ជាមួយទេសភាពតំបន់ទឹកធ្លាក់ធម្មជាតិ ភូមិឋាន ជនជាតិភាគតិចច្រើនអម្បូរ ព្រៃភ្នំ ជ្រលងដងអូរ និងវាលស្មៅខៀវស្រងាត់ជាប់ឯជើងមេឃគួរឲ្យគយគន់នោះ ពិតជាប្លែកអារម្មណ៍សម្រាប់ភ្ញៀវទេសចរជាតិ អន្តរជាតិ ដែលបានជ្រើសរើសយកដំណើរទស្សនាចរណ៍មកដល់ខេត្តមណ្ឌលគិរី។
«ស្ទឹងពពក»តំបន់ទេសចរណ៍ដ៏អស្ចារ្យមួយទៀត នៅស្រុកស្រែអំបិល ខេត្តកោះកុង |
អណ្ដូងស្នេហ៍ដាក់ដាំ ទិដ្ឋភាពតំណាងមណ្ឌលគិរី |
មណ្ឌលគិរីទិសដៅទេសចរណ៍ធម្មជាតិដ៏ទាក់ទាញនៅតំបន់ភាគឦសានប្រទេស |
ភ្ញៀវទេសចរទាំងជាតិ និងអន្តរជាតិ បានលាន់មាត់ថា ខេត្តមណ្ឌលគិរី ពិតជាឋានសួគ៌ទេសចរណ៍ធម្មជាតិ ភូមិភាគឦសាន មិនអាចមើលរំលងបានសម្រាប់គ្រប់ដំណើរទស្សនាចរណ៍ គ្រប់ជាតិសាសន៍។ ខេត្តភាគឦសានប្រទេស នៅលើកំពូលភ្នំ ដែលមានឈ្មោះក្រុង សែនមនោរម្យ ពិតជាគោលដៅទស្សនាចរណ៍លំហែកាយដ៏ប្រសើរមួយ។ ក្រៅពីដើរកម្សាន្តតំបន់ធម្មជាតិ ស្រូបខ្យល់អាកាសដ៏បរិសុទ្ធលើវាលស្មៅដូចក្រាលព្រហ្ម ប្រៀបបានទីលាន វាយកូនហ្គោលធម្មជាតិដ៏ធំល្វឹងល្វើយ ក៏នៅមានដំណើរទស្សនាចរណ៍ដោយការជិះដំរីគយគន់ទេសភាព តាមចំណង់ផងដែរ។
លោក ងិន សុវិមាន ប្រធានមន្ទីរទេសចរណ៍ខេត្តមណ្ឌលគិរីបានឲ្យដឹងថា ខេត្តមណ្ឌលគិរីមានតំបន់រមណីយដ្ឋានជាផ្លូវការចំនួន១៧កន្លែងដែល មាន១៥កន្លែងបែបធម្មជាតិ និង២កន្លែងទាក់ទងនឹងវប្បធម៌ប្រវត្តិសាស្ត្រ។ លោក អះអាងថា៖«ពីមួយឆ្នាំទៅមួយឆ្នាំ លំហូរភ្ញៀវ ដែលចាប់អារម្មណ៍មកកម្សាន្តនៅខេត្តនេះ មានការកើនឡើង មិនមានការថយចុះទេ ពិសេសឆ្នាំនេះ ខណៈផ្លូវកោះញែកត្រូវបានតភ្ជាប់ពីខេត្តរតនគិរី»។
ភ្នំដោះក្រមុំគឺជាគោលដៅទេសចរណ៍បែបអរូបិយ ក្រៅពីជនជាតិដើមភាគតិចព្នង មានជំនឿថា ជាភ្នំដែលមានបារមីដ៏ស័ក្តិសិទ្ធិរបស់ពួកគេគោរពបូជា សែនព្រេនសុំក្តីសុខនោះ ភ្ញៀវទេសចរដែលបានសម្រេចដំណើរដល់ខេត្តនេះ ក៏មិនរំលងបារមីភ្នំនេះដែរ។ ក្រៅពីឡើងដើរលេងកម្សាន្ត ក៏មិនភ្លេច អុជធូបសុំក្តីសុខសប្បាយ មុននឹងបង្ហួសដំណើរទៅគយគន់សមុទ្រឈើ មើលថ្ងៃលិច។
មណ្ឌលគិរីទិសដៅទេសចរណ៍ធម្មជាតិដ៏ទាក់ទាញនៅតំបន់ភាគឦសានប្រទេស |
ទឹកជ្រោះប៊ូស្រា គឺបេះដូងរបស់ខេត្តមណ្ឌលគិរី។ គ្រប់ភ្ញៀវដែលទៅកម្សាន្តខេត្តនេះ គេនឹកដល់ទឹកជ្រោះនេះមុនគេ។ ទឹកជ្រោះប៊ូស្រា មានទឹកធ្លាក់៣កន្លែងផ្សេងៗគ្នានៅលើជ្រលងតែមួយ ទឹកធ្លាក់ដំណាក់ទី ១ គឺជាចំណុចដ៏ទាក់ទាញបំផុតសម្រាប់ការងូតលេងរបស់អ្នកទេសចរដែលមានមុខកាត់ទំហំប្រមាណ១០ទៅ២៩ម៉ែត្រតាមរដូវប្រាំង ឬវស្សា និងមានកម្ពស់ពី៨ទៅ១៥ ម៉ែត្រ។ ទឹកធ្លាក់ទី២ ស្ថិតនៅខាងក្រោម២០០ម៉ែត្រ មានមុខកាត់ពី១៣ ទៅ ២០ ម៉ែត្រ និងកម្ពស់ ១៥ ទៅ ២៥ ម៉ែត្រ។ ចំណែកឯទឹកធ្លាក់ទី៣គឺនៅជាច្រើនរយម៉ែត្រទៅក្រោមទៀតដែលស្ថិតនៅក្នុងព្រៃក្រាស់ ពោលគឺគេមិនអាចធ្វើដំណើរទៅដល់នោះទេ។ ទឹកជ្រោះប៊ូស្រាស្ថិតនៅភាគខាងកើតទីរួមខេត្តចម្ងាយប្រមាណ៣៨គីឡូម៉ែត្រ ពីក្រុងសែនមនោរម្យ ឬក៏ធ្វើដំណើរតែរយៈពេល១៥នាទីប៉ុណ្ណោះពីទីប្រជុំជនស្រុក ពេជ្រាដា។ ដើម្បីចូលទៅលេងកម្សាន្តក៏តម្រូវឲ្យយើងបង់ថ្លៃរថយន្តពី ១ ដុល្លារទៅ ២ ដុល្លារផងដែរ។
ទឹករមនា ឬដំណាក់ស្តេច ដែលមានប្រវត្តិសាងសង់ឡើងជារាជដំណាក់មួយ របស់អតីតស្តេចនរោត្តមសីហនុកាលពីអំឡុងទសវត្សរ៍៦០។ ដោយសារតែទីនេះ បានហ៊ុមព័ទ្ធទៅដោយទេសភាពស្រស់ត្រកាល និងខ្យល់អាកាសបរិសុទ្ធមានទឹកធ្លាក់ល្អស្អាត ព្រៃភ្នំក្រំថ្ម និងដើមឈើធំៗ នៅរាយប៉ាយក្បែរនោះ។ អតីតរាជដំណាក់នោះត្រូវបានបំផ្លិចបំផ្លាញកាលពីសម័យសង្គ្រាមនៅសល់តែស្លាកស្នាមបន្តិចបន្តួចប៉ុណ្ណោះ។ រមណីយដ្ឋានទេសចរណ៍ដែលស្ថិតនៅក្នុងឃុំមនោរម្យ ក្រុងសែនមនោរម្យមានចម្ងាយ៥គីឡូម៉ែត្រពីផ្ចិតកណ្តាលក្រុងនេះ។
មណ្ឌលគិរីទិសដៅទេសចរណ៍ធម្មជាតិដ៏ទាក់ទាញនៅតំបន់ភាគឦសានប្រទេស |
ទឹកធ្លាក់ជ្រៃធំ ទឹកជ្រោះដ៏ពិសិដ្ឋមួយ យកឈ្មោះតាមដើមជ្រៃដែលដុះនៅក្បែរៗនោះ។ នៅព័ទ្ធជុំវិញទឹកជ្រោះនេះក៏នៅសម្បូរទៅដោយដើមស្រឡៅ និងដើមឈើ ផ្សេងៗទៀតដែរ។ មន្ទីរទេសចរណ៍ខេត្តបានធ្វើកិច្ចសហការជាមួយអាជ្ញាធរមូលដ្ឋានរៀបចំ ទីនេះឲ្យទៅជាតំបន់ទេសចរណ៍ដូចទឹកជ្រោះប៊ូស្រាដែរ។ ទឹកជ្រោះជ្រៃធំមានទីតាំងស្ថិតនៅក្នុងស្រុកសែនមនោរម្យដែលមានចម្ងាយប្រមាណ២០គីឡូម៉ែត្រ។
ទឹកធ្លាក់រមនា មានទីតាំងស្ថិតនៅក្នុងឃុំសែនមនោរម្យ ស្រុកអូររាំង ប៉ែកខាងលិចក្រុងសែនមនោរម្យ ដែលអំណោយផលដល់ផ្នែកអេកូទេសចរណ៍ មានព្រៃឈើពណ៌បៃតងគ្របដណ្តប់ព័ទ្ធជុំវិញតាមដងអូរ និងជួរភ្នំជាជម្រកដ៏សុខសាន្តនៃពពួកម្រឹគីម្រឹគា បក្សាបក្សី ព្រមទាំងភូមិឋានរបស់បងប្អូនជនជាតិនោះ គេដឹងថា មានទឹកធ្លាក់២ទៅ៣កន្លែងនៅតាមដងអូរនៃជ្រលងភ្នំនោះ។
ទឹកធ្លាក់ក្បាលព្រះ ឬហៅថា លែងបូកព្រះ ជាតំបន់ទឹកធ្លាក់ធម្មជាតិមួយមានទេសភាពយ៉ាងស្រស់បំព្រង គួរជាទីចាប់ចិត្តខ្លាំងណាស់សម្រាប់អ្នកទេសចរជាមួយនឹងសម្រស់ធម្មជាតិដ៏ស្រស់ត្រកាល ព័ទ្ធជុំវិញ ដោយព្រៃឈើតូចធំ និងជួរភ្នំបង្កើតបានជាផ្ទាំងទស្សនីយភាពឆើតឆាយ និងមានម្លប់ឈើធំៗដែលផ្តល់ជាកន្លែងសម្រាប់ភ្ញៀវទេសចរសម្រាកកម្សាន្តទទួលទានអាហារ ពិចនិក និងងូតទឹកធ្លាក់ថ្លាត្រជាក់យ៉ាងសប្បាយរីករាយ មានទីតាំងស្ថិតនៅក្នុងសង្កាត់រមនា ក្រុងសែនមនោរម្យ ចម្ងាយ១៣គីឡូម៉ែត្រពីទីរួមខេត្ត។
ឯកឧត្តមរដ្ឋមន្ត្រី ថោង ខុន បានបញ្ជាក់បន្ថែមថា នៅក្នុងផែនការមេអភិវឌ្ឍន៍វិស័យ ទេសចរណ៍ខេត្តមណ្ឌលគិរីនេះ បានបែងចែកប៉ូលទេសចរណ៍ធំៗចំនួន៦ ទៅតាមទីតាំង ភូមិសាស្ត្រ និងសក្ដានុពលផ្សេងគ្នាជាដើម ក្នុងនោះរួមមាន៖ ១. តំបន់អេកូទេសចរណ៍ក្នុង ដែនជម្រកសត្វព្រៃ៖ ដោយសារនៅក្នុងខេត្តមណ្ឌលគិរីមានដែនជម្រកសត្វព្រៃចំនួន ៥ ដែលស្ថិតក្រោមការគ្រប់គ្រងរបស់ក្រសួងបរិស្ថាន និងពោរពេញដោយសក្ដានុពល ក្នុងវិស័យអេកូទេសចរណ៍។ ២. តំបន់របៀងអេកូទេសចរណ៍ និងទេសចរណ៍ជនជាតិ ដើមភាគតិច៖ ដែលប៉ូលទេសចរណ៍ទីពីរនេះនឹងត្រូវភ្ជាប់ពីតំបន់ប៊ូស្រាទៅកាន់តំបន់ដាក់ ដាំ។ ៣. តំបន់ក្រុងសែនមនោរម្យ៖ នឹងអភិវឌ្ឍក្រុងនេះទៅជាតំបន់ អភិវឌ្ឍន៍ ពហុបំណង ដែលមានសកម្មភាពកម្សាន្តផ្សេងៗមានលក្ខណៈសម្បូរបែប។ ៤. តំបន់ប្រជុំជនស្រុក កោះញែក៖ មានសក្ដានុពលជាតំបន់កសិទេសចរណ៍ ពិសេសអាចរៀបចំជាចំណត យន្តហោះលើទឹក (Water Plan) នៅទន្លេស្រែពកនៃស្រុកកោះញែក។ ថ្វីដ្បិតទន្លេស្រែពកមិន អំណោយផលដល់ការធ្វើនាវាចរទេសចរណ៍ ឬដឹកជញ្ជូនមិនបានក៏ពិតមែន (ដោយសារ សម្បូរថ្មប៉ប្រះទឹក) តែគេអាចរៀបចំជាចំណតយន្តហោះលើទឹក ដូចបណ្ដាប្រទេសមួយចំនួន ដែលឱ្យយន្តហោះហោះហើរមកកាន់តំបន់បឹងទន្លេសាប ឬទៅកាន់កោះរ៉ុងបានទៀតផង។ ៥. តំបន់អាកាសយានដ្ឋានមណ្ឌលគិរីនៅស្រុកអូររាំង៖ ដែលនឹងត្រូវអភិវឌ្ឍជាទី ក្រុងរណបនៃក្រុងសែនមនោរម្យ និង៦.តំបន់សមាហណកម្មច្រកទ្វារព្រំដែន៖ នៅខេត្ត មណ្ឌលគិរីមានច្រកទ្វារព្រំដែនទ្វេភាគី ជាមួយវៀតណាមចំនួន៤កន្លែង ដែលអាចជំរុញ ឱ្យមានសកម្មភាពអភិវឌ្ឍន៍ និងទេសចរណ៍នៅតាមច្រកព្រំដែននេះ៕
មតិពីមិត្តអ្នកអាន