មុនពេលសង្រ្គាមពាណិជ្ជកម្មបានផ្ទុះឡើងប្រធានរដ្ឋស៊ីជីនពីងមានមហិច្ឆិតាជាមួយនឹងផែនការដើម្បីប្រែក្លាយចិនទៅជាប្រទេសមួយដែលមានសេដ្ឋកិច្ចជឿនលឿនបំផុតនៅលើពិភពលោកនៅឆ្នាំ ២០៥០ ប៉ុន្តែចក្ខុវិស័យដ៏ធំរបស់លោកស៊ីជីនពីងកាន់តែពិបាកទៅ ៗ ដោយសារតែសង្គ្រាមពាណិជ្ជកម្មជាមួយសហរដ្ឋអាមេរិក។
មហិច្ឆិតាក្លាយជាមហាអំណាចសេដ្ឋកិច្ចរបស់ប្រទេសចិនកំពុងបាត់បង់
សេដ្ឋកិច្ចរបស់ប្រទេសចិនកំពុងថមថយរួចទៅហើយក្នុងគ្រាដែលមានជម្លោះពាណិជ្ជកម្មជាមួយសហរដ្ឋអាមេរិក ប៉ុន្តែបើទីក្រុងវ៉ាស៊ីនតោនដំឡើងពន្ធបន្ថែមទៀតនោះ ការដំឡើងពន្ធនេះអាចកាត់បន្ថយកំណើនសេដ្ឋកិច្ចរបស់ចិនខ្លាំង។ នេះបើយោងតាមការព្រមានរបស់មូលនិធិរូបិយវត្ថុអន្តរជាតិ (IMF) កាលពីចុងសប្តាហ៍មុន។
មូលនិធិ IMF បានកាត់បន្ថយរួចហើយនូវការព្យាករពីកំណើនសេដ្ឋកិច្ចរបស់ខ្លួនសម្រាប់ប្រទេសចិនមកនៅត្រឹម ៦,២ ភាគរយនៅឆ្នាំនេះដោយការព្យាករនេះបានសន្មតថា មិនមានការដំឡើងពន្ធគយថ្មីត្រូវបានធ្វើឡើងនោះទេ។
មូលនិធិ IMF បានឲ្យដឹងក្នុងរបាយការណ៍មួយថាពន្ធគយ ២៥ ភាគរយរបស់អាមេរិកលើទំនិញចិនដែលមិនទាន់ត្រូវបានដកហូតក្នុងអត្រានេះនៅឡើយនោះរហូតដល់ថ្ងៃទី ១ ខែកញ្ញានឹងធ្វើឲ្យសេដ្ឋកិច្ចថមថយនៅឆ្នាំបន្ទាប់។
របាយការណ៍ស្តីពីការពិនិត្យមើលឡើងវិញប្រចាំឆ្នាំចំពោះសេដ្ឋកិច្ចរបស់ប្រទេសចិនដែលហៅថា របាយការណ៍មាត្រាទី IV (Article IV Report) ត្រូវបានសិក្សាបញ្ចប់មុនពេលដែលលោកប្រធានាធិបតីអាមេរិក ដូណាល់ ត្រាំ បានប្រកាសពីផែនការដកហូតពន្ធពិន័យ ១០ ភាគរយលើទំនិញនាំចូលពីចិនដែលមានតម្លៃ ៣០០ ពាន់លានដុល្លារ។
ពន្ធពិន័យថ្មីនេះមានន័យថា ផលិតផលទាំងអស់ដែលនាំចូលពីប្រទេសចិនទៅអាមេរិកនឹងក្លាយជាកម្មវត្ថុនៃការដកហូតពន្ធគយដោយចាប់ផ្តើមពីថ្ងៃទី ១ ខែកញ្ញាឆ្នាំនេះទៅនៅក្នុងសង្គ្រាមពាណិជ្ជកម្មដែលកំពុងឡើងកម្តៅនេះ។
មូលនិធិដែលមានមូលដ្ឋាននៅទីក្រុងវ៉ាស៊ីនតោននេះជាថ្មីម្តងទៀតបានអំពាវនាវឲ្យមានការស្វែងរកដំណោះស្រាយឲ្យបានឆាប់រហ័សចំពោះជម្លោះពាណិជ្ជកម្មរវាងប្រទេសមហាអំណាចសេដ្ឋកិច្ចពិភពលោកទាំង ២ នេះដោយព្រមានពី «ការជះឥទ្ធិពលអវិជ្ជមានខ្លាំងនៅទូទាំងពិភពលោក»។
សម្រាប់ប្រទេសចិនរបាយការណ៍នេះបានឲ្យដឹងថា៖ «ការកើនឡើងបន្ថែមទៀតនៃភាពតានតឹងពាណិជ្ជកម្ម ឧទាហរណ៍ការដំឡើងពន្ធគយរបស់អាមេរិករហូតដល់ ២៥ ភាគរយលើទំនិញដែលនៅសេសសល់ផ្សេងទៀតដែលនាំចូលពីប្រទេសចិនអាចកាត់បន្ថយកំណើនសេដ្ឋកិច្ចប្រហែល ០,៨ ពិន្ទុភាគរយក្នុងរយៈពេល ១២ ខែបន្ទាប់»។
កប៉ាល់ដឹកទំនិញចូលចតនៅកំពង់ផែក្រុងឡុងប៊ិច សហរដ្ឋអាមេរិក (ប្រភព៖ AFP)
លោក James Daniel ប្រធានទទួលបន្ទុកបេសកកម្មទៅកាន់ប្រទេសចិនរបស់មូលនិធិ IMF បានថ្លែងកាលពីថ្ងៃសុក្រថាពន្ធគយ ១០ ភាគរយដែលលោក ត្រាំ បានប្រកាសដកហូតអាចធ្វើឲ្យកំណើនសេដ្ឋកិច្ចចិនធ្លាក់ចុះ ០,៣ ពិន្ទុភាគរយក្នុងឆ្នាំខាងមុខ។
ខណៈលោកបានបដិសេធមិនអត្ថាធិប្បាយអំពីស្ថានភាពបច្ចុប្បន្ននៃជម្លោះនេះលោក Daniel បានប្រាប់ក្រុមអ្នកយកព័ត៌មានថាអនុសាសន៍របស់ IMF ចំពោះប្រទេសចិនក្នុងគ្រាដែលស្ថានភាពធ្លាក់ចុះខ្លាំងនេះគឺត្រូវផ្តល់វិធានការជំរុញសារពើពន្ធបន្ថែមទៀត និងអនុញ្ញាតឲ្យរូបិយប័ណ្ណរបស់ខ្លួនឡើងចុះថ្លៃដោយសេរី ដើម្បី «ជួយស្រូបយកផលវិបាកដែលបង្កឡើងដោយសារការដកហូតពន្ធគយ»។
លោក Daniel ថ្លែងក្នុងសន្និសីទមួយថា ស្ថានភាពនេះ «ទាមទារឲ្យមានការឆ្លើយតបប្រភេទមួយចំនួន»។ ប៉ុន្តែរូបិយប័ណ្ណរបស់ចិន «គួរនៅរក្សាភាពបត់បែនបន្ថែម និងកំណត់ថ្លៃដោយទីផ្សារ» ដែលមានន័យថា «មានអន្តរាគមន៍កាន់តែតិចជាងមុន»។
ទោះយ៉ាងណានៅពេលទីក្រុងប៉េកាំងបានអនុញ្ញាតឲ្យរូបិយប័ណ្ណរបស់ខ្លួនធ្លាក់ថ្លៃនៅថ្ងៃចន្ទសប្តាហ៍មុនបន្ទាប់ពីការប្រកាសហូតពន្ធបន្ថែមនោះលោក ត្រាំ បានចោទប្រកាន់ទាំងខឹងសម្បាទៅលើចិនថាបានគ្រប់គ្រងតម្លៃរូបិយប័ណ្ណរបស់ខ្លួន ដើម្បីទទួលបានអត្ថប្រយោជន៍ពាណិជ្ជកម្មលើក្រុមហ៊ុនអាមេរិក។
ធនាគារកណ្តាលចិននៅពេលនោះបានធ្វើអន្តរាគមន៍រក្សាស្ថិរភាពអត្រាប្តូរប្រាក់ ដើម្បីទប់ស្កាត់រូបិយប័ណ្ណមិនឲ្យធ្លាក់ថ្លៃបន្ថែមទៀត៕
（យោងតាម postkhmer និង freshnews សរុបដោយវិច្ឆិកា）
មតិពីមិត្តអ្នកអាន