេសចរណ៍ និងកិច្ចសហប្រតិបត្តិការនៅតំបន់ព្រំដែន។

បណ្តាគម្រោងតភ្ជាប់ដូចជា ផ្លូវល្បឿនលឿនទីក្រុងហូជីមិញ - ម៉ុកបាយ - បាវិត - ភ្នំពេញ បណ្តាគូច្រកទ្វារព្រំដែន និងជើងហោះហើរត្រង់ កំពុងរួមចំណែកកាត់បន្ថយចម្ងាយ បង្កលក្ខណៈងាយស្រួលដល់ពាណិជ្ជកម្ម និងការធ្វើដំណើរទៅមករវាងប្រទេសទាំងពីរ។

មិនត្រឹមតែពង្រឹងការតភ្ជាប់ហេដ្ឋារចនាសម្ព័ន្ធប៉ុណ្ណោះទេ វៀតណាម និងកម្ពុជា នៅតែបន្តជំរុញការសម្របសម្រួលគោលនយោបាយ និងស្ថាប័ន សំដៅបង្កើតលក្ខខណ្ឌបន្ថែមទៀតសម្រាប់កិច្ចសហប្រតិបត្តិការសេដ្ឋកិច្ច។

ឯកអគ្គរដ្ឋទូតវៀតណាមប្រចាំនៅកម្ពុជា Nguyen Minh Vu បានសង្កត់ធ្ងន់ថា៖ «មិនត្រឹមតែការតភ្ជាប់ហេដ្ឋារចនាសម្ព័ន្ធរូបវន្តប៉ុណ្ណោះទេ ប្រទេសទាំងពីរក៏មានការផ្សារភ្ជាប់គ្នាកាន់តែជិតស្និទ្ធថែមទៀតអំពីគោលនយោបាយ និងយុទ្ធសាស្ត្រអភិវឌ្ឍន៍។ បញ្ហាស្ទះផ្នែកគោលនយោបាយ និងស្ថាប័ន កំពុងត្រូវបានសម្របសម្រួលដោះស្រាយ ដើម្បីបង្កើតច្រករបៀងផ្លូវច្បាប់ និងគោលនយោបាយកាន់តែបើកចំហសម្រាប់កិច្ចសហប្រតិបត្តិការដ៏រឹងមាំរវាងប្រទេសទាំងពីរ។ ភាគីទាំងពីរក៏កំពុងផ្លាស់ប្តូរយោបល់ដើម្បីបង្កើតយន្តការសហប្រតិបត្តិការសេដ្ឋកិច្ចថ្មី សំដៅជំរុញបន្ថែមទៀតនូវទំនាក់ទំនងសេដ្ឋកិច្ច ពាណិជ្ជកម្ម និងការវិនិយោគរវាងភាគីទាំងពីរ»។

ក្នុងវិសាលភាពកាន់តែទូលំទូលាយ វៀតណាម ឡាវ និងកម្ពុជា រួមគ្នាចែករំលែកផលប្រយោជន៍ក្នុងការពង្រឹងការតភ្ជាប់អនុតំបន់មេគង្គ និងការកសាងអាស៊ានមួយប្រកបដោយសាមគ្គីភាព និងភាពធន់។ អាស្រ័យហេតុនេះ ប្រទេសទាំងបីកាន់តែស្ថិតនៅក្នុងលំហអភិវឌ្ឍន៍តែមួយ ដែលមានផលប្រយោជន៍ប្រទាក់ក្រឡាគ្នាយ៉ាងច្រើន។

ការប្រែក្លាយមូលដ្ឋានគ្រឹះនយោបាយទៅជាកម្លាំងចលករនៃការអភិវឌ្ឍ

នៅក្នុងបរិបទដែលសេដ្ឋកិច្ចពិភពលោកមានការប្រែប្រួលយ៉ាងឆាប់រហ័ស និងការប្រកួតប្រជែងជាយុទ្ធសាស្ត្រកាន់តែកើនឡើង ភាពស្អិតរមួតរវាងវៀតណាម ឡាវ និងកម្ពុជា រឹតតែមានអត្ថន័យសំខាន់។

ប្រទេសទាំងបីសុទ្ធតែត្រូវការរក្សាទុកបរិស្ថានសន្តិភាព ស្ថិរភាព ដើម្បីការអភិវឌ្ឍ ពង្រីកទំនាក់ទំនងកិច្ចការបរទេស ធ្វើពិពិធកម្មដៃគូ ព្រមទាំងលើកកម្ពស់ភាពម្ចាស់ការ និងសមត្ថភាពធន់នៃខឿនសេដ្ឋកិច្ច។

កត្តានោះបានដាក់ចេញនូវតម្រូវការនាំយកកិច្ចសហប្រតិបត្តិការឈានចូលដំណាក់កាលថ្មីមួយ៖ ពីមូលដ្ឋានគ្រឹះនយោបាយដ៏រឹងមាំ ទៅជាផលប្រយោជន៍សេដ្ឋកិច្ចជាក់ស្តែង ពីកិច្ចសហប្រតិបត្តិការតាមវិស័យនីមួយៗ ទៅជាការតភ្ជាប់បណ្តាលំហអភិវឌ្ឍន៍។

ចំពោះប្រទេសឡាវ តម្រូវការដែលបានដាក់ចេញគឺ កម្រិតនៃការផ្សារភ្ជាប់ជាពិសេសខាងនយោបាយ ចាំបាច់ត្រូវឆ្លុះបញ្ចាំងឱ្យបានសមាមាត្រជាងមុននៅក្នុងប្រសិទ្ធភាពនៃកិច្ចសហប្រតិបត្តិការសេដ្ឋកិច្ច និងការតភ្ជាប់រវាងខឿនសេដ្ឋកិច្ចទាំងពីរ។

យោងតាមឯកអគ្គរដ្ឋទូត Tran Minh Tam៖ «តម្រូវការដែលបានដាក់ចេញ គឺធ្វើយ៉ាងណាឱ្យកម្រិតនៃការផ្សារភ្ជាប់ជាពិសេសខាងនយោបាយ ត្រូវបានឆ្លុះបញ្ចាំងឱ្យកាន់តែសមាមាត្រនៅក្នុងប្រសិទ្ធភាពនៃកិច្ចសហប្រតិបត្តិការសេដ្ឋកិច្ច និងភាពស្អិតរមួតរវាងខឿនសេដ្ឋកិច្ចទាំងពីរ។ ការ ‘ផ្សារភ្ជាប់ជាយុទ្ធសាស្ត្រ’ ក្នុងដំណាក់កាលខាងមុខ នឹងកាន់តែត្រូវបានធ្វើឱ្យជាក់ស្តែងឡើង តាមរយៈការបំពេញបន្ថែមឱ្យគ្នាទៅវិញទៅមកនៃខឿនសេដ្ឋកិច្ចទាំងពីរ បណ្តាគម្រោងរួមបង្កើតបាននូវតម្លៃ និងផលប្រយោជន៍សម្រាប់ប្រជាជន និងសហគ្រាសនៃប្រទេសទាំងពីរ»។

ចំពោះកម្ពុជាវិញ ការរំពឹងទុកក៏សំដៅឆ្ពោះទៅរកការបង្កើតប្រព័ន្ធអេកូឡូស៊ីនៃកិច្ចសហប្រតិបត្តិការសេដ្ឋកិច្ចឱ្យកាន់តែស្អិតរមួតផងដែរ។

ឯកអគ្គរដ្ឋទូត Nguyen Minh Vu បានវាយតម្លៃថា៖ «ខ្ញុំយល់ឃើញថា ដំណើរទស្សនកិច្ចនៅកម្ពុជារបស់នាយករដ្ឋមន្ត្រី Le Minh Hung មិនត្រឹមតែពង្រឹងបន្ថែមទៀតនូវការតភ្ជាប់កាន់តែជិតស្និទ្ធ និងមានលក្ខណៈបំពេញបន្ថែមឱ្យគ្នាទៅវិញទៅមករវាងខឿនសេដ្ឋកិច្ចទាំងពីរប៉ុណ្ណោះទេ ប៉ុន្តែថែមទាំងបើកឱកាសបង្កើតប្រព័ន្ធអេកូឡូស៊ីផ្សារភ្ជាប់សេដ្ឋកិច្ចគ្រប់ជ្រុងជ្រោយជាងមុនរវាងវៀតណាម - កម្ពុជា សំដៅឆ្ពោះទៅរកគោលដៅលើកកម្ពស់ទំហំពាណិជ្ជកម្មទ្វេភាគីឱ្យឡើងដល់ ២០ ពាន់លានដុល្លារអាមេរិកក្នុងពេលឆាប់ៗខាងមុខ។ នាយករដ្ឋមន្ត្រី Le Minh Hung និងថ្នាក់ដឹកនាំកម្ពុជា នឹងធ្វើឱ្យជាក់ស្តែងនូវរាល់ការប្តេជ្ញាចិត្ត និងកិច្ចព្រមព្រៀងដែលសម្រេចបាន ព្រមទាំងកំណត់ទិសដៅជាយុទ្ធសាស្ត្រសម្រាប់ទំនាក់ទំនងរវាងប្រទេសទាំងពីរក្នុងពេលខាងមុខ»។

ហេតុដូច្នេះហើយ ចំណុចគួរឱ្យកត់សម្គាល់នៃដំណើរទស្សនកិច្ចលើកនេះ មិនត្រឹមតែស្ថិតនៅលើជំនួបពិភាក្សា ឬកិច្ចព្រមព្រៀងនានាដែលត្រូវបានចុះហត្ថលេខាប៉ុណ្ណោះទេ ប៉ុន្តែថែមទាំងស្ថិតនៅលើសមត្ថភាពប្រែក្លាយការយល់ឃើញស្របគ្នាខាងនយោបាយ ឱ្យទៅជាការតភ្ជាប់ថ្មីៗ គម្រោងថ្មីៗ និងផលប្រយោជន៍កាន់តែជាក់ស្តែងចំពោះប្រជាពលរដ្ឋ និងសហគ្រាស។

នៅក្នុងទំនាក់ទំនង វៀតណាម - ឡាវ - កម្ពុជា ប្រវត្តិសាស្ត្របានបង្កើតជាមូលដ្ឋានគ្រឹះ ទំនុកចិត្តពង្រឹងភាពស្អិតរមួត ហើយផលប្រយោជន៍រួមនឹងបន្តបង្កើតកម្លាំងចលករបន្ថែមទៀតសម្រាប់កិច្ចសហប្រតិបត្តិការអភិវឌ្ឍន៍យូរអង្វែង៕

នាយករដ្ឋមន្ត្រី Le Minh Hung នឹងអញ្ជើញទៅបំពេញទស្សនកិច្ចផ្លូវការនៅឡាវ និងកម្ពុជា យុគសម័យ - ចាប់ពីថ្ងៃទី ៨ ដល់ថ្ងៃទី ១០ ខែតុលា ឆ្នាំ ២០២៦ នាយករដ្ឋមន្ត្រីរដ្ឋាភិបាល Le Minh Hung នឹងដឹកនាំគណៈប្រតិភូជាន់ខ្ពស់វៀតណាម ទៅបំពេញទស្សនកិច្ចផ្លូវការនៅសាធារណរដ្ឋប្រជាធិបតេយ្យប្រជាមានិតឡាវ និងព្រះរាជាណាចក្រកម្ពុជា។

បង្កើតកម្លាំងចលករបន្ថែមទៀតសម្រាប់កិច្ចសហប្រតិបត្តិការវៀតណាមជាមួយឡាវ និងកម្ពុជា យុគសម័យ - ដំណើរទស្សនកិច្ចផ្លូវការនៅប្រទេសឡាវ និងកម្ពុជា របស់នាយករដ្ឋមន្ត្រី Le Minh Hung ចាប់ពីថ្ងៃទី ៨ ដល់ថ្ងៃទី ១០ ខែតុលា ត្រូវបានរំពឹងថានឹងជំរុញការធ្វើឱ្យជាក់ស្តែងនូវការប្តេជ្ញាចិត្តជាន់ខ្ពស់នានា បង្កើនប្រសិទ្ធភាពនៃកិច្ចសហប្រតិបត្តិការសេដ្ឋកិច្ច ការតភ្ជាប់ហេដ្ឋារចនាសម្ព័ន្ធ និងការអភិវឌ្ឍធនធានមនុស្ស តាមរយៈនោះនាំយកទំនាក់ទំនងរបស់វៀតណាមជាមួយប្រទេសជិតខាងទាំងពីរឱ្យកាន់តែស៊ីជម្រៅ និងជាក់ស្តែងជាលំដាប់។

ឌឿងង្វៀន