បុណ្យជាតិថ្ងៃទី ២ ខែកញ្ញា ផ្សព្វផ្សាយចេញពីបណ្តាទីភ្នាក់ងារតំណាងវៀតណាមនៅឯបរទេស

មិត្តភាព ការរួមដំណើរជាមួយវៀតណាម

នៅរាជធានីភ្នំពេញ នាថ្ងៃទី ២០ សីហា ស្ថានទូតវៀតណាមប្រចាំនៅកម្ពុជា បានរៀបចំពិធីរំលឹកខួប ៨១ ឆ្នាំនៃបុណ្យជាតិ ដោយមានការចូលរួមពីសំណាក់ឧបនាយករដ្ឋមន្ត្រីទីមួយ Neth Savoeun តំណាងរាជរដ្ឋាភិបាលកម្ពុជា ប្រធានរដ្ឋសភា Khuon Sudary រួមជាមួយប្រតិភូជាច្រើនរូបទៀត។

តាងនាមរាជរដ្ឋាភិបាល និងប្រជាជនកម្ពុជា ឧបនាយករដ្ឋមន្ត្រី Neth Savoeun បានផ្ញើសារអបអរសាទរជូនចំពោះថ្នាក់ដឹកនាំបក្ស រដ្ឋ និងប្រជាជនវៀតណាម ព្រមទាំងវាយតម្លៃខ្ពស់ចំពោះជំហានអភិវឌ្ឍន៍ប្រកបដោយភាពរស់រវើករបស់វៀតណាម ជាពិសេសលើវិស័យសេដ្ឋកិច្ច និងសង្គមកិច្ច។ លោកបានសម្តែងនូវជំនឿជាក់ថា ប្រទេសវៀតណាមនឹងបន្តសម្រេចបានសមិទ្ធផលជាច្រើនទៀត ក្រោមការដឹកនាំរបស់បក្សកុម្មុយនីស្តវៀតណាម។

បរិយាកាសអបអរសាទរបុណ្យជាតិក៏បានផ្សព្វផ្សាយនៅសិង្ហបុរីផងដែរ។ នាយប់ថ្ងៃទី ២៤ សីហា ស្ថានទូតវៀតណាមបានរៀបចំពិធីរំលឹកខួបក្នុងក្របខ័ណ្ឌនៃដំណើរទស្សនកិច្ចផ្លូវការនៅសិង្ហបុរី របស់សមាជិកការិយាល័យនយោបាយ សមាជិកប្រចាំការនៃគណៈលេខា Tran Cam Tu និងគណៈប្រតិភូជាន់ខ្ពស់នៃបក្សកុម្មុយនីស្តវៀតណាម។

អនុអគ្គលេខាបក្សសកម្មភាពប្រជាជនសិង្ហបុរី រដ្ឋមន្ត្រីក្រសួងការពារជាតិ ព្រមទាំងជារដ្ឋមន្ត្រីសម្របសម្រួលសេវាសាធារណៈសិង្ហបុរី Chan Chun Sing បានអញ្ជើញចូលរួមក្នុងព្រឹត្តិការណ៍នេះ។

តំណាងបណ្តាស្ថាប័ន អង្គការចាត់តាំង និងសហគមន៍ជនជាតិវៀតណាមបានរួមគ្នាចូលរួមព្រឹត្តិការណ៍នេះក្នុងបរិយាកាសស្និទ្ធស្នាល និងមិត្តភាព។

ក្នុងថ្ងៃដដែល នៅ Colombo ស្ថានទូតវៀតណាមប្រចាំនៅស្រីលង្កា បានរៀបចំពិធីរំលឹកខួបនៅសណ្ឋាគារ Hilton Colombo។ សកម្មភាពនេះជាឱកាសឧទ្ទេសនាមអំពីដំណើរផ្លូវនៃការកសាង និងអភិវឌ្ឍន៍របស់វៀតណាម ជូនចំពោះតំណាងអាជ្ញាធរនៃប្រទេសសាមី ទីភ្នាក់ងារការទូត អង្គការអន្តរជាតិ និងមិត្តភក្តិស្រីលង្កា។

នៅអាមេរិកខាងត្បូង នាយប់ថ្ងៃទី ២៧ សីហា ស្ថានទូតវៀតណាមប្រចាំនៅប្រេស៊ីល បានរៀបចំពិធីរំលឹកខួប ៨១ ឆ្នាំនៃបដិវត្តន៍ខែសីហា និងបុណ្យជាតិថ្ងៃទី ២ ខែកញ្ញា នៅក្លឹបកងទ័ពជើងទឹក Brasilia។

អញ្ជើញចូលរួមមានវត្តមានលោកស្រីឯកអគ្គរដ្ឋទូត Susan Kleebank អនុរដ្ឋមន្ត្រីការបរទេសប្រេស៊ីល តំណាងរដ្ឋសភា រដ្ឋាភិបាល បណ្តាក្រសួង ស្ថាប័នប្រេស៊ីល រួមជាមួយប្រធានទីភ្នាក់ងារតំណាងការទូត អង្គការអន្តរជាតិ និងអនុព័ន្ធយោធាជាច្រើនរូប។

ចំណុចលេចធ្លោមួយនៃកម្មវិធី គឺលំហតាំងពិព័រណ៍រូបថតអំពីលោកប្រធាន Ho Chi Minh និងដំណើរផ្លូវបដិវត្តន៍វៀតណាម។

លោកស្រីឯកអគ្គរដ្ឋទូត Susan Kleebank បានវាយតម្លៃថា ការចាប់ផ្តើមដំណើរការចរចាកិច្ចព្រមព្រៀងពាណិជ្ជកម្មអនុគ្រោះរវាងប្លុកទីផ្សាររួមអាមេរិកខាងត្បូង (MERCOSUR) និងវៀតណាម អាចបើកបន្ថែមនូវស្ពានតភ្ជាប់ជំរុញពាណិជ្ជកម្ម ការវិនិយោគ និងការផ្លាស់ប្តូរប្រជាជនរវាងអាមេរិកខាងត្បូង និងអាស៊ីអាគ្នេយ៍។

ឯកអគ្គរដ្ឋទូតវៀតណាមប្រចាំនៅឡាវ Nguyen Minh Tam រួមជាមួយបណ្តាថ្នាក់ដឹកនាំជាន់ខ្ពស់របស់ឡាវ លើកកែវស្រាអបអរសាទរខួប ៨១ ឆ្នាំនៃជោគជ័យបដិវត្តន៍ខែសីហា (ថ្ងៃទី ១៩ ខែសីហា ឆ្នាំ ១៩៤៥ - ថ្ងៃទី ១៩ ខែសីហា ឆ្នាំ ២០២៦) និងបុណ្យជាតិនៃសាធារណរដ្ឋសង្គមនិយមវៀតណាម (ថ្ងៃទី ២ ខែកញ្ញា ឆ្នាំ ១៩៤៥ ដល់ថ្ងៃទី ២ ខែកញ្ញា ឆ្នាំ ២០២៦)។

ផ្សារភ្ជាប់សហគមន៍ ផ្សព្វផ្សាយរូបភាពប្រទេសជាតិ

នៅឡាវ ពិធីលៀងសាយភោជន៍រំលឹកខួបបុណ្យជាតិថ្ងៃទី ២ ខែកញ្ញា ដែលរៀបចំឡើងដោយស្ថានទូតវៀតណាម នាថ្ងៃទី ២៩ សីហា បានប្រព្រឹត្តទៅក្នុងបរិយាកាសមិត្តភាព និងភាពស្និទ្ធស្នាល។

ថ្លែងមតិនៅក្នុងព្រឹត្តិការណ៍នេះ ឯកអគ្គរដ្ឋទូតវៀតណាមបានអះអាងថា ក្នុងរយៈពេល ៨១ ឆ្នាំកន្លងមក ក្រោមការដឹកនាំរបស់បក្សកុម្មុយនីស្តវៀតណាម ប្រជាជនវៀតណាមបានរួបរួមសាមគ្គីគ្នា ជំនះពុះពារលើការលំបាកយ៉ាងរឹងមាំ ការពារយ៉ាងរឹងមាំនូវឯករាជ្យ អធិបតេយ្យ និងបូរណភាពទឹកដី អនុវត្តបុព្វហេតុផ្លាស់ប្តូរថ្មី និងសម្រេចបានសមិទ្ធផលជាច្រើនដែលមានអត្ថន័យជាប្រវត្តិសាស្ត្រ។

បរិយាកាសនៃការរំលឹកខួបក៏បានប្រព្រឹត្តទៅនៅ Pakse ជាទីកន្លែងដែលស្ថានអគ្គកុងស៊ុលវៀតណាមបានរៀបចំពិធីរំលឹកខួប ៨១ ឆ្នាំនៃបដិវត្តន៍ខែសីហា និងបុណ្យជាតិថ្ងៃទី ២ ខែកញ្ញា។

នៅក្នុងក្របខ័ណ្ឌនៃកម្មវិធី មានពិព័រណ៍រូបថតឧទ្ទេសនាមអំពីរមណីយដ្ឋានធម្មជាតិ សមិទ្ធផលនៃការផ្លាស់ប្តូរថ្មីរបស់បណ្តាមូលដ្ឋានវៀតណាមដែលចងសម្ព័ន្ធមេត្រីភាពជាមួយខេត្តចំនួន ៤ នៅភាគខាងត្បូងប្រទេសឡាវ និងមូលដ្ឋានមួយចំនួននៅភាគខាងជើង។ ស្តង់ទំនិញឧទ្ទេសនាមអំពីប្រទេសជាតិ មនុស្សជាតិ វប្បធម៌ និងផលិតផល OCOP របស់វៀតណាម ក៏ត្រូវបានរៀបចំឡើងផងដែរ។

នៅប៉េកាំង នាថ្ងៃទី ២៨ សីហា ឯកអគ្គរដ្ឋទូតឡាវប្រចាំនៅចិន Somphone Sichaleune បានដឹកនាំគណៈប្រតិភូកម្មាភិបាលស្ថានទូតឡាវ អញ្ជើញទៅសួរសុខទុក្ខ និងអបអរសាទរស្ថានទូតវៀតណាម ក្នុងឱកាសរំលឹកខួប ៨១ ឆ្នាំនៃបុណ្យជាតិ។

ឯកអគ្គរដ្ឋទូតវៀតណាមប្រចាំនៅចិន Pham Thanh Binh បានថ្លែងអំណរគុណយ៉ាងជ្រាលជ្រៅចំពោះពាក្យជូនពរដ៏ល្អប្រសើរ ព្រមទាំងឱ្យដឹងថា ដំណើរទស្សនកិច្ចនេះប្រព្រឹត្តទៅចំឱកាសរំលឹកខួប ៨១ ឆ្នាំនៃទិវាប្រពៃណីផ្នែកការទូតវៀតណាម ដែលនាំមកនូវសេចក្តីសោមនស្សរីករាយយ៉ាងពិសេសសម្រាប់កម្មាភិបាល និងបុគ្គលិកនៃស្ថានទូត។

នៅប្រ៊ុយណេដារូស្សាឡាម នាព្រឹកថ្ងៃទី ៣០ សីហា ស្ថានទូតវៀតណាមបានរៀបចំពិធីរំលឹកខួប ដោយមានការចូលរួមពីសំណាក់ឯកអគ្គរាជទូតកម្ពុជា ភារធារីស្ថានទូតឡាវ មិត្តភក្តិអន្តរជាតិ និងជនជាតិវៀតណាមយ៉ាងច្រើនកុះករដែលកំពុងរស់នៅប្រ៊ុយណេ។

លោកស្រីឯកអគ្គរដ្ឋទូត Do Thuy Duong បានសង្កត់ធ្ងន់លើតួនាទីនៃការផ្លាស់ប្តូរប្រជាជន និងសហគមន៍ជនជាតិវៀតណាម ក្នុងការថែរក្សាពូនជ្រំទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំងពីរ ព្រមទាំងសម្តែងនូវបំណងចង់ឱ្យសហគមន៍បន្តរួមដំណើរជាមួយស្ថានទូត ក្នុងបណ្តាសកម្មភាពឆ្ពោះទៅកាន់ការរំលឹកខួប ៣៥ ឆ្នាំនៃការបង្កើតទំនាក់ទំនងការទូតវៀតណាម - ប្រ៊ុយណេ ក្នុងឆ្នាំ ២០២៧។

ចាប់ពីអាស៊ីអាគ្នេយ៍ អាស៊ីខាងត្បូង រហូតដល់អាមេរិកខាងត្បូង បណ្តាសកម្មភាពរំលឹកខួបបុណ្យជាតិត្រូវបានរៀបចំឡើងតាមទម្រង់ដ៏សមស្របជាច្រើន ទាំងរំលឹកឡើងវិញនូវព្រឹត្តិការណ៍ប្រវត្តិសាស្ត្ររបស់ប្រជាជាតិ ទាំងឧទ្ទេសនាមអំពីវប្បធម៌ ប្រទេសជាតិ និងមនុស្សជាតិវៀតណាម ជូនចំពោះមិត្តភក្តិអន្តរជាតិ។

តាមរយៈនោះ បណ្តាទីភ្នាក់ងារតំណាងវៀតណាមនៅឯបរទេស បានបន្តលើកកម្ពស់តួនាទីតភ្ជាប់សហគមន៍ ផ្សព្វផ្សាយរូបភាពប្រទេសជាតិ និងរួមចំណែកពង្រឹងទំនាក់ទំនងមិត្តភាព កិច្ចសហប្រតិបត្តិការរវាងវៀតណាម ជាមួយបណ្តាប្រទេស ដៃគូ និងមិត្តភក្តិអន្តរជាតិ៕

បណ្តាគោលដៅដ៏ស័ក្តិសមសម្រាប់ដំណើរកម្សាន្តក្នុងឱកាសបុណ្យជាតិ ២ កញ្ញា យុគសម័យ - ចុងរដូវក្តៅ និងថ្ងៃឈប់សម្រាកដ៏វែងក្នុងឱកាសបុណ្យជាតិ ២ កញ្ញា គឺជាពេលវេលាដ៏ស័ក្តិសមបំផុតសម្រាប់ក្រុមគ្រួសារក្នុងការចំណាយពេលវេលាជាមួយគ្នា មុនពេលឈានចូលឆ្នាំសិក្សាថ្មី សម្រាប់ក្រុមមិត្តភក្តិធ្វើដំណើរកម្សាន្តតាមឆ្នេរសមុទ្រ និងសម្រាប់គូស្នេហ៍ស្វែងរកទីកន្លែងលម្ហែកាយដើម្បីទទួលយកភាពឯកជន។

ទីក្រុង Ha Noi បាញ់កាំជ្រួចនៅទីតាំងចំនួន ៥ អបអរសាទរទិវាបុណ្យជាតិ ២ កញ្ញា យុគសម័យ - នាយប់ថ្ងៃទី ២ ខែកញ្ញា ឆ្នាំ ២០២៦ Ha Noi នឹងរៀបចំការបាញ់កាំជ្រួចកម្រិតខ្ពស់រួមផ្សំជាមួយកម្រិតទាប នៅទីតាំងចំនួន ៥ លើភូមិសាស្ត្ររដ្ឋធានី ចាប់ពីម៉ោង ២១:០០ ដល់ ២១:១៥ នាទី ក្នុងឱកាសអបអរសាទរខួបលើកទី ៨១ នៃបដិវត្តន៍ខែសីហាទទួលបានជោគជ័យ និងទិវាបុណ្យជាតិនៃសាធារណរដ្ឋសង្គមនិយមវៀតណាម។

ឌឿងង្វៀន