វៀតណាមរួមចំណែកពង្រីកលំហសហប្រតិបត្តិការ អាស៊ាន - អង់គ្លេស

ភ្លាមៗនៅក្នុងថ្ងៃដំបូងនៃការកាន់តំណែង រដ្ឋមន្ត្រីការបរទេសថ្មីនៃចក្រភពអង់គ្លេស Ed Miliband បានជ្រើសរើសយកអាស៊ានជាទិសដៅសម្រាប់សកម្មភាពកិច្ចការបរទេសអន្តរជាតិដំបូងបង្អស់របស់ខ្លួន។

មុនពេលចូលរួមសន្និសីទរដ្ឋមន្ត្រីការបរទេសអាស៊ាននៅ Manila កាលពីខែកក្កដា ឆ្នាំ ២០២៦ ជាមួយសមភាគីអាស៊ានទាំងឡាយ ជំនួបទ្វេភាគីលើកដំបូងរបស់លោក គឺជាមួយរដ្ឋមន្ត្រីក្រសួងការបរទេសវៀតណាម Le Hoai Trung។ បន្ទាប់ពីនោះ រដ្ឋមន្ត្រីទាំងពីររូបបានរួមគ្នាធ្វើជាសហប្រធានសន្និសីទរដ្ឋមន្ត្រី អាស៊ាន - អង់គ្លេស។

បណ្តាសកម្មភាពទាំងនេះបានបង្ហាញឱ្យឃើញពីសារៈសំខាន់នៃទំនាក់ទំនងភាពជាដៃគូ អាស៊ាន - អង់គ្លេស ព្រមទាំងឆ្លុះបញ្ចាំងពីតួនាទីរបស់វៀតណាមក្នុងឋានៈជាអ្នកសម្របសម្រួលទំនាក់ទំនងរវាងភាគីទាំងពីរ។

ការដែលអាស៊ានបានក្លាយជាទិសដៅដំបូងបង្អស់នៅក្នុងដំណើរទស្សនកិច្ចការងារនៅក្រៅប្រទេសរបស់រដ្ឋមន្ត្រីការបរទេស Ed Miliband គឺមិនមែនជារឿងចៃដន្យនោះឡើយ។ នៅក្នុងពិភពលោកដែលកាន់តែមានការប្រែប្រួលយ៉ាងស្មុគស្មាញ អាស៊ានបានបង្កើតនូវថ្នាលគ្រឹះកិច្ចសន្ទនាប្រកបដោយភាពបើកចំហ និងគួរឱ្យទុកចិត្តបាន។

ឯកអគ្គរាជទូតអង់គ្លេសប្រចាំនៅវៀតណាម Iain Frew។

ដូចដែលរដ្ឋមន្ត្រីការបរទេស Ed Miliband បានថ្លែងនៅ Manila ថា៖ «សមត្ថភាពរបស់អាស៊ានក្នុងការនាំយកបណ្តាប្រទេសឱ្យមកជិតគ្នាដើម្បីកិច្ចសន្ទនាបើកចំហ និងការគោរពគ្នាទៅវិញទៅមក គឺមិនដែលមានសារៈសំខាន់ជាងពេលនេះនោះឡើយ។ ចក្រភពអង់គ្លេសនៅតែបន្តគាំទ្រយ៉ាងម៉ឺងម៉ាត់ចំពោះតួនាទីមជ្ឈភាពរបស់អាស៊ាន និងនិម្មាបនកម្មតំបន់ដែលផ្អែកលើច្បាប់ ដែលដឹកនាំដោយអាស៊ាន»។

ជាមួយនឹងសមាជិកទាំង ១១ ប្រទេស ដៃគូសន្ទនាចំនួន ១២ និងប្រទេសជាច្រើនទៀតដែលចូលរួមក្នុងសកម្មភាពប្រចាំឆ្នាំ អាស៊ានបានបង្ហាញជាបន្តបន្ទាប់នូវសមត្ថភាពប្រមូលផ្តុំបណ្តាប្រទេសដែលមានទស្សនៈខុសប្លែកគ្នា រក្សាគន្លងសហប្រតិបត្តិការ និងជំរុញដំណោះស្រាយជាក់ស្តែងសម្រាប់បញ្ហាប្រឈមរួមទាំងឡាយ។

៥ ឆ្នាំនៃការនាំទំនាក់ទំនង អាស៊ាន - អង់គ្លេស ឈានចូលភាពស៊ីជម្រៅ

ឆ្នាំនេះ អង់គ្លេស និងអាស៊ាន ប្រារព្ធខួបលើកទី ៥ នៃការបង្កើតទំនាក់ទំនងភាពជាដៃគូសន្ទនា ជាមួយនឹងការប្តេជ្ញាចិត្តបន្ត «បោះជំហានទៅមុខជាមួយគ្នា»។

ភាគីទាំងពីរបានសម្រេចបាន ៩៩% នៃខ្លឹមសារនៃផែនការសកម្មភាពលើកដំបូង ព្រមទាំងបានឯកភាពលើការប្តេជ្ញាចិត្តថ្មីៗជាបន្តបន្ទាប់ដែលមានការផ្តោតសំខាន់ និងមហិច្ឆតាខ្ពស់ជាងមុនសម្រាប់រយៈពេល ៥ ឆ្នាំខាងមុខ ព្រមទាំងអនុម័តសេចក្តីថ្លែងការណ៍រួមស្តីពីឥណ្ឌូ-ប៉ាស៊ីហ្វិក។

អង់គ្លេសក៏បានក្លាយជាសមាជិកថ្មីបំផុតនៃវេទិកាតំបន់អាស៊ាន (ARF) ផងដែរ។ នៅក្នុងដំណើរការនោះ តួនាទីរបស់វៀតណាមក្នុងឋានៈជាអ្នកសម្របសម្រួលថ្នាក់ជាតិ មានអត្ថន័យសំខាន់ជាពិសេស។

ចាប់ពីការពិគ្រោះយោបល់យ៉ាងជិតស្និទ្ធ រហូតដល់ការអនុវត្តបណ្តាគម្រោងរួម វៀតណាមបានរួមចំណែកពង្រីកកិច្ចសហប្រតិបត្តិការ និងធានាឱ្យទំនាក់ទំនងភាពជាដៃគូស្របតាមបណ្តាអាទិភាពនៃតំបន់។ យើងនឹងបន្តលើកកម្ពស់ថ្នាលគ្រឹះនេះនៅក្នុងបណ្តាឆ្នាំខាងមុខ។

ប្រាំឆ្នាំមិនមែនជារយៈពេលដ៏វែងនៅក្នុងវិស័យការទូតនោះឡើយ ប៉ុន្តែទំនាក់ទំនង អាស៊ាន - អង់គ្លេស បានឆ្លងកាត់យ៉ាងឆាប់រហ័សនូវដំណាក់កាលកសាងគ្រឹះ ដើម្បីនាំមកនូវលទ្ធផលជាក់ស្តែងនានា។

ទំហំពាណិជ្ជកម្ម អាស៊ាន - អង់គ្លេស បានកើនឡើងទ្វេដងក្នុងរយៈពេល ៥ ឆ្នាំកន្លងមក ដោយឈានដល់ជាង ៦២ ពាន់លានផោនអង់គ្លេស។ ការរួមចំណែកគួរឱ្យកត់សម្គាល់ចំពោះសន្ទុះកំណើននេះ គឺពាណិជ្ជកម្ម អង់គ្លេស - វៀតណាម ដែលស្ទើរតែកើនឡើងទ្វេដង និងឈានដល់ជាង ១០ ពាន់លានផោនអង់គ្លេស នៅចុងឆ្នាំ ២០២៥។

រដ្ឋមន្ត្រីក្រសួងការបរទេស Le Hoai Trung និងរដ្ឋមន្ត្រីការបរទេសអង់គ្លេស Ed Miliband បានធ្វើជាសហប្រធានសន្និសីទរដ្ឋមន្ត្រីការបរទេស អាស៊ាន - អង់គ្លេស នៅថ្ងៃទី ២២ ខែកក្កដា នៅ Manila (ហ្វីលីពីន)។

ស្របជាមួយគ្នានឹងកំណើនពាណិជ្ជកម្ម គឺបណ្តាកម្មវិធីសហប្រតិបត្តិការសេដ្ឋកិច្ចដែលមានការផ្តោតសំខាន់។ កម្មវិធីសមាហរណកម្មសេដ្ឋកិច្ច អាស៊ាន - អង់គ្លេស (EIP) បច្ចុប្បន្នកំពុងគាំទ្របណ្តាប្រទេសអាស៊ានក្នុងការកែទម្រង់បទប្បញ្ញត្តិ ការធ្វើឌីជីថលភាវូបនីយកម្មពាណិជ្ជកម្ម និងការអភិវឌ្ឍបណ្តាសេវាហិរញ្ញវត្ថុបរិយាបន្ន។

ភាគីទាំងពីរក៏សហការគ្នាដើម្បីគោលដៅអភិវឌ្ឍន៍ប្រកបដោយចីរភាពផងដែរ។ អង់គ្លេសបានគាំទ្រការជំរុញបណ្តាញអគ្គិសនីអាស៊ាន និងគាំទ្រអាស៊ានក្នុងការផ្លាស់ប្តូរទៅរកខឿនសេដ្ឋកិច្ចស្អាត ដែលមានសមត្ថភាពបន្ស៊ាំនឹងការប្រែប្រួលអាកាសធាតុ តាមរយៈមូលនិធិបរិវត្តកម្មបៃតង អាស៊ាន - អង់គ្លេស។

នៅក្នុងការផ្លាស់ប្តូរប្រជាជននិងប្រជាជន អង់គ្លេសគាំទ្រដល់ការអប់រំកុមារី ផ្តល់អាហារូបករណ៍ Chevening និង Women in STEM សម្រាប់ការអប់រំក្រោយឧត្តមសិក្សា ពង្រឹងការឃ្លាំមើលជំងឺរាតត្បាតក្នុងតំបន់ ព្រមទាំងជំរុញកិច្ចសហប្រតិបត្តិការស្តីពីសេដ្ឋកិច្ចច្នៃប្រឌិត និងកំណើនប្រកបដោយបរិយាបន្ន។

ទាំងនេះមិនមែនជាគំនិតផ្តួចផ្តើមដាច់ដោយឡែកនោះឡើយ។ បណ្តាសកម្មភាពទាំងនេះបានរួមចំណែកពង្រឹងសមត្ថភាពធន់របស់តំបន់ ជំរុញសមាហរណកម្មសេដ្ឋកិច្ច និងបង្កើតឱកាសបន្ថែមដែលនាំមកនូវផលប្រយោជន៍សម្រាប់ទាំងអាស៊ាន និងអង់គ្លេស។

យើងខ្ញុំជឿជាក់ថា ទំនាក់ទំនងភាពជាដៃគូដែលប្រកបដោយចីរភាពបំផុត ត្រូវបានកសាងឡើងលើផលប្រយោជន៍រួម ការគោរពគ្នាទៅវិញទៅមក និងលទ្ធផលសហប្រតិបត្តិការជាក់ស្តែងនានា។

នៅលើស្មារតីនោះ អង់គ្លេសក៏គាំទ្រតំបន់មួយប្រកបដោយសុវត្ថិភាព និងស្ថិរភាព តាមរយៈការគាំទ្រអាស៊ានក្នុងការដោះស្រាយបញ្ហាប្រឈមរួមនានា ដូចជា សន្តិសុខដែនសមុទ្រ ការឆបោកតាមប្រព័ន្ធអ៊ីនធឺណិត ឧក្រិដ្ឋកម្មមានការចាត់តាំង និងការធ្វើចំណាកស្រុកខុសច្បាប់ ព្រមទាំងជំរុញរបៀបវារៈស្ត្រី សន្តិភាព និងសន្តិសុខ។

វិធីសាស្ត្រទាក់ទងនេះ នឹងបន្តកំណត់ទិសដៅសម្រាប់ដំណាក់កាលបន្ទាប់នៃទំនាក់ទំនង អាស៊ាន - អង់គ្លេស។

ដូចដែលរដ្ឋមន្ត្រីការបរទេស Miliband បានសង្កត់ធ្ងន់នៅ Manila ថា៖ «ទោះបីជាសន្តិសុខដែនសមុទ្រ សន្តិសុខថាមពល សមត្ថភាពធន់នៃខឿនសេដ្ឋកិច្ច ឬបច្ចេកវិទ្យាដែលកំពុងលេចធ្លោក្តី អនាគតរបស់យើងនឹងកាន់តែពឹងផ្អែកលើរបៀបដែលយើងសហការគ្នាជាពហុភាគី»។

ទំនាក់ទំនង អង់គ្លេស - វៀតណាម បង្កើតជាគ្រឹះសម្រាប់កិច្ចសហប្រតិបត្តិការក្នុងតំបន់

ទំនាក់ទំនង អង់គ្លេស - វៀតណាម បានបង្ហាញថា បណ្តាទំនាក់ទំនងទ្វេភាគីដ៏រឹងមាំអាចរួមចំណែកពង្រឹងទំនាក់ទំនងភាពជាដៃគូក្នុងតំបន់នានា។

កិច្ចប្រជុំគណៈកម្មាធិការសហប្រតិបត្តិការរួម អាស៊ាន - អង់គ្លេស លើកទី ៥ ដឹកនាំដោយគណៈបេសកកម្មតំណាងវៀតណាមប្រចាំនៅអាស៊ាន ក្នុងតួនាទីជាប្រទេសសម្របសម្រួលទំនាក់ទំនង អាស៊ាន - អង់គ្លេស ធ្វើជាសហប្រធានជាមួយគណៈបេសកកម្មអង់គ្លេសប្រចាំនៅអាស៊ាន នៅថ្ងៃទី ៤ ខែមីនា។

ការដែលប្រទេសទាំងពីរដំឡើងកម្រិតទំនាក់ទំនងទៅជាភាពជាដៃគូយុទ្ធសាស្ត្រគ្រប់ជ្រុងជ្រោយក្នុងឆ្នាំ ២០២៥ បានឆ្លុះបញ្ចាំងពីភាពស៊ីជម្រៅនៃកិច្ចសហប្រតិបត្តិការដែលត្រូវបានកសាងឡើងក្នុងរយៈពេលជាច្រើនឆ្នាំលើវិស័យគន្លឹះនានា ដូចជា ពាណិជ្ជកម្ម ការវិនិយោគ ការអប់រំ អាកាសធាតុ សន្តិសុខ និងនវានុវត្តន៍។ ទំនាក់ទំនងនេះក្នុងពេលដំណាលគ្នាក៏បាននាំមកនូវផលប្រយោជន៍សម្រាប់តំបន់អាស៊ានទាំងមូលផងដែរ។

វេទិកាអនាគតអាស៊ាន (AFF) គឺជាឧទាហរណ៍ជាក់ស្តែងមួយ។

អង់គ្លេសបានគាំទ្រគំនិតផ្តួចផ្តើមដែលផ្តួចផ្តើមឡើងដោយវៀតណាម តាំងពីពេលដែលវេទិកានេះត្រូវបានរៀបចំឡើងជាលើកដំបូងក្នុងឆ្នាំ ២០២៤។ សហការជាមួយបណ្ឌិត្យសភាកិច្ចការបរទេសវៀតណាម និងក្រសួងការបរទេសវៀតណាម យើងខ្ញុំបានប្រមូលផ្តុំបណ្តាអ្នករៀបចំគោលនយោបាយ អ្នកជំនាញ និងថ្នាក់ដឹកនាំវ័យក្មេងមកពីអាស៊ាន ព្រមទាំងដៃគូសន្ទនានានា ដើម្បីកសាង និងផ្លាស់ប្តូរគំនិតយោបល់អំពីអនាគតនៃតំបន់។

គួរឱ្យកត់សម្គាល់ អង់គ្លេស និងវៀតណាម បានបង្កើនការរួមចំណែក និងគាំទ្រដល់យុវជនអាស៊ាន និងអង់គ្លេស ក្នុងការចូលរួម AFF ក្នុងបណ្តាឆ្នាំ ២០២៥ និង ២០២៦។ នៅទីនេះ យុវជនមានឱកាសចែករំលែកដោយផ្ទាល់នូវទស្សនវិស័យអំពីអនាគតជាមួយថ្នាក់ដឹកនាំ មន្ត្រីរាជការ ធុរកិច្ចជន និងអ្នកជំនាញ។

កិច្ចសហប្រតិបត្តិការស្តីពីសន្តិសុខថាមពល គឺជាឧទាហរណ៍មួយទៀត។ ការវិវឌ្ឍនាពេលថ្មីៗនេះនៅលើទីផ្សារថាមពល បានជះឥទ្ធិពលដល់តំបន់ជាច្រើន ដែលក្នុងនោះមានតំបន់អាស៊ីអាគ្នេយ៍ផងដែរ។ ដូច្នេះហើយ អង់គ្លេសកំពុងពន្លឿនការវិនិយោគលើថាមពលស្អាតនៅក្នុងតំបន់។

នៅថ្ងៃទី ២៤ ខែមីនា អនុរដ្ឋមន្ត្រីការបរទេស Dang Hoang Giang ប្រធាន SOM អាស៊ាន វៀតណាម បានទទួលជួបឯកអគ្គរាជទូតចក្រភពអង់គ្លេសប្រចាំនៅវៀតណាម Iain Frew សំដៅផ្លាស់ប្តូរយោបល់អំពីកិច្ចសហប្រតិបត្តិការ អាស៊ាន - អង់គ្លេស និងទំនាក់ទំនងទ្វេភាគី វៀតណាម - អង់គ្លេស។

នៅវៀតណាម ប្រទេសទាំងពីរកំពុងសហការគ្នាយ៉ាងជិតស្និទ្ធតាមរយៈតួនាទីជាសហអ្នកដឹកនាំភាពជាដៃគូផ្លាស់ប្តូរថាមពលប្រកបដោយសមធម៌ (JETP) គាំទ្រវៀតណាមក្នុងការពង្រីកថាមពលកកើតឡើងវិញ ទាក់ទាញការវិនិយោគលើវិស័យអគ្គិសនីខ្យល់នៅក្រៅឆ្នេរសមុទ្រ និងកសាងប្រព័ន្ធថាមពលដែលកាន់តែស្អាត មានសមត្ថភាពធន់កាន់តែល្អប្រសើរនាពេលអនាគត។

«បោះជំហានទៅមុខ» ជាមួយអាស៊ាន និងវៀតណាម

ក្នុងបរិបទដែលមានបញ្ហាប្រឈមជាច្រើននាពេលបច្ចុប្បន្ន ផែនការសកម្មភាព អាស៊ាន - អង់គ្លេស ជំនាន់ថ្មី ដែលត្រូវបានភាគីទាំងពីរឯកភាពគ្នាកាលពីខែកក្កដា បានផ្តោតលើបញ្ហាសំខាន់ៗសម្រាប់តំបន់ រួមមាន សន្តិភាពនិងស្ថិរភាព ការពង្រឹងសមត្ថភាពធន់នៃខឿនសេដ្ឋកិច្ច ការពន្លឿនការផ្លាស់ប្តូរថាមពលស្អាត និងការទាញយកផលប្រកបដោយការទទួលខុសត្រូវពីបច្ចេកវិទ្យាថ្មីៗ។

តួនាទីរបស់វៀតណាមមានសារៈសំខាន់ជាពិសេស ដោយសារទាំងជាអ្នកសម្របសម្រួលទំនាក់ទំនង អាស៊ាន - អង់គ្លេស ទាំងមានឋានៈសេដ្ឋកិច្ច និងយុទ្ធសាស្ត្រកាន់តែធំធេងឡើងនៅអាស៊ីអាគ្នេយ៍។

ក្នុងឱកាសរំលឹកខួប ៥ ឆ្នាំនៃទំនាក់ទំនងភាពជាដៃគូសន្ទនា អាស៊ាន - អង់គ្លេស ខ្ញុំចង់ផ្ញើនូវសារមួយយ៉ាងច្បាស់លាស់ថា៖ ទំនាក់ទំនងភាពជាដៃគូក្នុងតំបន់ដែលជោគជ័យបំផុត ត្រូវបានកសាងឡើងលើមូលដ្ឋានគ្រឹះនៃទំនាក់ទំនងទ្វេភាគីដ៏រឹងមាំទាំងឡាយ។ ហើយទំនាក់ទំនងទ្វេភាគីដែលរឹងមាំបំផុត នឹងរីកចម្រើនយ៉ាងល្អប្រសើរនៅក្នុងក្របខ័ណ្ឌតំបន់ប្រកបដោយប្រសិទ្ធភាព។

នោះជាមូលហេតុដែលចក្រភពអង់គ្លេសនឹងបន្តរួមដំណើរជាមួយអាស៊ាន និងជាមួយវៀតណាម ដើម្បីបោះជំហានទៅមុខនៅក្នុងបណ្តាឆ្នាំខាងមុខ៕

និស្សិតបែលហ្ស៊ិកបង្រៀនភាសាអង់គ្លេសដោយឥតគិតថ្លៃដល់មិត្តភក្តិវៀតណាម យុគសម័យ - ជិត ៣ ខែនៃកម្មសិក្សា និងការចូលរួមក្នុងសកម្មភាពនៅសាកលវិទ្យាល័យអប់រំ - សាកលវិទ្យាល័យ Danang (UD) និងសាលាបឋមសិក្សានៅទីក្រុង Da Nang សិស្សានុសិស្សមកពីមហាវិទ្យាល័យ Odisee University College (បែលហ្សិក) មានបទពិសោធន៍គួរឱ្យចាប់អារម្មណ៍ជាច្រើន និងការចងចាំដែលមិនអាចបំភ្លេចបាន។

អណិកជនវៀតណាមនៅចក្រភពអង់គ្លេសជឿជាក់លើច្បាប់ភូមិបាលឆ្នាំ ២០២៤ យុគសម័យ - តំណាងសមាគមវៀតណាមនៅចក្រភពអង់គ្លេសបានចាត់ទុកថា ច្បាប់ភូមិបាលឆ្នាំ ២០២៤ នឹងជួយការពារសិទ្ធិ និងផលប្រយោជន៍ស្របច្បាប់របស់អ្នកវិនិយោគ និងម្ចាស់វៀតណាមនៅបរទេស ជួយទីផ្សារអចលនទ្រព្យកាន់តែមានតម្លាភាព និងស្ថិរភាព។

ឌឹកអាញ់